ნიკა გვარამია "მთავარი არხის" გენერალური დირექტორის თანამდებობასა და 12%-იან წილზე უარს ამბობს
"მთავარი არხის" დამფუძნებელი ნიკა გვარამია არხის გენერალური დირექტორის თანამდებობასა და წილზე უარს ამბობს. ამის თაობაზე ის სოციალურ ქსელში წერს:
"დირექტორის თანამდებობას ციხიდან გამოსვლის შემდეგ აღარ ვასრულებ (არც ციხიდან ვასრულებდი, ცხადია). დირექტორის მოვალეობას შესანიშნავად გაუმკლავდა გიორგი გაბუნია და ის უკვე ოფიციალურად დაინიშნა არხის დირექტორად. ძალიან დიდი მადლობა არხის ყველა დამფუძნებელს ერთსულოვანი გადაწყვეტილებისთვის.
რაც შეეხება ჩემს 12%იან წილს "მთავარში", იგი არაა თავსებადი პარტიულ თანამდებობასთან, რომელსაც უახლოეს დღეებში დავიკავებ. ამიტომაც კანონის მოთხოვნა დავიცავი და წილი ჩემს სოფოს გადავუფორმე.წარმატებები "მთავარს", დანარჩენზე - შემდეგ კვირაში".
როგორც ირკვევა, მან დოკუმენტები ამ ცვლილებების დასარეგისტრირებლად საჯარო რეესტრში გუშინ, 27 თებერვალს შეიტანა.