"ოჯახი გვერდში მიდგას, შემოევლოთ ჩემი თავი, მაგრამ ვატყობ, რომ ბოლომდე ვერ მაპატიეს" - რას ჰყვება გოგი წულაია, რომელიც თავშესაფარს ბელგიაში ითხოვს მას მერე, რაც საფრანგეთმა უარი უთხრა?

პოლიტიკოსი გოგი წულაიას საფრანგეთმა თავშესაფარზე უარი უთხრა და უკვე მესამე თვეა, რაც პოლიტიკური თავშესაფრის მიღებას ბელგიაში ცდილობს. ჩვენთან საუბარში ამბობს, რომ საფრანგეთში ბიძინა ივანიშვილის გავლენებმა იმოქმედა. მისი თქმით, როდესაც ერთი წლის წინ ქვეყნის დატოვება გადაწყვიტა, სჯობდა პირდაპირ ამერიკაში წასულიყო.

შეგახსენებთ, პოლიტიკოსი სექსუალური ძალადობის ბრალდებით 2021 წლის 17 მარტს დააკავეს, მას წინასწარი პატიმრობა 3 თვით მიესაჯა, გარკვეული დროის განმავლობაში პოლიტიკოსი შიმშილობდა, რის გამოც მისი ჯანმრთელობის მდგომარეობა რამდენჯერმე დამძიმდა. ოპოზიციონერი პოლიტიკოსი საპატიმროდან იმავე წლის 1-ლ ივლისს გაათავისუფლეს. სასამართლო პროცესზე მოსამართლემ ადვოკატის შუამდგომლობა დააკმაყოფილა და მას 6 000-ლარიანი გირაო შეუფარდა. პროკურატურა აღნიშნულ გადაწყვეტილებას არ დაეთანხმა და სააპელაციო წესით გაასაჩივრა, რაც თბილისის სააპელაციო სასამართლომ დააკმაყოფილა და მსჯავრდებულს 4 წლით თავისუფლების აღკვეთა განუსაზღვრა. ამ დროისთვის პოლიტიკოსი უკვე ქვეყნიდან იყო წასული და თავშესაფარს საფრანგეთში ითხოვდა.

- ბატონო გოგი, სად ცხოვრობთ ახლა, რომელ ქვეყანაში და რა სტატუსით?

- ახლა ბელგიაში ვარ, ბრიუსელთან ახლოს პატარა ქალაქში. აქ მცხოვრებლებს "დუბლინები" გვქვია. მაგალითად, ადამიანები, როდესაც რომელიმე ქვეყანაში ბარდებიან და იქ ვერ მიიღებენ სტატუსს, შემდეგ გადადიან სხვა ქვეყანაში, ასეთ ადამიანებს "დუბლინებს" ეძახიან. მე თავიდან საფრანგეთში ჩავბარდი.

- პოლიტიკური ნიშნით ხართ ჩაბარებული?

- დიახ, საფრანგეთშიც ასე ჩავბარდი და შევცდი, რომ იქ ჩავედი, მაგრამ იქ ნაცნობები მყავდა, ვისთანაც ღამეს გავათენებდი. საბოლოოდ საფრანგეთმა არ მომცა თავშესაფარი. კარგი ბიჭი ხარ, გვჯერა, რომ პოლიტიკოსი ხარ, მაგრამ საქართველო კარგი და უსაფრთხო ქვეყანაა, კარგი სასამართლო გაქვთ, წადი და ეგენი გაგასამართლებენო. ჩემი შეცდომა იყო იქ ჩასვლა, ბიძინა ივანიშვილი საფრანგეთის მოქალაქე და საპატიო ლეგიონერია, თან ბიზნესი აქვს ამ ქვეყანაში. ალბათ, აქვს რაღაც გავლენები. თან ვამბობდი, ბიძინა ივანიშვილი ჩემი პირადი მტერია-მეთქი და ვინ მომცემდა თავშესაფარს?!

- რამდენი ხანია, რაც ბელგიაში გადახვედით?

- სამი თვე იქნება, 14 დეკემბერს ჩამოვედი აქ და თავიდან დაიწყო პროცესი. ჯერჯერობით ნორმალურად მიდის, მისამართიც მაქვს და ახლა ვცხოვრობ "დუბლინების" სახლში. ამ წუთას ამ შენობაში ქართველებიც არიან. ერთი ოჯახია - ცოლ-ქმარი, შვილებით, ასევე ორი ქალბატონია მეუღლეების გარეშე, ძალადობის მსხვერპლები არიან, მე ვარ, ორი მამა-შვილი და ერთიც ძალიან კარგი ბიჭია პანკისიდან. თავიდან ბელგიაში რომ ჩამოვედი, ერთი ქართველი იყო და ახლა ძალიან იმატა. საფრანგეთი გავსებულია ქართველი ემიგრანტებით, ძირითადად ჯანმრთელობის პრობლემებით ბარდებიან და ვისაც უარს ეუბნებიან, ბელგიაში გადმოდიან. აქ რომ მოვედი, 300 კაცი იდგა რიგში და მარტო ვიყავი ქართველი. ერთ თვეში უკვე ბევრი შემოემატა. როგორც ვიცი, ბელგიამ საქართველოს შეუჩერა უსაფრთხო ქვეყნის სტატუსი და აქ იმიტომ მოდიან, მაგრამ ახლა ამბობენ, თითქოს დაუბრუნაო. არ ვიცი, არ წამიკითხავს მე დოკუმენტი.

- საფრანგეთმა უარი გითხრათ, მაგრამ ვიცით, რომ იგივე "ნაციონალური მოძრაობის“ მხარდამჭერებს, პოლიტიკოსებს, არაერთს მიუღიათ თავშესაფარი სხვადასხვა ქვეყანაში.

- ამერიკაში შეიძლება, მაგრამ არ დაიჯეროთ, საფრანგეთი თავშესაფარს ძალიან ძნელად იძლევა. ის, ვინც ამბობს, რომ პოლიტიკურით ვბარდებიო, 90 პროცენტი ჩაბარებულია სულ სხვა მიზეზით, მაგალითად, როგორც სექსუალური უმცირესობის წარმომადგენელი, ტრანსგენდერი. არ დავიტრაბახებ, მაგრამ პოლიტიკური თვალსაზრისით რომ იძლეოდნენ თავშესაფარს, საფრანგეთი პირველ რიგში მე მომცემდა. ცნობილიც ვარ, ყველა არხი და "იუთუბი" აჭრელებული იყო ჩემი ფოტოებით. ციხეშიც ვიჯექი, სასამართლოც მქონდა. ახალგაზრდები ამბობენ, რომ როგორც ჰომოსექსუალები ისე ჩაბარდნენ, არადა, სულაც არ არიან ჰომოსექსუალები...

- წარმოიდგენდით, რომ ამ ასაკში ემიგრანტი გახდებოდით?

- 61 წლის კაცი ვარ და ჩემი აქ ჩამოსვლამდე ორი თვით ადრე, ვინმეს რომ ეთქვა ემიგრანტი გახდებიო, მგონია, თავში აგურს ჩავარტყამდი, არა, მოძალადე კი არ ვარ, ისე ვამბობ სიტყვის მასალად. ბოლო დღეებში სანამ საქართველოს დავტოვებდი, მითხრეს, რომ დაჭერას მიპირებდნენ, რადგან იმ ქალბატონმა იჩივლა, თითქოს "ფეისბუქით" გავუგზავნე მეგობრობის თხოვნა, რაც შეუძლებელია, დამბლოკა და მეგობრობას როგორ გავუგზავნიდი?! სისულელეები ამტკიცა სასამართლოზე. მას დამცავი ორდერი მისცეს, მე კი სახლში მომადგნენ და შემაკავებელი გამომიწერეს, თურმე ასმათს აწუხებო. ამ ორდენის შემდეგ ყოველ წუთში შეეძლო პოლიციას ჩემი დაკავება. 17 იანვარს გავასაჩივრე და როდესაც ისევ დამიტოვეს დამცავი ორდენი, მივხვდი რომ საციხოდ ვიყავი გამზადებული. საფრანგეთში 28 დეკემბერს გამოვფრინდი. ჯობდა ამერიკაში წავსულიყავი, ევროპა არ უნდა ამერჩია, მითუმეტეს საფრანგეთი.

- ბელგიამ რომ თავშესაფარი მოგცეთ, მანდ ცხოვრება როგორ წარმოგიდგენიათ?

- აქ სიკვდილს არ ვაპირებ, ენის სწავლა მიჭირს, ინგლისურიც არ ვიცი. როდესაც მეკითხებიან, რას გამოასწორებ, რას შეცვლი შენს ცხოვრებაშიო, არაფერს შევცლიდი, ერთი იმას შევცვლიდი, რომ უცხო ენებს ვისწავლიდი და უფრო მეტ განათლებას მივიღებდი. ენის გარეშე ვერ წარმოიდგენთ, რა რთულია ემიგრაციაში. მე აქ დამრჩენი არ ვარ. ხელისუფლების შეცვლას ვუცდი. ამ გადმოსახედიდან ოპოზიცია ძალიან სუსტია და ეს ხალხი ამ ხელისუფლების შემცვლელი არ არის, 2024-ში ისვე "ოცნება" გაიმარჯვებს. 61 წლის კაცი ვარ, ამოვიდა კისერში... სულ ოპოზიციაში ვიყავი.

თუ შევატყვე, რომ ქვეყანაში რაღაც იცვლება, სალომე ზურაბიშვილს ვთხოვ შეწყალებას, მაგრამ ძალიანაც არ მინდა. როდესაც შეწყალებას ითხოვ, გამოდის რომ აღიარებ დანაშაულს. ათობით ქალბატონია გარდაცვლილი და მოკლული იმ მამაკაცების მიერ, ვისაც ეს ქალები უჩიოდნენ და ისინი ვერ დაიცვა სახელმწიფომ. ასმათი კი ამ ფაქტის შემდეგ ქუთაისიდან თბილისში წამოიყვანეს და სახლი, სამსახური მისცეს. მეტი რანაირად უნდა ვთქვა, რომ ის არის მათი აგენტი, შეასრულა მათი დავალება. სახელმწიფოს არ დაუცვია ის ძალადობის მსხვერპლი ქალბატონები ისე, როგორც ასმათი დაიცვეს. აქედან კარგად ჩანს, მე როგორი მოძალადე ვიყავი...

საერთოდ ადამიანების დაჭერის მომხრე არ ვარ, მაინც ქუჩაში ვარ გაზრდილი, ქუთაისი და ამბავი, არც "ჩაშვების" მომხრე ვარ, მაგრამ "კაბუს" შემთხვევაში, როდესაც ჩემზე მეტად გამოხატული დანაშაული იყო, რასაც ჰყვებოდნენ ტელევიზორში, ის ერთი საათი არ მჯდარა ციხეში და მე ოთხი თვე "მომაჭყუნიეს". შემდეგ კი ოთხი წელი მომცეს და ემიგრაციაში გამაგდეს, შერჩევითი სამართლის მსხვერპლი მაინც ხომ ვარ?..

- ამ ქალბატონთან მორიგება ან დალაპარაკება არ გიცდიათ?

- არა, არა, არც მიცდია და არც ვეცდები. ხომ გეუბნებით, მისცეს სახლი თბილისში და სამსახური, ეს ყველაფერი ჩემს გაუბედურებაში. ამას ახლა როგორ და რაზე უნდა მოველაპარაკო. არც შურისძიება მინდა, კაცო, იშლიგინოს თავის გზაზე, როგორც უნდა. უბრალოდ, ყველას ვაფრთხილებ, თუ გადაეყაროთ, არ აჰყვეთ, მოგიწევთ ჩემი ბედის გაზიარება... არც მორიგება მინდა, არც დანახვა და არაფერი, მაგრამ საქართველოში დაბრუნება რომ მინდა, ფაქტია.

- მომხდარმა ძალიან დიდი ტკივილი მიაყენა თქვენს ოჯახს, ახლა როგორი ურთიერთობა გაქვთ მათთან?

- ყველაზე მეტად თუ ოდესმე შურისძიების სურვილი გამიჩნდება, ვინც ჩემს გაუბედურებაში მიიღო მონაწილეობა, იქნება ის ადამიანი, რომლის ბოროტ ტვინშიც მოიხარშა ის ამბავი და ჩემზე ფარული ჩანაწერები გამოაქვეყნა. სადაც არ ჩანს, რომ აგრესორი ვარ, პირიქით ვეუბნები, ბოდიში, მაპატიე, თუ რამე მივქარე და შევცდი, მეგობრებად დავრჩეთ - მეთქი... იქ ჩანს მხოლოდ ჩემი მიამიტობა, სიდებილე და რაღაც შეცდომა. სად ჩანს, რომ აგრესიულად ვექცევი ქალს. ამ ქვეყანაში უნდა შეწყდეს ამნაირი რაღაცების გამოქვეყნება.

გულდაწყვეტილი ვარ ზოგიერთი ჟურნალისტის, პოლიტიკოსის გამო, არ შეიძლებოდა ამ ჩანაწერის გავრცელება და არც გაშუქება. რა თქმა უნდა, ოჯახი გვერდში მიდგას, შემოევლოთ ჩემი თავი, მაგრამ ვატყობ, რომ ბოლომდე ვერ მპატიობენ სწორედ ამ კადრებს. შვილებიც კი ვერ მპატიობენ და სწორადაც ვერ მპატიობენ, ისინი მართლები არიან ჩემთან. თორემ ოჯახი მიდგას გვერდში, მაგრამ მაინც არ არის ის, რაც იყო.

- ბატონო გოგი, საქართველოში რომ დაბრუნდეთ, ალბათ, აეროპორტში დაგაპატიმრებენ...

- დიახ, ტრაპთან დამხვდება პოლიცია და ისე წამიყვანენ ციხეში, რომ ქუთაისსა და ოჯახსაც არ მანახებენ. ციხის არ მეშინია, იქ ოთხი თვე გავატარე და ორი თვის მერე შევეგუე. მიშას თუ ციხეში უსტვენდნენ, მე მეუბნებოდნენ, ჯიგარი ხარ გოგიო. კი არ ვტრაბახობ, მაგრამ ქუთაისში ვარ გაზრდილი, ქურდებსაც ვიცნობ, ძველ ბიჭებსაც და მომპარავებსაც. ციხეში კომფორტი მქონდა, ძალიან თბილად მექცეოდნენ ციხის თანამშრომლებიც.

მაგრამ მიმაჩნია, რომ ქვეყნისთვის, ოჯახისთვის და ჩემი თავისთვის, უფრო აქედან ვიქნები პროდუქტიული, ვიდრე ციხიდან. აქ უფრო მეტს გავაკეთებ, მაგრამ ღმერთმა აქ ნუ მომკლას, მანდ ცხოვრება მირჩევნია. რაც აქ ვარ, რამდენი ადამიანი გადამირჩენია, რამდენს დავხმარებივარ, ამნაირი სტილის ვარ, ვერ ვისვენებ...

- ბელგიაში თუ არ მოგცათ თავშესაფარი, რას აპირებთ?

- ევროპა დიდია, თან არ არის პრობლემა. თავშესაფარი თუ არ მოგცეს, გაგიჭირდება, მაგრამ არავინ გამოგაგდებს ქვეყნიდან, ქურდობაზე ან სხვა დანაშაულზე თუ არ დაგიჭირეს...