"უზრდელი" თუთიყუშები - ბრიტანეთის ზოოპარკში თუთიყუშებისთვის ბილწსიტყვაობის გადასაჩვევად, რეაბილიტაციის გეგმა შეიმუშავეს
ველური ბუნების ბრიტანულმა პარკმა თავიანთი თუთიყუშების რეაბილიტაციისთვის ახალი გეგმა შეიმუშავა. ამის მიზეზი ის გახდა, რომ ფრინველებმა ზოოპარკში ბილწსიტყვაობის კორიანტელი დააყენეს.
აფრიკული ჯიშის ნაცრისფერი თუთიყუშები, რომლებიც ლინკოლნშირის ველური ბუნების პარკს საჩუქრად 2020 წელს გადასცეს, სხვა თუთიყუშებისგან იზოლირებულად მოათავსეს.
ერიკის, ჯეიდის, ელსის, ტაისონისა და ბილის სასაუბრო ლექსიკა ზოოპარკის თანამშრომლებს აშინებთ, რადგან თვლიან, რომ ეს ვიზიტორ ბავშვებზე უარყოფით გავლენას ახდენს.
თუმცა პრობლემა ამით ვერ მოგვარდა, რადგან ზოოპარკს კიდევ სამი ბილწსიტყვაობის "მოყვარული" თუთიყუში შეემატა. ამიტომ ზოოპარკის გუნდი მათთან "გასამკლავებლად" ახალ, უფრო განსხვავებულ მიდგომას ირჩევს.
პარკის ახალი ბინადრების, ერიკის, კაპიტანის, შილას და დანარჩენი ხუთი "ბოროტმოქმედის" ინტეგრაცია არც ისეთი მარტივი საქმეა.
"როცა მათ პარკში გადასაყვანად მივედით, ისეთი სიტყვებით ალაპარაკდნენ, საშინელება იყო. ეს ჩვეულებრივი გინება არ იყო, სათანადო აღწერილობები და ახსნა-განმარტებები ახლდა.
გადავწყვიტეთ, რომ ეს რვა, ბილწსიტყვაობის მოყვარული თუთიყუში 92 ზრდილობიან თუთიყუშთან ერთად მოგვეთავსებინა. თუ პარკის ახალი სტრატეგია იმუშავებს, მაშინ გინების მოყვარული თუთიყუშები სხვებისგან უფრო ნაკლებად აღმაშფოთებელ სიტყვებს ისწავლიან, მაგრამ თუ დანარჩენები მათგან სალანძღავ სიტყვებს ისწავლიან, მაშინ მათი ვოლიერი საშინელებად გადაიქცევა", - განუცხადა CNN-ს პარკის აღმასრულებელმა დირექტორმა სტივ ნიკოლსმა.
ზოოპარკის თანამშრომლების მტკიცებით, თუთიყუშები გინების და ლანძღვის შემდეგ, იცინიან კიდეც.
"თუთიყუშები იმ ბგერებს ჰბაძავენ, რომლებიც ხშირად ესმით. როცა ყველა ერთად იგინება, ეს საშინელი მოსასმენია ხოლმე",- განაცხადა ნიკოლსმა.
- პარკში თანამშრომლებმა ვიზიტორებისთვის გამაფრთხილებელი ნიშნებიც დაამონტაჟეს, რომლებიც მათ თუთიყუშების შესახებ აფრთხილებენ, მაგრამ ნიკოლსის თქმით, მათი უზრდელობის გამო, საჩივარი ჯერ არ მიუღიათ.
წყარო: cnn
მოამზადა: ანა სიბოშვილმა