"ზალუჟნისა და ზელენსკის შორის შეხვედრა შედგა და პრეზიდენტმა მას პოსტის დატოვება შესთავაზა" - რა უპასუხა ზალუჟნიმ და რა კულუარულ ინფორმაციას ავრცელებს მედია
უკვე დიდი ხანია მედია უკრაინის პრეზიდენტ ვოლოდიმირ ზელენსკისა და უკრაინის შეიარაღებული ძალების მთავარსარდალ ვალერი ზალუჟნის შორის დაძაბულ ურთიერთობაზე წერს.
გუშინ, 29 იანვრის საღამოს,"ტელეგრამში", უკრაინულ არხებზე გავრცელდა ინფორმაცია, რომ ზელენსკიმ ზალუჟნი თანამდებობიდან გაათავისუფლა. მოგვიანებით კი წერდნენ, რომ ზელენსკი ბრიფინგს გამართავდა და ზალუჟნის გათავისუფლების შესახებ ოფიციალურად განაცხადებდა. უკრაინის პრეზიდენტმა მართლაც გამართა ბრიფინგი, თუმცა ზალუჟნის შესახებ არაფერი უთქვამს.
- დღეს კი, უკრაინულ მედიაში ვრცელდება ინფორმაცია, რომ გუშინ ზელენსკისა და ზალუჟნის შორის შეხვედრა გაიმართა, რა დროსაც პრეზიდენტმა შეაიარაღებული ძალების მთავარსარდალს პოსტიდან წასვლა შესთავაზა. აღნიშნულის შესახებ უკრაინული ყოველკვირეული გაზეთი "Зеркало недели" წერს.
გამოცემის ცნობით, ინფორმაცია მიაწოდეს წყაროებმა როგორც პრეზიდენტის ოფისიდან, ასევე ზალუჟნის ახლო გარემოცვიდან.
"შეხვედრა 29 იანვარს შედგა და ზელენსკიმ ზალუჟნის მთავარსარდლის პოსტის დატოვება შესთავაზა. საპასუხოდ ზალუჟნიმ განაცხადა, რომ "უმაღლესი მთავარსარდლის (პრეზიდენტის) უფლებაა, გადაწყვიტოს, ვისთან იმუშაოს“, - ვკითხულობთ სტატიაში.
წყაროს ცნობით, ზალუჟნი გადადგომის შესახებ განცხადებას თავად არ აპირებდა. პრეზიდენტის ბრძანებულებით მთავარსარდლის თანამდებობიდან გადაყენებისთვის კი საჭიროა თავდაცვის მინისტრის შესაბამისი წარდგინება.
ჟურნალისტებმა ასევე ჰკითხეს წყაროს, შესთავაზეს თუ არა ზალუჟნის სხვა თანამდებობა იმ შემთხვევისთვის, თუ გადადგებოდა, რაზეც ასეთი პასუხი მიიღეს - "არსებითი არაფერი შეუთავაზებიათ".
- აღსანიშნავია, რომ Украинская правда წყაროებზე დაყრდნობით რამდენიმე კვირის წინ წერდა, რომ ზელენსკი უკრაინის შეიარაღებული ძალების ზოგიერთ მეთაურთან ზალუჟნის გვერდის ავლით საუბრობს. ეს სიტუაცია კი ზალუჟნის ხელს უშლის, რომ მთლიანი ჯარი ორგანიზებულად მართოს.
ავტორი: ანრი კურტანიძე
ნახეთ ასევე: