აეროპორტის ტერიტორიაზე წყალში ჩაძირული თვითმფრინავები, ქალაქის შუაგულში კი ნიანგი - წყალდიდობა ავსტრალიის ჩრდილო-დასავლეთით, რომლის მსგავსიც არ ახსოვთ
ავსტრალიის ჩრდილო-დასავლეთით მდებარე შტატ ქუინსლენდში მოსულმა ჭარბმა ნალექმა წყალდიდობა გამოიწვია, რასაც მოსახლეობის დიდი ნაწილის ევაკუაცია მოჰყვა, ნაწილმა კი მაღალსართულიანი სახლების სახურავზე გაათენა ღამე.
სოციალურ ქსელებში გავრცელებულ ფოტოებში კერნსის აეროპორტის ტერიტორიაზე წყალში ჩაძირული თვითმფრინავები, ქალაქის შუაგულში კი წყალში მცურავი ნიანგი ჩანს. როგორც უკვე აღვნიშნეთ, ქუინსლენდის ქალაქებიდან ათასობით ადამიანი უკვე ევაკუირებულია, მაგრამ დანარჩენები შენობების სახურავებზე არიან მომწყვდეულები და შველას ელიან.
- ექსპერტების თქმით, სამშაბათს ნალექი შემცირდება, თუმცა მდინარეები კიდევ რამდენიმე დღე იქნება ადიდებული.
ტროპიკული ციკლონის გამო, ზოგიერთ რეგიონში, 24 საათში რეკორდული ოდენობის ნალექი დაფიქსირდა, რომელიც ნალექის მთელი წლის ოდენობას გაუტოლდა. ამ დრომდე არ გავრცელებულა ინფორმაცია დაღუპულების ან დაკარგულების შესახებ. მეტეოროლოგების ცნობით, ინტენსიური ნალექი ავსტრალიის რეგიონებში მომდევნო 24 საათის განმავლობაშიც გაგრძელდება.
<iframe width="400" height="500" frameborder="0" src="https://www.bbc.com/news/av-embeds/67740978/vpid/p0h0631c"></iframe>ამ დრომდე მაშველებმა ასობით ადამიანი გადაარჩინეს, თუმცა ბევრი სახლი კვლავ დატბორილია, გათიშულია ელექტროენერგია, გზები კი ჩაკეტილი. მას შემდეგ, რაც წვიმა დაიწყო, ქალაქ კერნსში წყალმა 2 მეტრზე მეტ სიმაღლეს მიაღწია. ქუინსლენდის პრემიერმა, სტივენ მაილსმა ავსტრალიის მედიას განუცხადა, რომ სტიქიური უბედურება ყველაზე უარესია, რაც კი აქაურებს ახსოვთ: "ადგილზე ვესაუბრე კერნსის ადგილობრივ მოსახლეობას, ისინი ამბობენ, რომ აქამდე მსგავსი არაფერი უნახავთ".
სახელმწიფოს ოფიციალური წარმომადგენლების შეფასებით, კატასტროფის ზარალი 1 მილიარდ ავსტრალიურ დოლარს გადააჭარბებს.
წყარო: bbc
მოამზადა: ანა სიბოშვილმა