რას ამბობს შს მინისტრი ზედოზირებით გარდაცვალების ფაქტებთან დაკავშირებით?
ყოველწლიურად ზედოზირებით გარდაცვალების ფაქტები 30-დან 40-მდე მერყეობს - ნარკოპოლიტიკის მიმართულებით მხოლოდ გამკაცრება არ შველის, კომპლექსურადაა სამუშაო და მხოლოდ ის, რომ გავამკაცრებთ და პრობლემა დასრულდება, ასე არ ვთვლი, - ამის შესახებ შინაგან საქმეთა მინისტრობის კანდიდატმა ვახტანგ გომელაურმა პარლამენტში საპროცედურო საკითხთა და წესების, ადამიანის უფლებათა დაცვისა და სამოქალაქო ინტეგრაციის, თავდაცვისა და უშიშროების და იურიდიულ საკითხთა კომიტეტების ერთობლივ სხდომაზე დეპუტატების შესაბამისი კითხვის საპასუხოდ განაცხადა.
გარდა ამისა, ბოლო პერიოდში ნარკოტიკების გადამეტებული დოზით მოზარდის გარდაცვალების ფაქტზე გომელაურმა განაცხადა, რომ პირველად არ მომხდარა და „ეს არ არის იშვიათი“.
"სამწუხაროდ. 30-დან 40-ის ფარგლებში მერყეობს ყოველწლიურად ზედოზირებით გარდაცვალების ფაქტები. ეს მსოფლიო პრობლემაა. ყველაფერს ვაკეთებთ, რომ ეს პრობლემა აღმოვფხვრათ. იცით, რომ ნარკომოვაჭრეების დაკავების ფაქტები მაღალი გვქონდა. 2023 წელს 284 პირი დავაკავეთ ნარკოტიკებით ვაჭრობაზე. წინა წლებში იყო 70, 30, 20. 2022 წელს კი იყო 202. ამდენი ნარკომოვაჭრე არცერთ წელიწადს არ დაკავებულა საქართველოში.
მესმის, რომ რაღაც ღონისძიებებია გასატარებელი. ამერიკის შეერთებული შტატების სხვადასხვა შტატში ან ევროპის ქვეყნებში 10-ჯერ მეტი ადამიანი იღუპება, ვიდრე საქართველოში, თუმცა ეს არ ნიშნავს, რომ რადგან იქ იღუპება, ჩვენთანაც უნდა დაიღუპოს. ალბათ, ერთობლივად სამუშაო იქნება, ალბათ, უფრო კომპლექსური და არა მხოლოდ შინაგან საქმეთა სამინისტროსი. რაც შეეხება კითხვას ნარკოტიკებზე ტრანზიტული კუთხით, ტრანზიტული ქვეყანა ვართ და სამწუხაროდ, შემოდის, ყველაფერს ვაკეთებთ საბაჟოსთან ერთად, თუმცა ბოლომდე 100%-იან გადახურვას ვერ მოვახერხებთ“, - განაცხადა ვახტანგ გომელაურმა.