"სეირნობის შემდეგ თავი ცუდად იგრძნო და გონება დაკარგა" - რა დეტალები ხდება ცნობილი ნავალნის გარდაცვალებაზე და რას ამბობენ კრემლში?
რუსი ოპოზიციონერი პოლიტიკოსი ალექსეი ნავალნი 47 წლის ასაკში გარდაიცვალა. ინფორმაცია ფედერალური სასჯელაღსრულების სამსახურის ადგილობრივმა დეპარტამენტმა გაავრცელა. განცხადებაში ნათქვამია, რომ ნავალნი სეირნობის შემდეგ ცუდად გახდა და გონება დაკარგა.
- "2024 წლის 16 თებერვალს მე-3 გამოსასწორებელ კოლონიაში მსჯავრდებულმა ნავალნიმ სეირნობის შემდეგ თავი ცუდად იგრძნო და გონება დაკარგა. ადგილზე მივიდა სასწრაფო დახმარების ეკიპაჟი, თუმცა ექიმების ძალისხმევის მიუხედავად ნავალნის გადარჩენა ვერ მოხერხდა" - ნათქვამია განცხადებაში.
14 თებერვალს პოლიტიკოსის პრესმდივანმა, კირა იარმიშმა განაცხადა, რომ ნავალნი პატიმრობის პერიოდში ოცდამეშვიდედ გაგზავნეს სადამსჯელო საკანში.
- ოპოზიციონერი პოლიტიკოსის გარდაცვალების ზუსტი მიზეზი ჯერჯერობით ცნობილი არ არის. კრემლის სპიკერის, დიმიტრი პესკოვის თქმით, ვლადიმერ პუტინი მომხდარის შესახებ ინფორმირებულია.
"როგორც ჩვენთვის ცნობილია, ყველა ამჟამინდელი წესის შესაბამისად, FSIN არის ჩართული ყველა შემოწმებასა და დაზუსტებაში. ეს არ საჭიროებს რაიმე ინსტრუქციას, რადგან ამ მხრივ უკვე არსებობს წესების ნაკრები, რომლითაც FSIN ხელმძღვანელობს", - განაცხადა პესკოვმა.