"ზურა უკვე გერმანიაშია... მისი იქ გადაყვანა უმტკივნეულოდ მოხერხდა" - რა არის ცნობილი მსახიობის მდგომარეობის შესახებ?

მალე ერთი თვე გახდება, რაც საზოგადოება ზურა ბერიკაშვილის გამოჯანმრთელებას გულშემატკივრობს. ცნობილ მსახიობს მოულოდნელად ჯანმრთელობის პრობლემა შეექმნა - მას გული გაუჩერდა. მოგვიანებით ქალბატონმა მანანამ ძმის ჯანმრთელობის მდგომარეობაზე Ambebi.ge-სთან ისაუბრა.

"ზურიკო 22 წლის ასაკიდან ინსულინზეა, დიაბეტი აქვს. თურმე "დიაბეტიკებს“ არ აქვთ ტკივილის შეგრძნება. აქედან გამომდინარე, ინფარქტმა ისე დაარტყა, ტკივილი არ უგრძნია", - ამბობდა ინტერვიუში მანანა ბერიკაშვილი. ქართველი ექიმები პაციენტს ყურადღებას არ აკლებდნენ, თუმცა მსახიობის გადაყვანა უცხოეთში მაინც აუცილებელი გახდა.

ის უკვე ერთი კვირაა, რაც გერმანიაში, ერთ-ერთ კლინიკაში იმყოფება, სადაც მისი რეაბილიტაციის პროცესი მიმდინარეობას.

ამის შესახებ AMBEBI.GE-ს ზურა ბერიკაშვილის სიძემ, ნიკო ნანიტაშვილმა განუცხადა.

"ზურა გერმანიაშია. ამ წუთისთვის ისეთი მნიშვნელოვანი სიახლე არაფერია. მისი იქ გადაყვანა უმტკივნეულოდ მოხერხდა. ჯერჯერობით კიდევ გამოკვლევების პროცესშია. დანარჩენი, რაც აქაც ვიცოდით, ტვინზე დაზიანება აქვს მიღებული. მიმდინარეობს რეაბილიტაცია, რომ რამენაირად უკეთესი მდგომარეობა დაფიქსირდეს. სხვა მნიშვნელოვანი სათქმელი არაფერია. იმყოფება ისევ ხელოვნურ კომაში.

რამდენჯერმე მოხსნეს, მაგრამ მაინც ვერ იღებენ ჯერ სათანადო შედეგს და თან ცდილობენ, რომ ზედმეტი დატვირთვა არ მიიღოს. გერმანიიდან ამ ეტაპზე მხოლოდ ეს ინფორმაცია გვაქვს“ - აღნიშნავს ნიკო ნანიტაშვილი.