Novocherkassk-ის "გარდაცვალება": როგორ მოხდა მასშტაბური აფეთქება რუსულ სადესანტო გემზე - რას მალავს რუსეთი და როგორია რეალობა?

რუსეთის ხელისუფლებამ აღიარა, რომ დიდი სადესანტო გემის Novocherkassk-ის აფეთქებისას, რომელიც ფეოდოსიას პორტში იყო შესული, ერთი ადამიანი დაიღუპა და ოთხი დაიჭრა. გემზე იერიში უკრაინის საჰაერო ძალებმა Storm Shadow-ის რაკეტებით მიიტანეს. უკრაინა აცხადებს, რომ გემი განადგურდა. გამოქვეყნებული ვიდეო კადრებიდან ჩანს, რომ მას შემდეგ, რაც გემს ცეცხლი გაუჩნდა, მასზე დიდი აფეთქება მოხდა.

რუსეთის თავდაცვის სამინისტროს არაფერი უთქვამს ზარალის შესახებ, მაგრამ სოციალურ ქსელებში გავრცელებულ ვიდეოებსა და ფოტოებზე, სავარაუდო დაბომბვისას ძლიერი აფეთქება ჩანს.

სოციალურ ქსელში გამოქვეყნებული კადრებზე კომენტარებით თუ ვიმსჯელებთ, ფოტოებზე ნაჩვენებია გემის ნაშთები. კადრებში ძნელია გემის ზედნაშენის დანახშირებული და დაზიანებული ლითონის იდენტიფიცირება.

თუმცა, ვინაიდან რუსეთის თავდაცვის სამინისტრომ აღიარა ფეოდოსიაში ნოვოჩერკასკის BDK-ის განადგურების ფაქტი, დიდი ალბათობით შეიძლება ვივარაუდოთ, რომ ეს შეიძლება იყოს გემის ნაშთები.

დიდ აფეთქება ფეოდოსიას პორტში 2023 წლის 26 დეკემბრის ღამით მოხდა.

რამდენია გარდაცვლილი?

ძნელი სათქმელია, რამდენი ადამიანი შეიძლებოდა დაღუპულიყო აფეთქებისას. ერთის მხრივ, გემი არ იყო ზღვაში და ეკიპაჟის ნაწილი შესაძლოა ნაპირზე ყოფილიყო, მეორე მხრივ, შესაძლოა, მთელი ეკიპაჟი ყოფილიყო ბორტზე.

ვიდეო კადრებში ჩანს, რომ დიდი აფეთქება მას შემდეგ მოხდა, რაც გემს ცეცხლი გაუჩნდა.

გემის წესების მიხედვით, მთელი ეკიპაჟი უნდა მონაწილეობდეს გადარჩენისთვის ბრძოლაში, მათ შორის ბორტზე ხანძრის ჩაქრობაში. გარდა ამისა, მეხანძრეებს შეეძლოთ ცეცხლმოკიდებულ გემთან მიახლოება.

აქედან გამომდინარე, ძალიან რთულია საუბარი იმაზე, თუ რამდენი ადამიანი შეიძლებოდა დაღუპულიყო BDK-ზე.

რუსეთის თავდაცვის სამინისტროს ინფორმაციით, გემზე დარტყმის შედეგად ერთი ადამიანი დაიღუპა და ოთხი დაიჭრა, მაგრამ რუსი სამხედროები, როგორც წესი, მალავენ მონაცემებს დანაკარგების შესახებ, განსაკუთრებით ზღვაზე.

ნოვოჩერკასკის სადესანტო ხომალდის ეკიპაჟის სტანდარტული რაოდენობაა 87 ადამიანი, მაგრამ ბორტზე შეიძლება უფრო მეტი ან ნაკლები ადამიანი ყოფილიყო.

ძალიან დიდი აფეთქება

რამდენად ძლიერი იყო აფეთქება პორტში, ამას მოწმობს არა მხოლოდ ვიდეოჩანაწერები, არამედ ავტორების ემოციური კომენტარები. სოციალურ ქსელებში გაჩნდა შეტყობინებები გემის ნამსხვრევების შესახებ, რომელიც ქალაქის სხვადასხვა კუთხეში აღმოაჩინეს.

ერთ-ერთ ვიდეოში ტელეკომპანია „ვესტი“-ს კორესპონდენტი ანასტასია კალუგინა საუბრობს ფეოდოსიაში აღმოჩენილ ლითონის საკმაოდ დიდ ნაჭერზე. ვიდეოში, რომელიც, როგორც ჩანს, პირდაპირი ტრანსლაციის ნაწილია, ის ასევე ამბობს, რომ მეზობელ სახლებში მინები ჩამსხვრეულია.

ძნელი სათქმელია, ეკუთვნის თუ არა ეს ნაჭერი ნოვოჩერკასკის დიდ სადესანტო ხომალდს, რადგან ვიდეო, რომელიც სოციალურ ქსელებში ტრიალებს, აშკარად დამონტაჟებულია და არ იძებნება Vesti - ის საიტზე.

ტელეკომპანია "ვესტის" სხვა ინფორმაციით, აფეთქების შედეგად, პორტთან ახლოს მდებარე ქუჩებში მდებარე სახლებში მინები ჩამსხვრეულია და მე-10 საშუალო სკოლაში ჭერი დაზიანდა. რუკაზე, სკოლა აფეთქების ადგილიდან დაახლოებით, 800 მეტრში მდებარეობს.

რა იყო საწყობში?

ასეთი დიდი აფეთქების გამო, ჩნდება ვარაუდი, რომ გემის შიგნით შესაძლოა ყოფილიყო ასაფეთქებელი ტვირთი. ადრე გავრცელდა ინფორმაცია, რომ რუსეთი სამხედრო ტვირთის გადასაზიდად დიდ სადესანტო გემებს იყენებს.

სოციალურ ქსელებში გავრცელდა ვერსიები, რომ BDK-ს შეეძლო საბრძოლო მასალის ან შაჰედის დრონების ტრანსპორტირება, რომლებსაც რუსეთი იყენებს ყირიმის ტერიტორიიდან უკრაინაში სასროლად.

თუმცა, არსებული მონაცემების - ვიდეოებისა და ფოტოების, ასევე სოციალური ქსელების ისტორიების საფუძველზე ზუსტი დასკვნების გამოტანა რთულია.

მნიშვნელოვანი მიზანი

2021 წელს რუსეთის შავი ზღვის ფლოტს ჰყავდა ხუთი BDK და კიდევ ექვსი ჩამოვიდა 2022 წლის იანვარში ჩრდილოეთ, ბალტიის და წყნარი ოკეანის ფლოტებიდან.

თუმცა, შავი ზღვის ფლოტმა ვერასოდეს შეძლო ჯარების დაშვება უკრაინის მატერიკულ სანაპიროზე. ამ წარუმატებელი ოპერაციის დეტალები არსად გამოქვეყნებულა, თუმცა, ექსპერტების აზრით, წარუმატებლობის მიზეზები შეიძლება ყოფილიყო ზღვაში გაშვებული ნაღმები, ასევე უკრაინის შეიარაღებულ ძალებში რაკეტებისა და საარტილერიო სისტემების არსებობა.

რა მიზეზიც არ უნდა ყოფილიყო, BDK-ს სხვა სამუშაო გამოუჩნდა - სამხედრო ტვირთის გადაზიდვა. რუსეთმა ამ გემების ტრანსპორტირებად გამოყენება 2022 წლის მარტში დაიწყო. წყლის ლოგისტიკური მარშრუტები იმდენად მნიშვნელოვანი აღმოჩნდა, რომ დიდი სადესანტო გემები უკრაინის შეიარაღებული ძალების ერთ-ერთი მთავარი სამიზნე გახდა.

დიდი სადესანტო ხომალდის წინააღმდეგ დარტყმები კარგად ჯდება სამხედრო ლოგისტიკისა და შავი ზღვის ფლოტის წინააღმდეგ ბრძოლის ჩარჩოებში და ისინი, ალბათ, რუსეთის საჰაერო თავდაცვის ეფექტურობის შემცირების შედეგი იყო.

ყირიმი

რუსეთის თავდაცვის სამინისტრომ განაცხადა, რომ ფეოდოსიას თავს დაესხა ორი სუ-24 თვითმფრინავი, რომელიც რუსეთმა ნიკოლაევიდან ჩრდილო-აღმოსავლეთით 125 კილომეტრში ჩამოაგდო.

რუსეთის თავდაცვის სამინისტრო და ყირიმის საოკუპაციო ხელისუფლება პერიოდულად ავრცელებს ინფორმაციას ნახევარკუნძულის თავზე ჩამოგდებული Storm Shadow რაკეტების შესახებ.

უკრაინის შეიარაღებული ძალების წარმატებული დარტყმის შესაძლო მიზეზი ყირიმის აღმოსავლეთ სანაპიროზე სამიზნეებზე რუსეთის სათვალთვალო აღჭურვილობის, კერძოდ, მფრინავი რადარების ნაკლებობაა.

უკრაინა, თავის მხრივ, იყენებს ნატოს სადაზვერვო თვითმფრინავების მონაცემებს, რომლებიც რეგულარულად დაფრინავენ შავი ზღვის თავზე. ეს მონაცემები, სავარაუდოდ, ეხმარება უკრაინის შეიარაღებულ ძალებს ყირიმის საჰაერო თავდაცვის სისტემის შესწავლაში, ასევე, რათა თავიდან აიცილონ ჩაჭრა რაკეტების გაშვების დროს.

წყარო