ოკუპირებულ აფხაზეთში შესაძლოა, საზოგადოებრივი წესრიგი და უსაფრთხოება "როსგვარდიამ" დაიცვას - რა წერია ადგილობრივი გამოცემის მიერ მოპოვებულ დოკუმენტში?

ოკუპირებული აფხაზეთის ე.წ. შს სამინისტრომ შესაძლოა, შეთანხმება გააფორმოს რუსეთის ფედერაციის ეროვნული გვარდიის ფედერალურ სამსახურთან ("როსგვარდია"). შეთანხმების პროექტის შესახებ ინფორმაციას ავრცელებს აფხაზური გამოცემა Нужная газета.

გამოცემის მიერ მოპოვებული დოკუმენტის მიხედვით ირკვევა, მხარეები ითანამშრომლებენ შემდეგ სფეროებში - საზოგადოებრივი წესრიგის დაცვა და საზოგადოებრივი უსაფრთხოების უზრუნველყოფა, ტერორიზმთან და ექსტრემიზმთან ბრძოლა, სახელმწიფო კონტროლი იარაღის მიმოქცევასა და კერძო უსაფრთხოების სფეროში. კერძო დეტექტიური საქმიანობა, ფიზიკური და იურიდიული პირების საკუთრების დაცვა, დანაშაულის წინააღმდეგ ძალისმიერი მხარდაჭერის ღონისძიებების უზრუნველყოფა, სპორტული და კულტურული კავშირების განვითარება.

აფხაზეთის ე.წ. ხელისუფლება გავრცელებულ ინფორმაციაზე ამ დრომდე კომენტარს არ აკეთებს.

აღსანიშნავია, რომ ამ ინფორმაციის გავრცელებამდე ცოტა ხნით ადრე ცნობილი გახდა, რომ მოსკოვის, სოხუმის და ცხინვალის "ძალოვანი სტრუქტურების" წარმომადგენლები 10 თებერვალს, რიწის ტბის მიმდებარედ ანტიტერორისტულ წვრთნებს გამართავენ. ამის შესახებ აფხაზეთის ე.წ. შს მინისტრმა რობერტ კიუტმა განაცხადა.

ცნობისთვის, "როსგვარდიის" ამოცანას რუსეთის ხელისუფლება სახელმწიფო და საზოგადოებრივი უსაფრთხოების უზრუნველყოფას უწოდებს. აღსანიშნავია, რომ უკრაინის ომში "როსგვარდიის" დანაყოფებიც მონაწილეობენ.

2023 წლის ზაფხულში, რუსეთის სახელმწიფო დუმამ მიიღო კანონპროექტი, რომელიც "როსგვარდიას" აძლევს უფლებას, ჰქონდეს მძიმე სამხედრო ტექნიკა.

ავტორი: ანრი კურტანიძე