ქარიშხალი სიდნეიში: ქალაქის ბოტანიკურ ბაღში მეხის დაცემის შედეგად 4 ადამიანი დაშავდა, მოსახლეობას მოსალოდნელი წყალდიდობის შესახებ აფრთხილებენ

სიდნეის ბოტანიკურ ბაღში მეხის დაცემის შედეგად ოთხი ადამიანი დაშავდა. დაშავებულებს შორის ერთი არასრულწლოვანია. სასწრაფო დახმარების სპიკერმა თქვა, რომ მეხის დაცემის დროს ისინი ხის ქვეშ იდგნენ. შემთხვევა ორშაბათს, 12:45 საათზე მოხდა.

დაშავებულები არიან თინეიჯერი ბიჭი, 20 წლის ქალი, 30 წლის მამაკაცი და კიდევ ერთი ქალი, რომლის ასაკიც გარკვეული არ არის - ყველა მათგანი საავადმყოფოში გადაიყვანეს. მათი მდგომარეობა ამ დროისთვის სტაბილურია.

ჩრ. სიდნეიში, ქარიშხლის შედეგად, დაახლოებით 19 500 სახლს შეუწყდა ელექტროენერგიის მიწოდება. დაზარალებული გარეუბნებია ბალგოულა, მენლი, ტურამურა, ჰორნსბი და ტბა მაკუარის მიმდებარე ტერიტორია.

სახელმწიფო საგანგებო სამსახური (SES) მოსახლეობას მოსალოდნელი წყალდიდობის შესახებ აფრთხილებს. ამინდის გაუარესების გამო შეჩერებულია მატარებლის მოძრაობა, სიდნეის აეროპორტმა 30-ზე მეტი ფრენა გააუქმა.