სოცქსელებში გავრცელდა ტეილორ სვიფტის AI - ის მიერ გენერირებული, ყალბი, პორნო შინაარსის ფოტოები - რა რისკების წინაშე აყენებს Deepfake თანამედროვე სამყაროს?

Deepfakes - გაყალბებული ფოტო და ვიდეო, ანუ ხელოვნური ინტელექტის მიერ შექმნილი ადამიანის გარეგნობის, სხეულის მოძრაობის, ლაპარაკის მანერისა და მიმიკის მიმბაძველი ტექნოლოგიაა, რომლის გამოყენებაც უკვე ნებისმიერს შეუძლია.

ექსპერტები და აქტივისტები უკვე დიდი ხანია მსოფლიო საზოგადოებას აფრთხილებენ Deepfakes - თან დაკავშირებულ რისკებსა და საფრთხეებზე.

ამის ერთ-ერთი პირველი მსხვერპლი მსახიობი ემა უოტსონი გახდა, რომლის გაყალბებული ვიდეოები სხვადასხვა პორნოსაიტზე გავრცელდა.

ამჯერად მის მსხვერპლად ცნობილი ამერიკელი მომღერალი ტეილორ სვიფტი იქცა.

AI-ის (ხელოვნური ინტელექტის) გამოყენებით გაყალბებული, პოპ ვარსკვლავის პორნო ფოტოები თავდაპირველად საეჭვო ვებსაიტზე "Celeb Jihad"-ზე გამოჩნდა. შემდეგ კი გავრცელდა X-ზე (ყოფილი Twitter), ასევე Reddit-ზე, Facebook-ზე, Instagram-სა და სოციალურ მედიის სხვა საიტებზე. ერთ-ერთი ფოტო 47 მილიონმა ადამიანმა ნახა ონლაინპლატფორმა X-ზე. ამერიკული მედიის ცნობით, ყალბი ფოტო ინტერნეტში დაახლოებით 17 საათის განმავლობაში იყო, შემდეგ კი, პლატფორმის გამოყენების წესების დარღვევის გამო, ქსელიდან წაშალეს.

ხელოვნური ინტელექტის დახმარებით შექმნილმა ყალბმა, შიშველმა ფოტოებმა პოპ ვარსკვლავის თაყვანისმცემლებისა და ამერიკელი პოლიტიკოსების აღშფოთება გამოიწვია. ეს შემთხვევა კიდევ ერთხელ აჩვენებს ხელოვნური ინტელექტის ბოროტად გამოყენების საფრთხეებს.

"იმაში, რაც დაემართა ტეილორ სვიფტს, ახალი არაფერია“, - თქვა დემოკრატმა კონგრესმენმა ნიუ-იორკიდან ივეტ კლარკმა. ის იბრძვის კანონისთვის, რომელიც ეწინააღმდეგება Deepfake-ს, მონტაჟით გაკეთებულ ყალბ ფოტო და ვიდეო მასალას.

"წლებია, ქალები ხდებიან "დიფფეიქის" სამიზნე და მსხვერპლი. ხელოვნური ინტელექტის მიღწევებით, გაყალბება უფრო ადვილი და იაფი ხდება", - დასძინა მან.

• Deepfakes-ის წინააღმდეგ რეგულაციას ითხოვენ

დასავლელი აქტივისტები და მარეგულირებლები შიშობენ, რომ ადვილად გამოსაყენებელი AI ინსტრუმენტებმა შეიძლება გამოიწვიოს ყალბი და მავნე შინაარსის მასალის უკონტროლო და მასობრივი გავრცელება.

ამერიკელმა კონგრესმენმა რესპუბლიკური პარტიიდან, ტომ კინმა განაცხადა, რომ ხელოვნური ინტელექტის ტექნოლოგია უფრო სწრაფად ვითარდება, ვიდრე მისი რეგულაცია.

"მსხვერპლი ტეილორ სვიფტია თუ სხვა რიგითი ახალგაზრდა ჩვენს ქვეყანაში, ამას არ აქვს მნიშვნელობა, ეს ყველაფერი აჩვენებს, რომ ჩვენ უნდა მივიღოთ უსაფრთხოების ზომები ამ საგანგაშო ტენდენციასთან საბრძოლველად“, - თქვა მან.

წამყვანი ექსპერტები ხელოვნური ინტელექტის რისკების შესახებ უკვე დიდი ხანია ლაპარაკობენ. ისინი აფასებენ მისგან მომავალ საფრთხეს ისევე, როგორც პანდემიის ან ბირთვული ომის საფრთხეებს.