"ესეც ღვთის ამბავია, რომ ბარბარობას დაიბადა და ნინოობას მოვნათლეთ" - რას ამბობს მამა საბა მარიტა მეფარიშვილის დაზე, რომელიც ტრაგედიის შემდეგ დაიბადა?
მეფარიშვილების ოჯახში ბარბარობას მესამე გოგონა ტატა დაიბადა. ამ ოჯახის ტრაგედიამ 2022 წლის 13 ოქტომბერს მთელი საქართველო შეძრა. 13 წლის გოგონას, მარიტა მეფარიშვილის სიცოცხლე, ვაკის პარკში არასწორად დამონტაჟებულმა შადრევანმა იმსხვერპლა.
გოგონა დედა, ანა შოშიაშვილი სოციალური ქსელში ფოტოებს ავრცელებს, საიდანაც ჩანს, რომ მარიტას უმცროსი და შეეძინა, რომელიც პატრიარქმა და სასულიერო პირებმა მონათლეს.
"ტატა ნუცას და მარიტას და მადლობა ჩვენს მამებს, ტატას ნათლიებს, ილია მეორეს, მამა შალვა, მამა საბა ასეთი სიყვარულისთვის. მადლობა მამა Grigol Xunwaria ტატას გაქრისტიანებისთვის" - დაწერა მარიტას დედამ სოციალურ ქსელში.
- შეგახსენებთ, რომ ოჯახში ყოველი მესამე და შემდეგი შვილის ნათლია პატრიარქია, ხოლო, ახალი წესის მიხედვით, ოჯახს მხოლოდ ორი ნათლიის შერჩევა შეუძლია. მეფარიშვილების ოჯახმა არჩევანი სასულიერო პირებზე, მამა შალვა კეკელიაზე და მამა საბა ჭიკაიძეზე გააკეთა.
როგორც მამა საბამ Ambebi.ge-სთან საუბარში აღნიშნა, ოჯახს ტრაგიკული მოვლენის შემდეგ დაუახლოვდა.
- ოჯახს მარიტაზე კიდევ ერთი წლით უფროსი გოგონა ჰყავთ, ტატა მესამე შვილია. მხოლოდ სასულიერო პირებმა მოვნათლეთ, პატრიარქი, მე და მამა შალვა ვიყავით ნათლიები. ოჯახს მანამდე არ ვიცნობდი, არც მამა შალვა, ვიცნობდი მარიტას კლასელებს და მათ მშობლებს. როდესაც ეს მძიმე ამბავი მოხდა, ერთ-ერთი მშობელი დამიკავშირდა და მითხრა, რაც მოხდა. მაშინ ჯერ კიდევ მარიტა ცოცხალი იყო და საავადმყოფოში იყო გადაყვანილი. მშობელმა მითხრა, ბავშვები გვინდა მოვიყვანოთ თქვენთან, ძალიან დაზაფრულები არიანო.
მე არ მეცალა მაშინ, მამა შალვას დავუკავშირდი, ის დახვდათ, პარაკლისი გადაუხადა მარიტას, ყურადღებით მოეპყრო ბავშვებსაც. მე სამშობიაროში ვიყავი, ჩემი გოგონა მყავდა მიყვანილი. შემდეგ გავიგე, რომ გოგონა გარდაიცვალა. გამოვიქეცი იმ დღესვე, საღამოს, ოჯახს სახლში ვესტუმრეთ მე და მამა შალვა, ახლოს ცხოვრობენ ჩვენ ეკლესიასთან.
იმ დღის შემდეგ დაიწყო ჩვენი ურთიერთობა. მივედით, ვანუგეშეთ, ვესაუბრეთ, პანაშვიდი გადავუხადეთ მარიტას, მერე დაკრძალვაზეც, ყველგან ერთად ვიყავით. მერე ჩვენთან დაიწყეს ტაძარში სიარული, ღვთის მადლით, ეკლესიური მორწმუნეები გახდნენ, ანა განსაკუთრებულად. დღესდღეობით ძალიან ახლოს ვართ ოჯახთან.
- ტატა როდის დაიბადა?
- 17 დეკემბერს დაიბადა, ბარბარობას, მეორმოცე დღეს, ნათლობამ ნინოობას მოუწია, ესეც ღვთის ამბავი იყო. 27 იანვარს მოვნათლეთ.
ნახეთ ასევე: