პუტინის სისხლიან დიქტატურას ორჯერ გადარჩენილი ნავალნი საბოლოოდ ისევ მის მსხვერპლად იქცა - სამშობლოში დაბრუნების საბედისწერო გადაწყვეტილება და გზა კოლონია "პოლარულ მგლამდე"

რუსი დიქტატორის, ვლადიმერ პუტინის პოლიტიკის წინააღმდეგ ბრძოლა რუსეთში ხშირად აქტივისტების სიკვდილით მთავრდება. გაურკვეველ ვითარებაში გარდაცვლილი ჟურნალისტების, პოლიტიკოსების თუ საზოგადოებისთვის ცნობილი სხვა ადამიანების სია წლიდან წლამდე იზრდება.

მოსკოვში მოკლეს ბორის ნემცოვი, ანა პოლიტკოვსკაია, დიდ ბრიტანეთში მოწამლეს და შედეგად, მოკლეს ალექსანდრე ლიტვინენკო. საწამლავით სიკვდილს შემთხვევით გადაურჩნენ მამა-შვილი სერგეი და იულია სკრიპალები დიდ ბრიტანეთში.

ოპოზიციონერი ალექსეი ნავალნი სიკვდილს ორჯერ გადაურჩა...

სამწუხაროდ, 16 თებერვალს, დღის მეორე ნახევარში გავრცელდა სამწუხარო ინფორმაცია - რუსეთის ფედერალური სასჯელაღსრულების სამსახურის ცნობით, ნავალნი იამალის ნახევარკუნძულზე მდებარე კოლონიაში გარდაიცვალა. უწყების თანახმად, ნავალნი გასეირნების შემდეგ გახდა ცუდად და მყისიერად გონება დაკარგა. ადგილზე მისულმა სასწრაფო სამედიცინო დახმარების ექიმებმა პატიმრის გადარჩენა ვერ შეძლეს.

სიკვდილის მიზეზი ჯერ უცნობია, მაგრამ ფაქტია, რომ ის ამ სიკვდილამდე სწორედ კრემლის ავტორიტარულმა პოლიტიკამ მოიყვანა.

ნავალნი სრულიად აბსურდული ბრალდებებით, პოლიტიკური ნიშნით აღმოჩნდა ციხეში, თანაც ერთ-ერთ ურთულეს კოლონიაში იყო განწესებული.

რუსი ოპოზიციონერი სასჯელს გამოსასწორებელ კოლონია #2-ში იხდიდა, რომელსაც "პოლარულ მგელს“ და "ტროიკასაც“ უწოდებენ. კოლონია პოლარული წრის იქით მდებარეობს, იამალო-ნენეცკის ავტონომიურ ოლქში, დასახლებულ პუნქტ ხარპში. ის 1961 წელს გაიხსნა. კოლონია "წითელ ზონადაა“ ცნობილი, სადაც კრიმინალის გავლენა შეზღუდულია. აქ მთელი მეთოდოლოგია აქვთ, რომ პატიმარს წინააღმდეგობის გაწევის სურვილიც კი დაუკარგონ. ზამთარში იქ მინუს 40 გრადუსია და ათ წუთში შეიძლება იმ ქვეყნად წერილი წაიღო. ზაფხულში კი კოღოების არმიების შემოსევაა. ნავალნი ამ ზონაში ვოლოგდის კოლონიიდან გადაიყვანეს. ორივე ციხეში ნავალნის გამუდმებით აგზავნიდნენ ე.წ. საჯარიმო იზოლატორში, ერთკაციან საკანში, სადაც პირობები განსაკუთრებულად მკაცრია.

ალექსეი ნავალნის პოლიტიკური ბიოგრაფია წლების წინ დაიწყო და სახელი ანტიკორუფციული ფონდის დაარსებით გაითქვა.

მისი მთავარი მიზანი ვლადიმირ პუტინის შეცვლა გახლდათ.

• დასაწყისი

ალექსეი ნავალნი 1976 წლის 4 ივნისს, მოსკოვთან ახლოს, ბუტინში დაიბადა. ის განათლებით ეკონომისტი და იურისტი გახლდათ. რუსეთის ფედერაციაში დაამთავრა ორი უნივერსიტეტი. ასევე, განათლება მიიღო ამერიკაში ერთ-ერთ ყველაზე პრესტიჟულ იეილის უნივერსიტეტში. იყო წარმატებული ბლოგერი, მისი პოლიტიკური აქტივისტობაც სწორედ ინტერნეტში დაიწყო.

ოპოზიციონერის მთავარი სამოქმედო გეგმა დიდწილად კორუფციასთან ბრძოლისკენ იყო მიმართული.

მისი მშობლები რუსეთში ბიზნესს ფლობდნენ. წლების წინ მისმა მშობლებმა ქსოვილების ფაბრიკა დააარსეს, რაც მოგვიანებით წარმატებულ ბიზნესად იქცა.

მისი ძმა ოლეგ ნავალნია, რომელიც 2014 წელს რუსეთის სასამართლომ ფინანსურ თაღლითობაში დამნაშავედ ცნო და პატიმრობა მიუსაჯა. ამავე საქმეზე გაასამართლეს ალექსეი ნავალნიც, თუმცა მას პატიმრობა არ შეუფარდეს და პირობითი სასჯელი დაუწესეს. ძმებ ნავალნებს ბრალი თაღლითობაში ედებოდათ. კრემლის მიერ კონტროლირებული გამოძიების ვერსიით, ალექსეი ნავალნიმ, რომელმაც კერძო გადამზიდავი კომპანია გახსნა და ოლეგ ნავალნიმ, რომლის რუსეთის ფოსტაში მუშაობდა, კომპანია "ივ როშეს" და კიდევ ერთ კერძო კომპანიას, გზავნილებზე არარეალურად მაღალი ფასების დაწესების გზით, დაახლოებით 800 ათასი დოლარის ზარალი მიაყენეს, თუმცა, რუსულ გამოძიებას არავინ ენდობოდა და საქმეს თავად ნავალნიც პოლიტიკურ ზეწოლად აფასებდა.

ნავალნი პუტინის მიმართ წინააღმდეგობრივი ქმედებების გამო არაერთხელ დააკავეს.

• პოლიტიკური ცხოვრება

ნავალნი თავდაპირველად, მას მერე, რაც ცხოვრება პოლიტიკას დაუკავშირა, პატრია "იაბლოკოში" გაწევრდა. მალევე პარტიიდან წასვლა მოუწია. მიზეზი მისი ხისტი პოზიციები, განსხვავებული შეხედულებები და ქმედებები გახდა.

ის პარტიული საქმიანობის პარალელურად, აქტიურად იყო ჩართული "რუსული მარშის" ორგანიზებასა და საქმიანობაში, ასევე სათავეში ჩაუდგა განმათავისუფლებელ მოძრაობას.

"რუსული მარში" ყოველი წლის ნოემბერში რუსეთის რამდენიმე ქალაქში ეროვნული ერთობის დღეს მართავდა. ათასობით ადამიანს ერთი ლოზუნგი აერთიანებს - "ეს (რუსეთი) ჩვენი ქვეყანაა." ყველაზე მასშტაბური მარში რუსეთში 2006 წელს გაიმართა. ათასობით ადამიანი უკანონო იმიგრაციას აპროტესტებდა. მარში იმჟამინდელმა მერმა მალევე აკრძალა. ერთ-ერთი ვინც მოსკოვის მერს იური ლუჟკოვს ეწინააღმდეგებოდა ალექსეი ნავალნი იყო. ის ითხოვდა აქციებზე ნებართვის გაცემას სიტყვისა და გამოხატვის თავისუფლებიდან გამომდინარე.

ფართო საზოგადოების ყურადღების ცენტრში ალექსეი ნავალნი 2011 წელს მოექცა. მანამდე, მისი ცნობადობა რუსეთში 10 % -საც არ შეადგენდა. აქედან მოყოლებული კი მისი რეიტინგი იზრდებოდა, რასაც მნიშვნელოვნად შეუწყო ხელი კორუფციასთან ბრძოლამ. მისი საქმიანობიდან გამომდინარე, ნავალნის რეიტინგი მკვეთრად გაიზარდა დასავლეთშიც.

ნავალნი არ მალავდა, რომ მისი მთავარი მიზანი რუსეთში ხელისუფლების შეცვლა იყო, უფრო კონკრეტულად, პუტინის მმართველობის დასრულება და ქვეყანაში რეალური რეფორმების გატარება...

ის ფიქრობდა, რომ პოლიტიკაში უფრო მეტი ქალი უნდა მოსულიყო. ის ასევე მიიჩნევდა, რომ ქალებს და მამაკაცებს კანონით დაცული თანაბარი უფლებები უნდა ჰქონოდათ.

გარდა ამისა, ის სექსუალური უმცირესობების საკითხებზეც მუშაობს და მათი უფლებების დაცვას მოითხოვდა. ახალგაზრდა პოლიტიკოსის რეიტინგი განსაკუთრებით იზრდებოდა ახალი თაობის რუსებში, რაც მისთვის საბედისწერო აღმოჩნდა…

2013 წელს მან მოსკოვის მერობისთვის ბრძოლა წააგო. 2018 წელს ნავალნიმ "პოლიტიკური პარტია "მომავლის რუსეთი“ დააარსა. (2020 წლის 22 სექტემბერს - რუსეთის ფედერაციის უზენაესმა სასამართლომ აღნიშნულ პარტია გააუქმა). 2018 წლის საპრეზიდენტო არჩევნებზე, ნავალნის კანდიდატურა რუსეთის სასამართლომ დაბლოკა. მიზეზად "კრიმინალური“ წარსული დაასახელა..

• კორუფციასთან ბრძოლის ფონდი

2008 წელს ნავალნიმ ბლოგი შექმნა რუსეთში არასათანადო მოპყრობისა და კორუფციის შესახებ. როგორც უკვე აღვნიშნეთ, მისი პოპულარობის ზრდა უკავშირდება იმ პერიოდს, როდესაც მან "კორუფციასთან ბრძოლის ფონდი" დაარეგისტრირა და მის მუშაობას სათავეში ჩაუდგა. ეს კი 2011 წელს მოხდა...

ანტიკორუფციული ფონდის მთავარი სამიზნე, რუსეთის სახელმწიფო კომპანიები იყო. მიზნის მისაღწევად, მან მნიშვნელოვანი საგამოძიებო მოქმედებებიც ჩაატარა. ნავალნის მოღვაწეობაში დიდი როლი ითამაშა მის მიერ მომზადებულმა ფილმმა "ჩაიკა“, რომელიც დმიტრი მედვედევის, მასთან დაახლოებული პირების და რუსეთის მთავარი პროკურორის, იური ჩაიკას საქმიანობას უკავშირდებოდა.

“ყველა ამბობს, რომ კორუფციაა ყველგან. მაგრამ ჩემთვის უცნაურია: თუ ეს ვიცით და არ მოგვწონს და არ ვაგდებთ ამ ხელისუფლებას და დამნაშავეებს”, - ალექსეი ნავალნი.

ნავალნის გადაღებული ჰქონდა კიდევ არაერთი მნიშვნელოვანი დოკუმენტური ფილმი, რომლითაც ის ცდილობდა რუსებისთვის ეჩვენებინა, თუ როგორ იყენებენ ბოროტად სახელმწიფო თანამდებობებს მოხელეები და როგორ იპარავენ ფულს საზოგადოების ხარჯზე. ნავალნი ხშირად ეუბნებოდა თანამოქალაქეებს, რომ ძალაუფლება მხოლოდ მათ ხელში იყო და არა მთავრობებში.

კორუფციული ფონდის საქმიანობა კრემლისთვის რომ მიუღებელი იყო, წლების განმავლობაში ნათლად ჩანდა. ნავალნი არაერთხელ დააკავეს, კრემლის პროპაგანდისტული მანქანა მის წარმოდგენილ ფაქტებს ფაბრიკაციასა და სიცრუეს უწოდებდა.

კრემლმა ნავალნის მიერ დაფუძნებული ანტიკორუფციული ფონდი “უცხოელ აგენტად” შერაცხა და ფონდში არაერთი შემოწმება ჩაატარა.

მიუხედავად მისი მზარდი რეიტინგისა, როგორც უკვე ვთქვით, მან მოსკოვის მერობისთვის ბრძოლა წააგო. არჩევნები რომ გაყალბდა და დარღვევებით გაიმართა ამას ბევრი ფაქტი და საერთაშორისო კვლევა ადასტურებს. ეს თავად ნავალნიმაც თქვა და სამართლიანი არჩევნების მოთხოვნით რუსეთში მასშტაბური საპროტესტო აქციები გაიმართა. თუმცა, როგორც ყოველთვის, კრემლმა წინააღმდეგობა ვერ აიტანა, აქცია არასანქცირებულად გამოაცხადა და ასობით ადამიანი დააკავა.

“როდესაც არჩევნებში მონაწილეობის შანსს ვიღებთ, მე მზად ვარ ვიბრძოლო ბოლომდე და წამყვან პოზიციაზე, მათ შორის, მზად ვარ საპრეზიდენტო არჩევნებისთვის", - ამბობდა იმხანად ალექსეი ნავალნი.

მიუხედავად არაერთი მარცხისა, ნავალნი ბრძოლას განაგრძობდა...

• სასიცოცხლო საფრთხე

ნავალნი სიკვდილს ორჯერ გადაურჩა. ერთხელ, როგორც თავად ამბობდა, ციხეში ყოფნისას მოწამლეს, თუმცა მალევე გამოჯანმრთელდა. მას იმჟამად რუსმა ექიმებმა მწვავე ალერგიული რეაქციის დიაგნოზი დაუსვეს, მაგრამ რამ გამოიწვია ეს რეაქცია-დღემდე უცნობია.

2020 წლის 20 აგვისტო კი რუსი ოპოზიციონერი ციმბირის ქალაქ ომსკიდან, სადაც მან ოპოზიციის კანდიდატებთან ადგილობრივ არჩევნებამდე შეხვედრა გამართა, მოსკოვში მიფრინავდა, როდესაც მოულოდნელად შეუძლოდ გახდა. თვითმფრინავი ავარიულად, ომსკში დაეშვა. ალექსეი ნავალნი მოწამვლის სიმპტომებით რეანიმაციაში მოათავსეს.

2020 წლის 22 აგვისტო ომსკის საავადმყოფოს ექიმების წინააღმდეგობების მიუხედავად, კომაში მყოფი ალექსეი ნავალნი ბერლინში გადაიყვანეს და კლინიკა მოათავსეს.

2 სექტემბერს, გერმანიის მთავრობამ ოფიციალურ განცხადება გამოაქვეყნა, რომლის თანახმადაც - ნავალნი "ნოვიჩოკის“ ნერვული აგენტით იყო მოწამლული.

ეს არის პუტინის სასიკვდილო ხელწერა, თუმცა ის სულ სხვა რამეს ამტკიცებდა.

"რუსეთი დაინტერესებულია, ალექსეი ნავალნისთან დაკავშირებული ინციდენტის ყველა გარემოების მიუკერძოებელი და სრულყოფილი გამოძიებით“, - განაცხადა დიქტატორმა.

7 სექტემბერი ნავალნი კომიდან გამოვიდა

მას მერე, რაც ნავალნი ოთხთვიანი სარეაბილიტაციო კურსის შემდეგ ბერლინის კლინიკიდან გაწერეს, მან სამშობლოში დაბრუნების გადაწყვეტილება მიიღეო, რაც მისთვის საბედისწერო გამოდგა.

ის მოსკოვში 2021 წლის 17 იანვარს დაბრუნდა. ნავალნი აეროპორტშივე დააკავეს, მეორე დღეს კი სასამართლომ 30-დღიანი პატიმრობა შეუფარდა.

ალექსეი ნავალნის 2023 წლის აგვისტოში მოსკოვის სასამართლომ 19 წლით პატიმრობა მიუსაჯა.

• გაურკვეველ ვითარებაში გარდაცვლილი ექიმი

2021 წლის თებერვალში ცნობილი გახდა, რომ ომსკის საავადმყოფოს ანესთეზიოლოგიისა და რეანიმაციული განყოფილების უფროსი თერაპევტის მოადგილე, სერგეი მაქსიმიშინი რომელიც ალექსეი ნავალნის მოწამვლის შემდეგ მკურნალობდა, მოულოდნელად, 55 წლის ასაკში გარდაიცვალა. CNN - ის ინფორმაციით, ექიმის გარდაცვალების თაობაზე ინფორმაცია ომსკის საავადმყოფომ გაავრცელა, თუმცა გარდაცვალების მიზეზზე განცხადებაში ნათქვამი არაფერია. ნავალნის შტაბის ხელმძღვანელის ლეონიდ ვოლკოვის განცხადებით, გარდაცვლილი ექიმი ხელმძღვანელობდა ომსკში ყოფნისას ოპოზიციის ლიდერის მკურნალობას და ნავალნის მდგომარეობაზე ყველაზე მეტი იცოდა.

• ოჯახი

ნავალნის მეუღლე იულია და შვილები - დარია და ზახარი დარჩა. იულია ნავალნაია მოსკოვში ცნობილი ეკონომისტია, თუმცა ქმრის თანამოაზრე და მხარდამჭერი იყო მუდამ. მან ქმრის გარდაცვალების ამბავი მიუნხენის უსაფრთხოების კონფერენციაზე გაიგო.

"ალბათ თქვენ ყველამ ნახეთ დღეს მიმდინარე საშინელი ამბები. მეც ვფიქრობდი, აქ მოვსულიყავი თუ ეგრევე შვილებთან გავფრენილიყავი. მერე ვიფიქრე, თუ როგორ მოიქცეოდა ალექსეი ნავალნი და დარწმუნებული ვარ, რომ ის აქ იქნებოდა. ამ სცენაზე იდგებოდა. არ ვიცი, დავუჯერო თუ არა ამ საშინელ ამბებს, რომლებსაც მხოლოდ სახელმწიფო წყაროებიდან ვიღებთ. ყველამ იცით, რომ არ შეგვიძლია პუტინის მთავრობის გვჯეროდეს. ისინი სულ იტყუებიან.

მაგრამ ეს თუ სიმართლეა, მინდა, რომ პუტინმა და მთელმა მისმა გარემოცვამ, მისმა მეგობრებმა და მთავრობამ იცოდნენ, რომ პასუხს აგებენ იმისთვის, თუ რა უქნეს ჩვენს ქვეყანას, ჩემს ოჯახსა და ჩემს ქმარს. და ეს დღე მალე დადგება.

მინდა მთელ მსოფლიო საზოგადოებას მოვუწოდო, ყველას, ვინც ამ დარბაზში იმყოფება, ადამიანებს მთელ მსოფლიოში, რომ გაერთიანდნენ და ეს ბოროტება დაამარცხონ, დაამარცხონ რუსეთის საშინელი რეჟიმი. ამ რეჟიმმა და ვლადიმირ პუტინმა პასუხი უნდა აგონ ყველა საშინელებისთვის, რომელსაც ჩვენს ქვეყანას უკეთებენ ბოლო წლებში”, - განაცხადა ნავალნაიამ კონფერენციაზე გამოსვლისას.

იხილეთ ასევე:

• ნავალნის დედა: "არ მინდა სამძიმარი"

ვიდეო: ალექსეი ნავლანის უკანსკნელი კადრები

.