"დრაკონის წელი მოდიოდა და მიშელის მოვიდა" - ვინ როგორ შეხვდა კანდიდატის სტატუსს: სახალხო ზეიმი "ფეისბუქზე", პოლიტიკოსებისა და საზოგადოების გამოხმაურებები
ევროპულმა საბჭომ საქართველოსთვის კანდიდატის სტატუსის მინიჭება გადაწყვიტა, რამაც ჩვენი ქვეყანა წევრობას კიდევ უფრო დააკავშირდა. სასიხარულო ამბავი ქართველმა ხალხმა ევროპული საბჭოს პრეზიდენტისგან, შარლ მიშელისგან გაიგო.
"ევროპულმა საბჭომ გადაწყვიტა უკრაინასთან და მოლდოვასთან გაწევრიანების შესახებ მოლაპარაკებები გახსნას. ევროპულმა საბჭომ საქართველოს კანდიდატის სტატუსი მიანიჭა. ასევე ევროკავშირი გახსნის მოლაპარაკებებს ბოსნია-ჰერცოგოვინასთან მას შემდეგ, რაც წევრობის კრეტერიუმებთან სესაბამისობის საჭირო ხარისხი იქნება მიღწეული და მოიწვია კომისია მოამზადოს შესაბამისი ანგარიში ასეთი გადაწყვეტილების მისაღებად. ეს არის იმედის ცხადი მესიჯი მათი ქვეყნებისა და ჩვენი კონტინენტისთვის", - დაწერა მიშელმა.
მალევე პირველი განცხადებები გააკეთეს ქვეყნის პირველმა პირებმა. მთავრობის მეთაურის თქმით, 14 დეკემბერი ჩაიწერება როგორც ისტორიული თარიღი. ირაკლი ღარიბაშვილმა სტატუსის მინიჭების გადაწყვეტილების საზეიმოდ, დღეს, მოქალაქეებს თავისუფლების მოედანზე მიიწვია.
"მე მხვდა წილად პატივი, რომ ჩვენი ქვეყნის სახელით და ჩვენი გუნდის სახელით ხელი მომეწერა ჯერ ასოცირების შეთანხმებაზე, შემდეგ ჩემი მმართველობის პირველი პრემიერობის დროს ჩვენ წარმატებით დავასრულეთ უვიზო რეჟიმთან დაკავშირებული მოლაპარაკებები, შარშან უკვე მე მქონდა პატივი, რომ უკვე ოფიციალურად ჩვენი ქვეყნის სახელით შემეტანა განაცხადი ევროკავშირის წევრობაზე. შარშან მივიღეთ ევროპული პერსპექტივა, რითაც დამტკიცდა, რომ ჩვენი ქვეყანა გახდება ევროპული ოჯახის წევრი და დღეს უკვე 14 დეკემბერი ჩაიწერება როგორც ისტორიული თარიღი. საქართველო დღეიდან არის ევროპული სახელმწიფო, ევროპული ქვეყანა. საქართველო არის ევროკავშირის კანდიდატი ქვეყანა. ასე რომ, ეს გამარჯვება გეკუთვნით თქვენ, ძვირფასო მოქალაქენო, ეს არის ჩვენი შრომის, ჩვენი ბრძოლის შედეგი და კიდევ ერთხელ მე მინდა მადლობა ვუთხრა ყველა იმ ადამიანს, ვინც ამ ისტორიული გამარჯვების საქმეში თითოეული აგური დადო და ეს გამარჯვება მოუტანა ჩვენს ხალხს" - აღნიშნა ღარიბაშვილმა.
დღეს დაგეგმილ სახალხო ზეიმს შეუერთდება საქართველოს პრეზიდენტი სალომე ზურაბიშვილიც. როგორც მან გუშინ აღნიშნა, "ყველა ერთად უნდა ვიდგეთ, რადგან ეს იქნება საქართველოს ზეიმი და მზად ვარ, ყველაფერში მივიღო მონაწილეობა".
როგორც პრეზიდენტმა განმარტა, რომ არა ქართველი ხალხის ერთად ყოფნა, ვერაფერს მივაღწევდით.
"მადლობა ქართველ ხალხს, რადგან ქართველი ხალხის გარეშე არ იქნებოდა ეს დიდი მიღწევა, ეს არის ყველას, ჩვენი, ერთიანი მიღწევა, რომ არა ერთად, არაფერს არ მივაღწევდით არასდროს, არც დამოუკიდებლობას ადრე, არც დღეს ამ ნაბიჯს და არც ხვალ ევროკავშირში გაწევრიანებას. ჩვენ ამას ვიგებთ ასეთ ისტორიულ დღეებში და მერე გვავიწყდება, მაგრამ ჩვენ ეს უნდა შევიგნოთ ბოლომდე და გავატაროთ, ვიტყოდი, ყოველდღიურად, რომ ერთიანობა, ერთობა არის მართლაც ჩვენი უდიდესი ძალა, სხვა დიდი ძალა არ გაგვაჩნია, მაგრამ ეს არის უდიდესი ძალა, რომელიც ყველაფერს მიგვაღწევინებს და ასეც ჩანს", - თქვა პრეზიდენტმა. მის ადმინისტრაციაშიც, როგორც მთელ ქვეყანაში, საზეიმო განწყობა იგრძნობოდა.
"კანდიდატის სტატუსი ქართველი ხალხის დამსახურებაა, რომელმაც გამოიჩინა უდიდესი სიბრძნე და არ წამოეგო პროვოკაციას" - ასე გამოეხმაურა ფრაქცია "ქართული ოცნების" თავმჯდომარე მამუკა მდინარაძე კანდიდატის სტატუსის მიღებას.
მისი თქმით, ევროპელმა პარტნიორებმა შარშანდლისგან განსხვავებით, ძალიან სამართლიანი გადაწყვეტილება მიიღეს.
"რეალურად, ეს, რა თქმა უნდა, ქართველი ხალხის დამსახურებაა, რომელმაც გამოიჩინა უდიდესი სიბრძნე, არ წამოეგო პროვოკაციას, არ წამოეგო იმ ცუდ რაღაცებს, რაზეც დღეს დეტალურად საუბარი არ მინდა. ამ სიბრძნის უკან იდგა ყველა გადაწყვეტილება, ყველა ნაბიჯი, რომელიც ქართველმა ხალხმა და მისმა ხელისუფლებამ გავიარეთ ამაყად, ღირსებით და მივაღწიეთ შედეგს, რომელიც ბევრს ვერ წარმოედგინა, ზოგს არ უნდოდა, მაგრამ ამის მიუხედავად, უმრავლესობას ეს კიდეც წარმოედგინა და კიდეც იდგა ამ გადაწყვეტილების უკან, ამ გადაწყვეტილების შემოქმედად ღირსებით და სიამაყით. ამ ყველაფერმა უზრუნველყო ეს ყველაფერი. დიდი მადლობა ჩვენს ევროპელ პარტნიორებს, რომ შარშანდლისგან განსხვავებით მიიღეს ძალიან სამართლიანი გადაწყვეტილება. დიდი მადლობა ჩვენს პარტნიორ ქვეყნებს, რომლებმაც იბრძოლეს, განსაკუთრებით მათ, ვინც იბრძოლა ამ გადაწყვეტილებისთვის“,- განაცხადა მამუკა მდინარაძემ.
"საქართველო ევროპული ოჯახის წევრია" - წერს პარლამენტის თავმჯდომარე შალვა პაპუაშვილი X-ზე და ვიდეოს აქვეყნებს, სადაც პატარა ვაჟთან ერთად უკრავს:
<blockquote class="twitter-tweet" data-media-max-width="560"><p lang="en" dir="ltr">Georgia is part of the European family 🇬🇪🇪🇺 <a href="https://t.co/52riRSx8hl">pic.twitter.com/52riRSx8hl</a></p>— Shalva Papuashvili 🇬🇪 (@shpapuashvili) <a href="https://twitter.com/shpapuashvili/status/1735426869929918654?ref_src=twsrc%5Etfw">December 14, 2023</a></blockquote> <script async src="https://platform.twitter.com/widgets.js" charset="utf-8"></script>მისალოცი ტექსტები გამოაქვეყნებს პოლიტიკოსებმა ოპოზიციიდან:
ლევან ხაბეიშვილი, "ნაციონალური მოძრაობის" თავმჯდომარე: "ვულოცავ ქართველ ხალხს ამ უდიდეს გამარჯვებას, ვულოცავ მიხეილ სააკაშვილს, რომელმაც დამოუკიდებელი საქართველოს ისტორიაში, პირველად აღმართა ევროკავშირის დროშა საქართველოს პარლამენტის წინ".
გიორგი გახარია, პარტია "საქართველოსთვის" ლიდერი: "გილოცავთ! ეს საქართველოს, ქართველი ხალხის გამარჯვებაა. განსაკუთრებით, ახალგაზრდების. ეს გამარჯვება, რა თქმა უნდა, ეძღვნება ჩვენს წინაპრებს, რომლებიც საუკუნეები იბრძოდნენ სიცოცხლის ფასად, იმისთვის, რომ ჩვენი სამშობლო გამხდარიყო ქრისტიანული ევროპის ნაწილი!
დღეს ყველამ უნდა ვიზეიმოთ, ყველამ ერთად. არავინ არ უნდა ვეცადოთ, გამოვყოთ ჩვენი წვლილი, იმიტომ რომ ჩვენი წვლილი აქ მინიმალურია, აქ ჩვენი საქართველოს, ჩვენი წინაპრების, ჩვენი ისტორიის, ჩვენი კულტურის, ჩვენი იდენტობის ყველაზე დიდი დამსახურებაა, გილოცავთ!".
ბადრი ჯაფარიძე, "ლელოს" ლიდერი: "ევროკავშირის მხრიდან საქართველოს და ქართველი ხალხის მიმართ, ეს არის ის შესაძლებლობა, რომელიც გაეხსნა ჩვენს ქვეყანას იმისათვის, რომ სწრაფად შევძლოთ შემდგომი უმნიშვნელოვანესი ნაბიჯის გადადგმა, რაც უკვე იქნება გამოხატული გაწევრიანების შესახებ მოლაპარაკების დაწყებაში.
კიდევ ერთხელ დაადასტურა ევროპული საბჭოს ამ გადაწყვეტილებამ, რომ ჩვენი ქვეყანა, ქართველი ხალხი, ევროპული თანამეგობრობის მიერ აღიარებულია, როგორც ევროპის განუყოფელი ნაწილი, როგორც ქვეყანა, როგორც პარტნიორი და შესაბამისად, ახლა ჯერი ჩვენზეა, იმისთვის, რომ ჩვენ გადავდგათ შემდეგი ნაბიჯები რეფორმების გზაზე, რომელიც აუცილებლად უნდა დაგვირგვინდეს საქართველოს ევროკავშირში გაწევრიანებით".
რა თქმა უნდა, საყოველთაო ზეიმი ყველაზე მეტად იგრძნობოდა სოციალურ ქსელში, სადაც ქართველი საზოგადოება, როგორც ყველა მნიშვნელოვანი მოვლენის დროს, გუშინაც არ კარგავდა იუმორის გრძნობას:
"დრაკონის წელი მოდიოდა და მიშელის მოვიდა"
"აბა, რამდენს წაუვიდა გული?!"
"დღეის მერე წუწუნი Auuuuu - ს მაგივრად Euuuuuuuu - თი დავიწყოთ"
“მეორადი ტანსაცმელი ევროპიდან"-ში დღეიდან შეიძლება ხაშურიდანაც იგულისხმებოდეს"
"ახლა რომ აღმოჩნდეს, რომ წაკითხულიდან აზრი ვერ გამოვიტანეთ"
"გიჟივით სიხარულისგან აღარ ვიცოდი რა მექნა და მეზობლის მოხუცს ვუვლი"
ცნობისთვის, დღეს თავისუფლების მოედანზე 17:00 საათზე სახალხოდ აღინიშნება კანდიდატის სტატუსის მიღება. ამის შესახებ გუშინ პრემიერმა განაცხადა და საზოგადოებას შეკრებისკენ მოუწოდა.