უჩვეულოდ დაცარიელებული ბეთლემი და გაუქმებული საშობაო ზეიმი - რა ხდება ახლა ქალაქში, რომელიც დეკემბერში ათასობით ტურისტს მასპინძლობს (ფოტოები)
ოკუპირებულ დასავლეთ სანაპიროზე მდებარე ქალაქი ბეთლემი, დეკემბერში, როგორც წესი, ათასობით მომლოცველითა და ტურისტითაა სავსე. გიგანტური ნაძვის ხე, აღლუმები და რელიგიური ცერემონიები შობის დღესასწაულის განუყოფელი ნაწილია, მაგრამ ისრაელ-პალესტინის კონფლიქტმა ბეთლემის საშობაო განწყობაზეც იმოქმედა.
ქალაქში ქუჩები და ეზოები ძირითადად ცარიელია, ბეთლემამდე მიმავალი გზები ისრაელის ძალებმა გადაკეტეს, ხოლო ახლოს მდებარე რამდენიმე ქალაქი ისრაელის შეიარაღებულმა ძალებმა ძალადობრივად დაარბიეს. ბეთლემში გააუქმეს საშობაო ზეიმიც - ამ ყველაფერმა დიდი გავლენა მოახდინა ტურიზმზე.
პალესტინის ტურიზმისა და კულტურის სამინისტროს ცნობით, ბეთლემი ყოველწლიურად 1,5 მილიონამდე ტურისტს იღებს. ბოლო რამდენიმე წლის განმავლობაში განსაკუთრებით დაზარალდა ადგილობრივი ბიზნესი.
პალესტინის ტურიზმის მინისტრმა რულა მაიამ განაცხადა, რომ შეიარაღებული კონფლიქტის დაწყების შედეგად ტურიზმის სექტორმა მნიშვნელოვანი ზარალი განიცადა.
"ხალხი მთელი მსოფლიოდან, მათ შორის შეერთებული შტატებიდან, რუსეთიდან, რუმინეთიდან, პოლონეთიდან, იტალიიდან, ესპანეთიდან და ინდოეთიდან, ყოველწლიურად სტუმრობს ქალაქს. იმ დროს, როცა მთელი მსოფლიო შობას ზეიმობს, ბეთლემი ჩუმი და სევდიანია“ - თქვა მაიამ.
ბეთლემის შობის ევანგელურ-ლუთერანული ეკლესიის პასტორის, მუნტერ ისააკის განცხადებით, შეუძლებელია საშობაო განწყობა გქონდეს, როცა ღაზაში პალესტინელ ხალხს გენოციდს უწყობენ:
"ეკლესიის გადაწყვეტილებით, წელს შობის სცენა პალესტინაში მცხოვრები ბავშვების მტკივნეულ რეალობას ასახავს. სწორედ ამიტომ მოვათავსეთ ჩვილი იესოს ქანდაკება ნანგრევებისა და განადგურებულ ბაგაში, როგორც სოლიდარობის გზავნილი ღაზაში ტანჯულთა მიმართ. ქრისტე რომ დღეს დაბადებულიყო, ის ნანგრევების ქვეშ დაიბადებოდა“ - თქვა ისააკმა...წყარო