"სანამ გიას გავყვებოდი ცოლად, უფროს შვილთან და რძალთან ერთად ვცხოვრობდი... ბევრს დაუსვამს კითხვა, რომ..." - ეკა არჩვაძე გია დავითიანთან 3-წლიან თანაცხოვრებასა და შვილებზე
მომღერალ გია დავითიანის და ექიმ ეკა არჩვაძის ქორწინების სამი წლისთავი თებერვალში შედგა. თავის დროზე ორივესთვის ეს დიდი სიყვარული გამოწვევა იყო. ქორწინებაზე არცერთი არ ფიქრობდა, მაგრამ გრძნობამ გაიმარჯვა. მას შემდეგ, რაც ეკას ცხოვრებაში გია გამოჩნდა, ყველაფერი შეიცვალა. ის ბედნიერია თავისი შვილებით, შვილიშვილებით და იმ ადამიანის გვერდით ყოფნით, რომლისგანაც ზრუნვით არის გარემოცული.
როგორია მათი ცხოვრება ქორწინებიდან 3 წლის თავზე, უფრო დაწვრილებით ეკა არჩვაძე ჟურნალ "სარკესთან" საუბრობს:
- ახლა ჩემს ცხოვრებაში ყველაზე მშვიდი პერიოდია. ყველაფერი სტაბილურად მიდის. ძალიან მაბედნიერებენ შვილიშვილები. რა თქმა უნდა, გიას ყურადღება არ აკლდება, მაგრამ შვილიშვილებთან ძალიან დიდ დროს ვატარებ და ეს მსიამოვნებს, ჩემს ცხოვრებაში ყველას თავისი ადგილი აქვს.
- თქვენ და გია დავითიანმა სამი წლის წინ შექმენით ოჯახი. რა არის მთავარი, რაც ამ მოვლენამ თქვენს ცხოვრებაში შემოიტანა?
- აუცილებელია ყველა ადამიანს გვერდით ჰყავდეს, პირველ რიგში, მეგობარი და საყვარელი ადამიანი. მეუღლე ჯერ მეგობარი უნდა იყო. როცა იცი, რომ შენზე ვიღაც ზრუნავს, ეს დიდი ბედნიერებაა. სიყვარული როცა მოდის, ფრთები გესხმევა. ძალიან ვუფრთხილდები ამ გრძნობას, რა გრძნობითაც ოჯახი შევქმენი. დღემდე ვანებივრებთ ერთმანეთს სიურპრიზებით. ერთმანეთის სიყვარული გვაქვს ყოველი წუთით და წამით. სულ ერთმანეთის გვერდით ვართ.
- ახალგაზრდულ წრეებში ადამიანები ამ გრძნობას თითქოს ნაკლებად აფასებენ, ნაკლებად უფრთხილდებიან. მოწიფულ ასაკში სიყვარულს სხვა ფასი აქვს?
- ნამდვილად, დავრწმუნდი, რომ ასაკში უფრო საჭიროა სიყვარული. როგორც აღვნიშნე, ძალიან ვუფრთხილდები ამ გრძნობას.
- დიდ დროს უთმობდით შვილების აღზრდას. როგორ ახერხებდით პროფესიაშიც წარმატებული ყოფილიყავით?
- რა თქმა უნდა, შვილებმა დიდი დრო წაიღეს. შეიძლება ჩემს პროფესიაში უფრო მეტი გამეკეთებინა, მაგრამ არ ვნანობ, რადგან ეს ჩემი არჩევანი იყო. მშობლებიც გვერდში მედგნენ, რომ ჩემი საქმე მეკეთებინა. შვილების ცხოვრებაში აქტიურად ჩართვის გამო, კარიერაში რაღაცები გამოვტოვე, რაღაც შანსები არ გამოვიყენე, მაგრამ ერთი წუთი არ ვნანობ. ბედნიერი ვარ, რომ ასეთი შვილები მყავს.
- რა როლი შეასრულეთ თქვენი შვილების ცხოვრების იმ ეტაპზე, როცა ოჯახი შექმნეს?
- ამ საკითხს ძალიან მარტივად მივუდექი. ყველა დედას უნდა, მისი შვილის გვერდით იდგეს ღირსეული ადამიანი. ვერც კი წარმომედგინა, რომ ჩემს შვილებს ვინმე ისეთი შეუყვარდებოდათ, რომელიც ჩვენი ოჯახისთვის შეუფერებელი იქნებოდა. ამიტომ არავითარი პრეტენზია არ მქონია. არაფერში ავრეულვარ. ორივემ ლამაზი ოჯახი შექმნა.
- დედობრივმა ეგოიზმმა არცერთ ეტაპზე არ იჩინა თავი?
- არა. არანაირი ეგოიზმი! შვილიშვილზეც აღვნიშნე, რომ პირველი გოგო მინდოდა და ამიტომ როდესაც პირველი რძალი შემოვიდა ოჯახში, ეს ჩემთვის დიდი ბედნიერება იყო. ყველა დედას უნდა ჰყავდეს გოგო შვილიც, არც ერთ ეტაპზე არ მქონია დედობრივი ეგოიზმი. ყოველთვის მინდოდა ბედნიერები ყოფილიყვნენ. სანამ გიას გავყვებოდი ცოლად, უფროს შვილთან და რძალთან ერთად ვცხოვრობდი. ბევრს დაუსვამს კითხვა, რა ჯობია ცალკე იცხოვროს წყვილმა თუ დიდ ოჯახთან ერთადო. ეს საკითხი დღემდე ჩემთვის ამოუხსნელია. თუმცა რამდენიმე წელი თავიდან კარგია, როცა დიდი ოჯახი ერთად ცხოვრობს, რომ ოჯახის ტრადიცია გაითავისონ.
- თქვენ რა ტრადიცია გაითავისეთ, როცა გიას ოჯახში შეხვედით?
- ჩვენი აზრები, შეხედულებები, ტრადიციები უმეტესად დაემთხვა ერთმანეთს, სტუმარი ორივეს გვიყვარს და ჩვენი ოჯახის კარი ყოველთვის ღიაა. გიას ისეთი ხასიათი აქვს, რაც არ უნდა უთხრა, ყველაფერზე თანხმდება. ძალიან უყვარს ბროწეულაში ყოფნა. რა თქმა უნდა, იქ ზაფხულში დიდ დროს ვატარებთ, ვიდრე ზამთარში. ერთი კვირა თუ გავა და ბროწეულაში არ წავედით, გიას იქაურობა ენატრება. ძალიან გვიყვარს მოგზაურობა. არა მარტო საზღვარგარეთ, საქართველოს ფარგლებშიც ბევრს დავდივარ.
- ჩანს, რომ 3 წლის წინ, როცა ოჯახის შექმნის გადაწყვეტილება მიიღეთ, თქვენს ცხოვრებაში ყველაფერი უკეთესობისკენ შეიცვალა...
- ბუნებით ვარ ისეთი, რომ ყოველთვის ვცდილობდი ბედნიერი და ლაღი ვყოფილიყავი. ჩემს ცხოვრებაში გამოჩნდა ადამიანი, რომელიც კიდევ უფრო მაბედნიერებს და ბედნიერ წუთებს მჩუქნის. შეუდარებელი გრძნობაა. როცა გვერდით გყავს ადამიანი, რომელიც სულ შენზე ფიქრობს. 25 წელია მსგავსი შეგრძნება არ მქონია...წყარო
წაიკითხეთ ასევე: