"მედიცინაში ამას უზარმაზარი შედეგები მოჰყვება..." - სისხლის ტესტი ალცჰაიმერის რისკს დაავადებას სიმპტომების გამოჩენამდე 15 წლით ადრე დაადგენს?

თურმე სისხლის უბრალო ანალიზს შეუძლია ალცჰაიმერის დაავადების ადრეული სტადიების გამოვლენა - როგორც კვლევამ აჩვენა, შემუშავებული ტესტით შესაძლებელი ხდება 50 წელზე უფროსი ასაკის ადამიანების რეგულარული სკრინინგი, რაც დაავადების განვითარების რისკს 15 წლით ადრე დაადგენს.

მეცნიერთა თქმით, ტესტს სისხლში ტაუ ცილების აღმოჩენა შეუძლია. ეს ცილა ალცჰაიმერისთვის არის დამახასიათებელი. ისინი თავის ტვინში გროვდებიან და ნეირონებს კლავენ.

მკვლევრებმა 233 ადამიანის მონაცემები შეისწავლეს; პირველი მონაცემები 2001-2004 წლებშია შეგროვებული, შემდეგი დაკვირვებები კი 17 წლის განმავლობაში გრძელდებოდა. როგორც მონაცემებმა აჩვენე, ინდივიდებს, რომლებსაც სისხლში გლიკანებისა და ტაუ ცილების მაღალი დონე აღენიშნებოდათ, ორჯერ მაღალი ჰქონდათ ალცჰაიმერის განვითარების რისკი.

”ეს კვლევა აჩვენებს, რომ სისხლის უბრალო ანალიზს შეუძლია დაავადების გამოვლენა ტაუ ცილის დონის გაზომვით… მედიცინაში ამას უზარმაზარი შედეგები მოჰყვება...

50 წელზე უფროსი ასაკის ყველა ადამიანს უნდა ჩაუტარდეს რუტინული სკრინინგი რამდენიმე წელიწადში ერთხელ, ისევე როგორც ახლა უტარდებათ მაღალი ქოლესტერინის სკრინინგი. ალცჰაიმერის რისკების ნაადრევ აღმოჩენას ამ დაავადების მკურნალობის გზების შეცვლა შეუძლია", - ამბობს დევიდ კერტისი, UCL გენეტიკური ინსტიტუტის პროფესორი.

ნიკოლას ეშტონმა, წამყვანმა მკვლევარმა, თქვა, რომ ტესტის ღირებულება აშშ-ში დაახლოებით $200 (157 £) იქნება. 2019 წლის შეფასებით, დიდ ბრიტანეთში დაახლოებით 900 000 ადამიანს აქვს ალცჰაიმერი. 2040 წლისთვის ეს მაჩვენებელი 1,6 მილიონამდე გაიზრდება.