"მსგავსი რამ არასდროს მინახავს..." - იაპონიის სანაპიროზე ასობით ტონა თევზი გამოირიყა: რა გახდა მათი მასობრივი დახოცვის მიზეზი?
იაპონიის მთავრობის თქმით, მათ ძალიან უჭირთ იმის გარკვევა, თუ რატომ გამორიყა ზღვამ მათ ნაპირებზე ასობით ტონა მკვდარი თევზი. ჰოკაიდოში, ჰაკოდეს თევზსაჭერ პორტში, მხოლოდ დეკემბრის თვეში, 1200 ტონა სარდინი და სკუმბრია აღმოაჩინეს. დახოცილი თევზები კილომეტრზე მეტ მანძილზე არიან გადაჭიმული წყლის ზედაპირზე.
- მხოლოდ ოთხშაბათს, პოლიციამ ამ მხარეში 30-40 ტონამდე გამორიყული თევზი ნახა.
ადგილობრივმა მეთევზეებმა სასწრაფოდ დაიწყეს დახოცილი თევზის შეგროვება, იმის შიშით, რომ ზღვის ეკოსისტემას დააზიანებდნენ: "მსგავსი რამ არასოდეს მინახავს. ეს ეჭვს მიჩენს, რომ ზღვის ეკოსისტემა მკვეთრად იცვლება",- განაცხადა მეთევზემ ადგილობრივ მედიასთან საუბარში.
ექსპერტების ვარაუდით, დახოცილ თევზს მიგრაციისას მტაცებელი თევზები გამოედევნენ და ეს გახდა მათი მასობრივად დახოცვის მიზეზი. მათი თქმით, ასეთი მასობრვი სიკვდილიანობა, შესაძლოა, წყალში უეცარი ტემპერატურის ვარდნასაც გამოეწვია.
მიუხედავად გამოთქმული ვარაუდებისა, იაპონიის მთავრობას კონკრეტული მიზეზის დადგენა მაინც უჭირს. "ვგეგმავთ, რომ ადგილზე გამოვიკვლიოთ ზღვის წყალი",- განაცხადა ადგილობრივი მეთევზეების წარმომადგენელმა, მიკინე ფუჯივარამ.
- იაპონიის მთავრობის წარმომადგენლები Daily Mail-ის რამდენიმე დღით ადრე გამოქვეყნებულ მოხსენებას კრიტიკით შეხვდნენ.
გაზეთი თევზების მასიურად დახოცვის ფენომენს ფუკუშიმა დაიჩის ატომური ელექტროსადგურიდან გაშვებულ წყალს უკავშირებენ. სტატიაში აღნიშნულია, რომ მკვდარმა თევზებმა ნაპირზე გამორიყვა რადიოაქტიური წყლის გაშვებიდან 4 თვის შემდეგ დაიწყეს.
გამოცემის მტკიცებას ეწინააღმდეგება ატომური ენერგიის საერთაშორისო სააგენტოს დასკვნა. მათ წყნარ ოკეანეში სადგურიდან წყლის ჩაშვების გეგმა დაამტკიცეს და განაცხადეს, რომ ამას ადამიანებსა და გარემოზე უმნიშვნელო რადიოლოგიური გავლენა ექნებოდა.
"ჩვენ ამ დაუსაბუთებელი ინფორმაციით შეშფოთებულები ვართ",- განაცხადა იაპონიის მეთევზეობის სააგენტოს წარმომადგენელმა. ჰაკოდატეს ქალაქის მთავრობამ კი ადგილობრივ მოსახლეობას მოუწოდა, რომ დახოცილი თევზი არ მიირთვან: "ჯერ ზუსტად არ ვიცით რა ვითარებაში დაიხოცნენ ისინი, ამიტომ მათ საკვებად გამოყენებას არავის ვურჩევთ",- განაცხადა ტაკაში ფუჯიოკამ, მეთევზეობის მკვლევარმა.
წყარო: theguardian
მოამზადა: ანა სიბოშვილმა