“მეწყრული პროცესი დაიწყო გურამიშვილის ქუჩაზე, რომელსაც ტყის მასივი აკრავს, მაღლობი ადგილია და იქიდან დაიძრა მიწის მასა" - რა ხდება ამჟამად სურამში?
ბაღდათის შემდეგ, ქვეყანაში მეწყრის საშიშროება კიდევ ერთ ადგილას გაჩნდა. 7 თებერვალს ხალხის ნაწილი ევაკუაცია დაიწყო დაბა სურამში, სადაც ინტენსიური და უხვი ნალექის შედეგად, მეწყრული პროცესებია დაწყებული. გვიან ღამით ზინდისის დასახლებაში მთას მიწის მასა მოწყდა და დასახლებამდე ჩამოვიდა. გურამიშვილის ქუჩის მოსახლეობა ევაკუირებულია, ხოლო ადგილზე მობილიზებულია საგანგებო ისტუაციების სამსახურის სამაშველო ჯგუფი, მოსახლეობა ადგილზე ჩასული გეოლოგების დასკვნას ელოდება.
ambebi.ge სურამის მკვიდრსა და ადგილობრივი გაზეთის "ხაშურის მოამბე“-ს რედაქტორს გოგი გოგოლაძეს დაუკავშირდა.
“მეწყრული პროცესი გურამიშვილის ქუჩაზე, სურამის ერთ-ერთ უბან ზინდისში დაიწყო. ამ ქუჩას ტყის მასივი აკრავს, მაღლობი ადგილია და იქიდან დაიძრა მიწის მასა. აქ მეწყრული პროცესები ჯერ კიდევ 2007 წელს დაიწყო, მაშინაც გამოსახლებაზე იყო ლაპარაკი. იმჟამად რთული მდგომარეობა შეიქნა, მეწყრის შედეგად რამდენიმე სახლი დაინგრა, რაღაც პრევენციული ზომებიც მიიღეს და ეს პროცესი შეჩერდა. იმხანად იმაზეც იყო საუბარი, რომ ზინდისის მოსახლეობას სოფელ ცხრამუხაში აეშენებინა სახლები. ვინაიდან პროცესი შეჩერდა, ხალხმა სახლები აღარ დატოვა.
მთელი ამ წლების განმავლობაში მეწყერს თავი არ შეუხსენებია, ახლა ამის მაპროვოცირებელი სამდღიანი ინტენსიური წვიმა გახდა, გურამიშვილის ქუჩაზე ერთ მონაკვეთში მოწყდა მიწა და ამ წუთებში დაახლოებით 40 ოჯახს აქვს საშიშროება. ჯვარი წერიათ, მაგრამ ღრმა პროცესი თუ წავიდა, მაშინ ამ 40-ის გარდა, კიდევ ბევრი ოჯახი დაზარალდება. წუხელ ჩამოვიდა გეოლოგი, მაგრამ გვიანი იყო, ბნელოდა, ძნელი იყო რამის თქმა. ახლაც ელოდებიან რამდენიმეს და ალბათ რაღაც დასკვნას წინასწარ დადებენ.
ამ ეტაპზე 10 ოჯახი სასტუმროშია გადაყვანილი, 40 ოჯახი ახლობლებთან გადავიდა, სახლები დაცარიელდა და მთელი უბანი პასუხს ელოდება, არის თუ არა საფრთხის შემცველი იქ ცხოვრება.
მეწყრული პროცესი უხვმა ნალექმა გამოიწვია - როგორც სპეციალისტები ამბობენ, დაახლოებით 3 თვის ნალექი ერთ დღეში მოვიდა. საოცარია, კლიმატური ცვლილება სურამს რომ შეეხო, მგონი, ისე არავის.
ამ დროს გასულ წლებში ორმეტრიანი თოვლი იდო ხოლმე სურამში, ახლა მარტო წვიმს, საოცრება ხდება... წვიმასაც გააჩნია, თავსხმა, კოკისპირული, მოდის და მოდის. გარდა ამისა, ამ ეტაპზე ნახევარი ხაშურია დატბორილი, თითქოს პატარა მდინარე ამ წვიმებზე გაგიჟდა, ადიდდა და გადმოვიდა, 200 ოჯახი მაინც დაიტბორა. მოკლედ, ყველა მხრიდან გვიტევს სტიქია.
იხილეთ ასევე: