"40 დღის გახდა ნიკოლა, როდესაც სამსახურში დავბრუნდი" - როგორ პოულობს ბალანსს კარიერასა და ოჯახს შორის დილის გადაცემის წამყვანი ანი ღონღაძე
დღევანდელ სამყაროში, სადაც ცხოვრების ტემპი განუწყვეტლივ ჩქარდება და წარმატებისკენ სწრაფვა ზოგჯერ წარმოუდგენლად რთული ჩანს, ოჯახურ პასუხისმგებლობებსა და პროფესიულ მიღწევებს შორის ბალანსის პოვნა ძალიან ძნელია. ჰარმონიის ეს მარადიული ძიება ბევრისთვის გამოწვევად იქცა და ამავდროულად, სხვებისთვის შთაგონებისა და მოტივაციის წყაროდ.
არიან ადამიანები, ვისთვისაც ოჯახი და კარიერა არა საპირისპირო, არამედ ცხოვრების შემავსებელი სფეროებია, რომლებსაც შეუძლიათ სიხარული, კმაყოფილება და აზრი მოუტანონ ჩვენს ცხოვრებას. ანი ღონღაძე „პალიტრანიუსის“ დილის გადაცემის ერთ-ერთი წამყვანია, რომელიც შესანიშნავად ახერხებს ბალანსის დაცვას ოჯახსა და სამსახურს შორის. მისი ყოველი დილა ძალიან დატვირთულია, მაგრამ საკუთარ თავს ცუდ განწყობაზე ყოფნის უფლებას არასოდეს აძლევს.
როგორ იწყებ დილას, სანამ სამსახურში მიდიხარ?
- დილას სხვა და სხვა დღეს განსხვავებულად ვიწყებ. როდესაც იმ დღეს დილის ეთერში ვარ, რა თქმა უნდა, ძალიან ადრე იწყება ჩემი დილა. ეთერის დღეს სწრაფად ვიწესრიგებ თავს და გავრბივარ პალიტრაში. ვემზადებით ეთერისთვის და პარალელურად აუცილებლად ყავას მივირთმევ, რომელიც ჩემი დილის განუყოფელი ნაწილია. თუ არ ვარ დილის ეთერში, სახლში მივირთმევ ყავას მშვიდად, საუზმესთან ერთად, შემდეგ ბავშვი მიმყავს ბაღში და მივდივარ სამსახურში. ორივე შემთხვევაში ჩემი დილა ძალიან დატვირთულია.
გაქვს თუ არა რაიმე სტრატეგია, რომ დილიდანვე ენერგიული იყო და დილის გადაცემის დასრულებამდე პოზიტიური დარჩე?
- განსაკუთრებული სტრატეგია არ მაქვს, მაგრამ უკვე ისე ვარ მომართული, ცუდ განწყობაზე ყოფნის საშუალებას არ ვაძლევ ჩემ თავს. როდესაც იწყება ეთერი და პირველ "დილამშვიდობისას" ვამბობ, თავისით მოდის განწყობა და მიმყვება ბოლომდე. მაქსიმალურად ვცდილობთ მაყურებლისთვის პოზიტიური განწყობის შექმნას.
როგორ მოხვდი ტელევიზიაში? იყო თუ არა ეს შენი ოცნება?
- ტელევიზიაში მოვხვდი საკმაოდ დიდი ხნის წინ და მაშინვე მივხვდი, რომ ეს ის საქმეა, რომელიც მთელი ცხოვრება მეყვარება. პალიტრაში 5 წლის წინ მოვედი. მაშინ იყო ასეთი გადაცემა: "არცოდნა აკრძალულია," სადაც პირველად მივიღე გამოცდილება, როგორც წამყვანმა. შემდეგ იყო ჩემი საყვარელი გადაცემა - "კინო", რომელიც დღესაც მიმყავს და რა თქმა უნდა, " დილის პალიტრა," სადაც პირდაპირ ეთერში მუშაობა ვისწავლე და ჩემთვის ამას სულ სხვა ხიბლი აქვს.
რა როლს ასრულებს შენი ოჯახი შენი კარიერის მხარდასაჭერად?
- ოჯახი, რა თქმა უნდა, უდიდეს როლს ასრულებს. რომ არა ასეთი ხელშეწყობა, რომელიც მე მაქვს, რთული იქნებოდა შეთავსება. როდესაც გყავს პატარა, ხელშეწყობა ნამდვილად გჭირდება. მით უმეტეს, როდესაც ისეთ დროს იწყებ დილას, რომ ბავშვთან დახმარება ამ დროს აუცილებლად გჭირდება. რა თქმა უნდა, ამ მხრივ უდიდესი მხარდაჭერა მაქვს და რომ არა ოჯახის წევრები, ბევრ რამეს ვერ მოვახერხებდი. თუნდაც იმას, რომ 40 დღის გახდა ნიკოლა, როდესაც სამსახურში დავბრუნდი. რაც ადრე წარმოუდგენელი მეგონა.
როგორ ახერხებ ოჯახს და კარიერას შორის ბალანსის პოვნას, როცა შვილი გყავს?
- მე ვფიქრობ, ადამიანი რაც უფრო დატვირთულია, მეტად შეუძლია დროის განაწილება სწორად. ვფიქრობ ვახერხებ იმას, რომ ბევრი დრო გავატარო ჩემს შვილთან, რაც უდიდეს სიამოვნებას მანიჭებს და ასევე, ვაკეთო ჩემი საყვარელი საქმე. ჩემთვის ეს ყველაფერი ერთად ძალიან მნიშვნელოვანია.
დაძაბული გრაფიკის ფონზე, როგორ ახერხებ მუდამ ფორმაში ყოფნას? როგორია შენი დილის რუტინა?
- დილას რაიმე განსაკუთრებული რუტინა ნამდვილად არ მაქვს. თუ დილის ეთერი არ მაქვს, მშვიდად მიყვარს სახლში ყავის დალევა და აუცილებლად საუზმე. საუზმე ძალიან მნიშვნელოვანია ჩემთვის, თუმცა ყოველ დილას, რა თქმა უნდა, ვერ ვახერხებ. ასევე მიყვარს უქმეებზე დილიდანვე ჩემს შვილთან ერთად სეირნობა და სხვა და სხვა აქტივობის დაგეგმვა.
თავის მოვლასთან დაკავშირებით რამე რჩევას ხომ არ გაგვიზიარებდი? რასაც ეფექტურად იყენებ?
- რომ გითხრათ განსაკუთრებით ვუვლი კანს, მოგატყუებთ. მაგრამ ერთი რასაც აუცილებლად ვასრულებ ისაა, რომ მაკიაჟით არ დავიძინო, რაც არ უნდა დაღლილი ვიყო. თითქმის ყოველ დღე მიწევს სატელევიზიო მაკიაჟის გაკეთება და ამ დროს ორმაგად ყურადღება ჭირდება კანს. ასევე თმა ძალიან მნიშვნელივანია ჩემთვის. ბოლო წლებია მოკლე ვარცხნილობას ვატარებ და ვფიქრობ, ვიპოვე ჩემი სტილი ამ კუთხით.
რა რჩევას მისცემდი სხვა მშობლებს, განსაკუთრებით მათ, ვისაც უწევს სამუშაოსა და ოჯახის დაბალანსება?
- განსაკუთრებით ახალბედა დედებს ვეტყვი, რომ არ შეეშინდეთ. თავიდან სანამ დააბალანსებ ამ ყველაფერს და ახალ ცხოვრებას მიეჩვევი, ყველაფერი გაცილებით რთულად ჩანს, თუმცა ეს ასე ნამდვილად არაა. არის დაღლილობა, როდესაც პატარა გყავს და რთულია ამ დროს ბალანსის დაჭერა, თუმცა ჩემთვის პირადად აუცილებელია რომ ვიყო დაკავებული, მქონდეს ჩემი საქმე. ასევე, მქონდეს საკმარისი დრო ჩემი შვილისთვის.
ჯერჯერობით ახლა ის ეტაპი მაქვს, როდესაც ჩემ კიდევ ერთ საყვარელ საქმიანობას-სიმღერას ვერ ვუთმობ სათანადო დროს, მაგრამ ვფიქრობ, ამასაც ახლო მომავალში გამოვასწორებ. ნიკოლაც იზრდება, უკვე 2 წლის გახდა და ვფიქრობ ამის შეთავსებასაც შევძლებ.
როგორც ვიცი, ინფლუენსერობის მიმართულებითაც აქტიურობ. რა მიმართულება გაქვს არჩეული, რომელ სოცქსელებს იყენებ და როგორ ფიქრობ, რა განაპირობებს შენი გამომწერების ინტერესს?
- ვერ გეტყვით, რომ ძალიან აქტიური ვარ, თუმცა, გამომწერებს ვუზიარებ ჩემს ყოველდღიურობას, რაც ვფიქრობ ინტერესს იწვევს. ამ კუთხითაც ვფიქრობ, შემიძლია განვითარება და მეტად აქტიურობა. ინფლუენსერს ჩემ თავს ვერ დავარქმევდი, თუმცა მიყვარს ლამაზი ფოტოების გადაღება, გაზიარება. ასევე ვმოგზაურობ ხშირად და ეს ყველაფერი ერთად, ალბათ, ინტერესს იწვევს.
ამ კუთხით თუ მისცემდი რჩევას, დამწყებ ინფლუენსერებს?
- ამ საკითხში ვერ გამოვდგები დიდას რჩევებით, თუმცა ალბათ ბუნებრიობას ძალიან დიდი მნიშვნელობა აქვს. მეც ზუსტად ასეთ ინფლუენსერებს ვადევნებ თვალს და ვცდილობ, მეც ბუნებრივი ვიყო.