"არ გვაინტერესებს სალომე ზურაბიშვილი მოაწერს თუ არა ხელს პრემიერის დანიშვნას, რადგან ამ პოზიციაზე ირაკლი კობახიძის დანიშვნა ძალაში მაინც შევა" - გივი მიქანაძე
სიმართლე გითხრათ, არც გვაინტერესებს სალომე ზურაბიშვილი მოაწერს თუ არა ხელს პრემიერ-მინისტრის დანიშვნას, რადგან პრემიერის პოზიციაზე ირაკლი კობახიძის დანიშვნა მაინც ძალაში შევა, - ამის შესახებ „ქართული ოცნების“ დეპუტატმა, გივი მიქანაძემ ჟურნალისტებთან საუბრისას განაცხადა.
მისივე თქმით, კონსტიტუციის შესაბამისი მუხლის მიხედვით, არ აქვს მნიშვნელობა, პრეზიდენტი მოაწერს თუ არა პრემიერ-მინისტრის დანიშვნას ხელს, რადგან პრემიერის პოზიციაზე ირაკლი კობახიძის დანიშვნა ძალაში მაინც შევა.
მან ასევე პრეზიდენტის ინიციატივაზე „ერთობის პლატფორმა ევროპისთვის“ ისაუბრა და აღნიშნა, რომ „ის ადამიანები, რომელთანაც მან უკვე დაიწყო აქტიური კონსულტაცია ვერანაირად ვერ იქნება აღქმული საზოგადოებაში, როგორც ნეიტრალური ძალა”.
„ჩვენ თვეების განმავლობაში ვსაუბრობთ, რომ სალომე ზურაბიშვილი ემზადება, ფაქტობრივად, რომ რაღაც პერიოდის შემდეგ გადადგეს და შეუერთდეს ერთ-ერთ ბანაკს, რომელსაც ახლა თვითონ საორგანიზაციო შტაბივით აორგანიზებს და სურს, რომ რაღაც დამოუკიდებელ მოთამაშედ, ახალ ძალას წარმოაჩინოს ეს, თუმცა მისივე ნარატივი და მისივე საქმიანობა ცხადყოფს, თუ ვის ინტერესებს გამოხატავს ის. ის ადამიანები, რომელთანაც მან უკვე დაიწყო აქტიური კონსულტაცია ვერანაირად ვერ იქნება აღქმული საზოგადოებაში, როგორც ნეიტრალური ძალა. ეს არიან ადამიანები, რომლებიც უშუალოდ „ნაცმოძრაობის“ წარმომადგენლები არიან. შესაბამისად, ასეთი ადამიანისგან საერთოდ არ არის ინტერესი იმის შესახებ, ის ხელს მოაწერს თუ არა ირაკლი კობახიძის კაბინეტს”, - განაცხადა მიქანაძემ.