"ღაზის სექტორის ცენტრში ისრაელის საჰაერო თავდასხმას მინიმუმ 70 ადამიანი ემსხვერპლა" - ღაზის ჯანდაცვის სამინისტრო
ისრაელის საჰაერო თავდასხმას ღაზის სექტორის ცენტრში მდებარე ღაზის ლტოლვილთა ბანაკზე მინიმუმ 70 ადამიანი ემსხვერპლა, - მედიის ინფორმაციით, ამის შესახებ ღაზას "ჰამასის“ მიერ კონტროლირებად ჯანდაცვის სამინისტროში განაცხადეს.
მათივე ინფორმაციით, დაღუპულთა შორის მინიმუმ 12 ქალი და 7 ბავშვია. ჯანდაცვის ოფიციალური პირები არ გამორიცხავენ, რომ დაღუპულთა რაოდენობა კიდევ გაიზარდოს.
"ჰამასმა“ განცხადება გაავრცელა, სადაც აღნიშნულია, რომ ისრაელმა საშინელი ხოცვა-ჟლეტა მოაწყო და რომ ეს ომის დანაშაულია.
ისრაელის თავდაცვის ძალებში აცხადებენ, რომ გავრცელებულ ინფორმაციასთან დაკავშირებით მოკვლევას აწარმოებენ.