სკანდალური სასიყვარულო ურთიერთობები, ორი ქორწინება და... - ქართველი ლამაზმანის ვარსკვლავური ცხოვრება და შეცვლილი იმიჯი: რატომ იყო მიმი შელია სკოლაში ბულინგის მსხვერპლი

11:33 / 28-01-2024

ქართული წარმოშობის რუსეთში მცხოვრები მოდელი და ინფლუენსერი მირანდა შელია რუსული მედიის ყურადღების ცენტრში წლების წინ მოექცა. გოგონა რუს ფეხბურთელ ფიოდორ სმოლოვის შეყვარებული იყო. წყვილის დაშორების შემდეგაც კი, მან პოპულარობა შეინარჩუნა და ახლა "ინსტაგრამზე" 1 მილიონი გამომწერი ჰყავს, რომლებიც ინტერესით ადევნებენ თვალს მის კარიერასა და პირად ცხოვრებას.

ბავშვობა

მირანდა შელია 1992 წლის 20 სექტემბერს დონის როსტოვში დაიბადა, ის ეროვნებით ქართველია. მშობიარობის შემდეგ, დედა ცუდად გახდა და თავიდან სიარულიც კი არ შეეძლო, ამიტომ გოგონას ერთ წლამდე ბებია ზრდიდა.

როდესაც დედა გამოჯანმრთელდა, ოჯახი საცხოვრებლად მოსკოვში გადავიდა. მოგვიანებით მოდელმა აღიარა, რომ რუსეთის დედაქალაქი შეუყვარდა, მაგრამ ზამთარში, სიცივის გამო, საზღვარგარეთ ყოფნა ურჩევნია.

მირანდა ოჯახში ერთადერთი შვილია. მოგვიანებით იხსენებდა როგორ დაიწყო ტირილი, როდესაც დედამ ხუმრობით უთხრა, რომ მალე ოჯახში ახალი წევრი ეყოლებოდათ. წლების შემდეგ თავად უნდოდა, რომ და-ძმა ჰყოლოდა.

თვლის, რომ რთული ბავშვი იყო. ძალიან ცელქი და მეთვალყურეობის გარეშე დარჩენილს აბების გადაყლაპვაც კი შეეძლო. სკოლის წლებში კი შელიას ეთნიკური ნიშნით კონფლიქტი ჰქონდა თანაკლასელებთან. არასოდეს ერიდებოდა იმის აღიარებას, რომ ქართველია, ამით ამაყობდა. სკოლიდან სახლში დაბრუნებული ხშირად ცრემლებს ვერ იკავებდა, ამიტომ, მისთვის სკოლის პერიოდი რთულ წლებთან ასოცირდება.

შელია განათლებით იურისტია და რუსეთის იუსტიციის აკადემია აქვს დამთავრებული. არჩევანი მამის სურვილის შესაბამისად გააკეთა. მოდელი სტუდენტობის წლებს სითბოთი იხსენებს. მაგრამ უნივერსიტეტის დამთავრების შემდეგ მიხვდა, რომ არ სურდა ცხოვრების დაკავშირება სამართლის პროფესიასთან და მოდელობაზე ოცნებობდა.

სამოდელო ბიზნესი

ვარსკვლავი სილამაზითა და მოდით ადრეულ ბავშვობაშიც იყო დაინტერესებული. პირველად 6 წლის ასაკში გადაწყვიტა მაკიაჟის გაკეთება, როდესაც სახლში ბებიასთან ერთად დარჩა. მშობლები მირანდას მიერ გაკეთებულმა მაკიაჟმა გაამხიარულა და მოგვიანებით ქალიშვილს საბავშვო კოსმეტიკური ნაკრები უყიდეს.

როგორც მოდელი, ცნობილი გახდა ვიწრო წრეებში. მალე მირანდას პერსონით ბევრი დაინტერესდა ირინა შეიკთან გარეგნული მსგავსების გამო, რასაც გოგონა მაკიაჟის დახმარებით, ოსტატურად უსვამს ხაზს. კრიშტიანუ რონალდუს ყოფილი "გერლფრენდისგან" განსხვავებით, ქართველს უყვარს თმაზე ექსპერიმენტების ჩატარება.

ბევრს მიაჩნია, რომ შელიამ ამ ეფექტს პლასტიკური ქირურგიით მიაღწია. მოდელი არ უარყოფს, რომ რინოპლასტიკა გაიკეთა და ხშირად სტუმრობს კოსმეტოლოგს, თუმცა ურჩევნია კომენტარი არ გააკეთოს სხვა პროცედურების შესახებ.

მისი თქმით, მათ არაერთხელ სცადეს მისი ფოტოების გამოქვეყნება ინტერნეტში, რათა დაემტკიცებინა, რომ მისი სილამაზე მხოლოდ პლასტიკური ოპერაციების შედეგი იყო.

გარეგნული მონაცემების წყალობით, მირანდა რეგულარულად იღებს მოწვევებს კოსმეტიკისა და ტანსაცმლის ბრენდების წარმომადგენლებთან თანამშრომლობისთვის. წარსულში ის გამოჩნდა ისეთი ჟურნალების გარეკანებზე, როგორიცაა City Magazine და Avantage.

მირანდა აღიარებს, რომ სოციალური ქსელების "მძევალია". ყოველდღე, გაღვიძებისთანავე პირველი, რასაც აკეთებს, ტელეფონის ხელში აღება და სოციალური ქსელების შემოწმებაა.

რაც შეეხება ყოველდღიურ სტილს, შელია უპირატესობას მარტივ სტილს ანიჭებს და აცხადებს, რომ მისთვის მთავარი კომფორტია. მისი საყვარელი დეტალები ყოველდღიური ლუქისთვის არის დახეული ჯინსი, ჩექმა და შეკრული თმა.

პირადი ცხოვრება

მოდელის თქმით, ის ღია და გულწრფელი ადამიანია, რაც ხშირად ხელს უშლის ცხოვრებაში. ნაკლოვანებებს შორის ასახელებს ეჭვიანობას და ფეთქებად ხასიათს, მაგრამ აღიარებს, რომ სწრაფად მშვიდდება. მისი აზრით, არ არსებობს "თეთრი შური". წარსულში ეჭვიანი მეგობრები ჰყავდა, რაც შელიას დიდ ტანჯვას აყენებდა, მაგრამ დროთა განმავლობაში, მან ისწავლა ასეთი ადამიანებისგან დისტანცირება.

ურთიერთობებში ვარსკვლავი აფასებს ერთგულებას და თვლის, რომ ვერასოდეს აპატიებს ღალატს. იგი აღწერს თავის იდეალურ რჩეულს, როგორც კეთილ, მამაც, პატიოსან და მდიდარ ადამიანს.

წარსულში მირანდას უკვე მოუწია პირად ცხოვრებაში სირთულეებთან გამკლავება. პირველად 20 წლის ასაკში დაქორწინდა ქართველ ფეხბურთელ გიორგი ჭანტურიაზე. წყვილმა ჯვარი საქართველოში, სამების ეკლესიაში დაიწერა, მაგრამ ურთიერთობა დიდხანს არ გაგრძელებულა.

ის დღემდე საიდუმლოდ ინახავს ყოფილ ქმართან განშორების მიზეზებს და ნანობს ადრეულ ქორწინებას, ამ გადაწყვეტილებას ახალგაზრდობის შეცდომებით ხსნის. წყვილის დაშორების შემდეგ, ჭანტურიამ არჩევანი ნინი გოგიჩაიშვილზე გააკეთა, თუმცა მალე მათი დაშორების შესახებ გახდა ცნობილი.

**გიორგი ჭანტურია და მირანდა შელია, ქორწილის დღეს**

მირანდას თქმით, დაშორების შემდგომი პერიოდი მისთვის რთული იყო. იმის გამო, რომ საქართველოში დაშორება რთულ მომენტად ითვლება. ის წუხდა, რომ მშობლებს აწყენინა და ეშინოდა მათთან ამ თემაზე საუბარი. შედეგად შელია დეპრესიაში ჩავარდა, წონაში დაიკლო და დარწმუნებული იყო, რომ მისი სიცოცხლე დასრულდა. მაგრამ გოგონას პრობლემების მოგვარებაში ახლო მეგობარი, ქეთა თოფურია დაეხმარა, რომელიც მხარს უჭერდა.

ცნობილი რუსი ფეხბურთელი ფიოდორ სმოლოვი მირანდას ქეთამ გააცნო. მათი რომანის შესახებ საზოგადოებისთვის 2015 წლის ოქტომბერში გახდა ცნობილი, როდესაც სპორტსმენის ნაცნობმა წყვილის ფოტო ინტერნეტში გამოაქვეყნა.

მას შემდეგ, რაც წყვილი პირველად გამოჩნდა საზოგადოებაში, შელიას პოპულარობა სწრაფად გაიზარდა. 2016 წლის ზაფხულში იგი თავის ცნობილ ბოიფრენდს ახლდა საფრანგეთში გამართულ ევროტურნირზე და მედიის ყურადღების ცენტრში იყო. მედია მისი ყოველი ნაბიჯის დეტალებს აქვეყნებდა და გოგონას მფლანგველობაზე მიუთითებდა.

და მას შემდეგ, რაც რუსეთის ნაკრები შეჯიბრებიდან გამოვარდა, გულშემატკივრები ფეხბურთელს კრიტიკით დაესხნენ თავს და ამავდროულად, შეახსენეს მას საყვარელი ადამიანისთვის ნაყიდი ძვირადღირებული ნივთები. ამ პერიოდში შელია მხარს უჭერდა სპორტსმენს, მაგრამ მალე მათი ურთიერთობა დასრულდა.

მოდელმა რუსულ მედიასთან აღნიშნა, რომ დაშორების ინიციატორი ფიოდორი იყო. ამის შემდეგ ყოფილმა შეყვარებულებმა ყველა საერთო ფოტო წაშალეს და უთანხმოების მიზეზების განხილვაზე უარი თქვეს.

2017 წელს მირანდა ვიდეო რგოლში გადაიღეს, სადაც იანა რუსოვსკაიას და მიხეილ ბატურინის საერთო ვაჟი ნიკოლაი მღეროდა. მალე ცნობილი გახდა, რომ მათ შორის რომანი დაიწყო. ჟურნალისტებთან საუბარში შელიამ აღიარა, რომ თავიდან მას მომღერლის თაყვანისმცემლები აწუხებდნენ, მაგრამ დროთა განმავლობაში, მოახერხა მათთან შეთანხმება და დაარწმუნა, რომ არ აპირებდა მათი კერპის "მოპარვას". წყვილში ჰარმონია სუფევდა. იანა რუდკოვსკაიამ ასევე იცოდა მათი გრძნობების შესახებ და ის იყო ერთ-ერთი პირველი, ვინც კომენტარი გააკეთა ამ თემაზე.

მან მირანდა აღწერა, როგორც კეთილი და კარგი გოგონა. ტელეწამყვანმა თქვა, რომ მათ შორის ძლიერი კავშირი იყო, მაგრამ მისი სიტყვები არ გამართლდა და ურთიერთობა განშორებით დასრულდა. მოდელმა კვლავ წაშალა ყველა ერთობლივი ფოტო ყოფილ შეყვარებულთან ერთად.

2021 წლის მაისში მირანდამ გამოაცხადა, რომ დაქორწინდა გრიგორი მამურინზე, სკანდალურ ბლოგერზე და მილიარდერ იგორ ნეკლიუდოვის შვილიშვილზე. ქორწილს მხოლოდ უახლოესი მეგობრები ესწრებოდნენ, მათ შორის, ქეთა თოფურია.

ეს სიახლე გულშემატკივრებისთვის მოულოდნელი აღმოჩნდა, რადგან მოდელს მანამდე არ გაუზიარებია მომავალ ქმართან ურთიერთობის დეტალები. მალე ცნობილი გახდა, რომ მირანდა მამურინს დაშორდა, მიმი მაშინ ორსულად იყო. მან ისევ წაშალა საერთო ფოტოები. მოდელი ვაჟს ზრდის, რომელსაც მედიასთან არ აჩენს.

საინტერესო ფაქტები

ერთგული გულშემატკივრები, მეგობრები და ოჯახის წევრები მიმის ეძახიან.

შელია ტატუებზეა შეყვარებული. პირველი ტატუ სხეულზე 17 წლის ასაკში გაიკეთა. მამას მოეწონა, მაგრამ დედა ერთი თვის განმავლობაში არ ესაუბრებოდა, მისი თქმით, ქალიშვილი ვეღარ გათხოვდებოდა. მაგრამ ამან მირანდა არ შეაჩერა და მალე მის სხეულზე უფრო მეტი ტატუ გამოჩნდა.

ვარსკვლავი 50 კგ-ს იწონის, სიმაღლით 167 სმ და ამაყობს მოხდენილი ფიგურით. მისი თქმით, ძნელია კვებისგან თავი შეიკავოს, მაგრამ ბალანსს ვარჯიშის საშუალებით აღწევს.

ქართველი ლამაზმანი გატაცებულია მუსიკით, მოგზაურობითა და შემოქმედებითი ადამიანებით. მაგრამ მისი მთავარი შთაგონების წყარო თავად ცხოვრებაა. მირანდა ყოველი წამით ტკბება და სიხარულს წვრილმანებში პოულობს.

ტეგები თემაზე:

მირანდა შელია