ქართველი მოციგურავეების მეტელკინა-ბერულავას ულამაზესი გამოსვლა - ისინი მოკლე პროგრამის შემდეგ ევროპის ჩემპიონატის ლიდერები არიან (ვიდეო)

10-დან 14 იანვრის ჩათვლით ლიეტუვას ქალაქ კაუნასში იმართება 2024 წლის ევროპის ჩემპიონატი ფიგურულ ციგურაობაში. ასპარეზობის პირველ დღეს ყინულზე გავიდნენ სპორტული წყვილები და ვაჟები.

საქართველოს ნაკრების სპორტული წყვილი ანასტასია მეტელკინა-ლუკა ბერულავა შთამბეჭდავად გამოვიდნენ და მოკლე პროგრამის შემდეგ 71,30 ქულით პირველ ადგილზე არიან. ისინი ლიდერობენ 13 ქვეყნის 18 სპორტულ წყვილს შორის. ანასტასია და ლუკასთვის ევროპის ეს ჩემპიონატი სადებიუტო იყო უფროსი ასაკის კატეგორიაში ერთობლივი გამოსვლების ისტორიაში. საქართველოს ფიგურული ციგურაობის ისტორიაშიც პირველი შემთხვევაა, როცა წყვილი საქართველოდან მოკლე პროგრამის შემდეგ პირველ პოზიციაზეა ისეთი რანგის საერთაშორისო ტურნირზე, როგორიც ევროპის ჩემპიონატია. ამასთანავე, ჩვენი წყვილი 2023 წლის ევროპის ჩემპიონებს, იტალიელ სპორტსმენებს, სარა კონტისა და ნიკოლა მაჩის 10 ქულით უსწრებს თავისუფალი პროგრამის წინ. ტექნიკურად უშეცდომოდ, დამაჯერებლად, ქორეოგრაფიულად და კომპოზიციურად სრულყოფილი მოკლე პროგრამის წარმოდგენის შემდეგ ანასტასია მეტელკინასა და ლუკა ბერულავას წყვილი დამსახურებულად იკავებს პირველ პოზიციას, რითიც სერიოზულ განაცხადს აკეთებს ევროპის ჩემპიონატზე ყველაზე მაღალი სინჯის მედლების მოსაპოვებლად.

სპორტული წყვილების თავისუფალი პროგრამიტ გამოსვლა დღეს, 11 იანვარს. 21:00 საათზე დაიწყება.

მოკლე პროგრამებით იასპარეზეს მამაკაცებმაც. 25 ქვეყნის 32 სპორტსმენს შორის მოკლე პროგრამის შემდეგ ქართველი მოციგურავე ნიკა ეგაძე 77.00 ქულით ჯერჯერობით მე- 10 ადგილზეა. თავისუფალი პროგრამა გაიმართება 12 იანვარს.

დღეს ყინულზე ასევე გავლენ ქალთა კატეგორიის მოციგურავეები, ისინი წარადგენენ მოკლე პროგრამას. საქართველოს სახელით იასპარეზებს ევროპის ჩემპიონატის შარშანდელი გამარჯვებული და საქართველოს 2023 წლის საუკეთესო ქალი სპორტსმენი ანასტასია გუბანოვა.