სენსაცია მედიცინაში: ორი საშვილოსნოს მქონე ამერიკელმა ქალმა ორ დღეში ორჯერ იმშობიარა - "ერთი ქალიშვილი სამშაბათს გააჩინა, მეორე - ოთხშაბათს"

იშვიათი ორი საშვილოსნოს მქონე ამერიკელმა ქალმა ორ დღეში ორჯერ იმშობიარა - 32 წლის კელსი ჰეტჩერმა ერთი ქალიშვილი სამშაბათს გააჩინა, ხოლო მეორე - ოთხშაბათს.

ჰეტჩერს 17 წლის ასაკში უთხრეს, რომ ორი საშვილოსნო, იგივე ორმაგი საშვილოსნო (uterus didelphys) ჰქონდა - იშვიათი თანდაყოლილი ანომალია, რომელიც ქალების 0.3%-ს აღენიშნება.

ალაბამის უნივერსიტეტის ინფორმაციით, ორივე საშვილოსნოს განაყოფიერების შანსი ძალიან მცირეა. კელსი ჰეტჩერს მანამდე სამი ჯანმრთელი ორსულობა ჰქონდა და ახლაც სჯეროდა, რომ ყველაფერი ნორმის ფარგლებში იქნებოდა - თუმცა, რუტინულმა ექოსკოპიამ გამოავლინა, რომ ორივე საშვილოსნო განაყოფიერებული იყო.

პროფესორმა რიჩარდ დევისმა, რომელიც მშობიარობას ხელმძღვანელობდა, აღნიშნა, რომ ბავშვებს ზრდისა და განვითარებისთვის ცალკე სივრცე ჰქონდათ. უნდა აღინიშნოს, რომ ეს ტყუპებისგან განსხვავებული ფენომენია, რადგან ორივე ბავშვი ცალკე კვერცხუჯრედიდან ვითარდება.

ჰეტჩერის მშობიარობა 39-ე კვირაში დაეწყო. პირველი ბავშვი ბუნებრივად გააჩინა, ადგილობრივი დროით 19:45 საათზე, ხოლო მეორე, საკეისრო კვეთით 10 საათზე მეტი ხნის შემდეგ, დაახლოებით დილის 06:10 საათზე. დედაც და ახალშობილებიც ამ დროისთვის თავს კარგად გრძნობენ. წყარო