"შენ არ გეშინოდა, ჩვენ არ გვეშინია" - ნავალნის დაკრძალვაზე ასობით ადამიანი შეიკრიბა: რა ხდება ადგილზე (ფოტოები)

პატიმრობაში გარდაცვლილ რუს ოპოზიციონერ პოლიტიკოსს, ალექსეი ნავალნის დღეს მოსკოვში, ბორისოვის სასაფლაოზე დაკრძალავენ.

სასაფლაოს მიმდებარე ტერიტორიაზე უსაფრთხოების ზომები მაქსიმალურად არის გამკაცრებული. ადგილზე სამართალდამცველები პატრულირებენ.

სასაფლაოსთან ასობით ადამიანი ყვავილებით არის შეკრებილი, მობილიზებულნი არიან ასევე უშიშროების ძალები. მედიის ინფორმაციით, პოლიციელები ადგილზე მისულებს უმოწმებენ საბუთებს, პირად ნივთებს.

როდესაც ნავალნის ცხედარი სასაფლაოზე მიასვენეს, შეკრებილები სკანდირებდნენ: "შენ არ გეშინოდა, ჩვენ არ გვეშინია".

ალექსეი ნავალნი იამალო-ნენეცის ავტონომიური ოლქის კოლონიაში 16 თებერვალს გარდაიცვალა.

რუსეთის ფედერალური სასჯელაღსრულების სამსახურის მტკიცებით, ნავალნიმ თავი ცუდად იგრძნო და გონება დაკარგა, რის შემდეგაც მედიკოსებმა მის გადასარჩენად რეანიმაციული ღონისძიებები განახორციელეს, მაგრამ უშედეგოდ. ალექსეი ნავალნის ცხედარი დედას 24 თებერვალს გადასცეს.