"ბავშვობიდან ვმღეროდი, ნინი კი მისმენდა... ბოლოს ისე მოხდა, რომ მე აღარ ვმღერი და ნინი მღერის, მისით ამაყი ვარ" - ნინი ბრეგვაძის ძმა დის წარმატებული კარიერის შესახებ
მომღერალი ნინი ბრეგვაძე ამერიკულ მუსიკალურ კონკურსს, Voice-ს ნახევარფინალიდან გამოეთიშა. ქართველმა კონკურსანტმა საჭირო ხმების რაოდენობა ვერ დააგროვა.
"მადლობა Voice-ს ამ შესანიშნავი გამოცდილებისთვის! მადლობა ნაილს(პროექტში ნინის მწვრთნელი), რომ ხართ საუკეთესო მწვრთნელი და მეგობარი! და მადლობა ყველას სიყვარულისთვის. ჩემი კარიერა ახლა იწყება! მიყვარხართ", - წერს ნინი.
- "ფინალი ნინის გარეშე იქნება, მაგრამ ჩემი დაიკო მაინც ყველაზე კარგია" - წერს ნინის ძმა ბესო ბრეგვაძე, რომელიც დღეს ambebi.ge-ს რესპონდენტია...
ბესო ბრეგვაძე:
- თბილისში დავიბადე და გავიზარდე, წელიწად ნახევრით ვარ ნინიზე უფროსი. ბავშვობიდან ვმღეროდი, ნინი კი მისმენდა ხოლმე, დამყვებოდა მოსწავლეთა სასახლეში. ბოლოს ისე მოხდა, რომ მე აღარ ვმღერი და ნინი მღერის. ოჯახში ხელოვანი არავინ არის, მაგრამ ყველას აქვს მუსიკალური სმენა. მე ძირითადად ქართულ ფოლკლორს ვმღეროდი. ნინის არც პედაგოგი ჰყოლია, კომპიუტერთან იჯდა ხოლმე და ისე მღეროდა. 12 წლის იყო, როდესაც თქვა, რომ ამერიკაში წავიდოდა. მაშინ გაგვეღიმა, ვუთხარით, წადი.
- როგორი ბავშვობა გქონდათ?
- როგორც ყველას, 90-იანი წლების ბავშვებს. მე 94-ში დავიბადე, ნინი 96-ში. ჩვენ დროსაც იყო უშუქობა, დენი რომ მოდიოდა გვიხაროდა, ვმღეროდით, რომ მიდიოდა მაშინაც ვმღეროდით.
- ნინის პირველი მუსიკალური კონკურსი რომელი იყო?
- "იმედზე“ მონაწილეობდა "ვოისში,“ მისი მენტორი დათო ფორჩხიძე იყო. მაშინ აიდგა ფეხი. შემდეგ იყო „რუსთავი 2“-ზე „იქს ფაქტორი“, სადაც მოგებული თანხით და მალევე წავიდა ამერიკაში. არავისთან არ წასულა, თქვა, უნდა გავაგრძელო მუსიკალური კარიერაო. მშობლები ძალიან თავისუფლად გვზრდიდნენ, მეც შვილი მყავს და ახლა ვერ წარმომიდგენია, ექვსი წლის ასაკში მარტო გავუშვა სკოლაში.
ნინის დამოუკიდებლობა ძალიან დაეხმარა, აი, ასე, ადგა და წავიდა. ამერიკაში ჩასვლის პერიოდი მარტივი არ ყოფილა, მაგრამ ნინი მექსიკით არ წასულა. მუშაობდა სხვადასხვა ადგილებზე, ეს ნორმალური ამბავია, ამას აკეთებს ყველა. ჩვენც ასე ვუყურებდით, თუ დასჭირდებოდა დახმარება, რა თქმა უნდა დავეხმარებოდით. თავადაც თქვა,"ძალიან ამაყი ვიყავი იმისთვის, რომ უკან დავბრუნებულიყავიო...“
- ნინის სასცენო სახელზე რას გვეტყვით, როგორ შეარჩია?
- ორი წლის წინ აირჩია, უფრო მარტივია რომ ხალხმა დაიმახსოვროსო.
- რაც წავიდა საქართველოში თუ ჩამოსულა.
- დიახ, ყოველ წელს ჩამოდის. ოჯახი მოვისიყვარულებთ ხოლმე. აქაური რიტმი მისთვის მაინც მდორეა, ისვენებს ცოტას, სუქდება და უკან ბრუნდება.
- როდესაც გაიგეთ რომ "ვოისში" მონაწილეობდა, თქვენი რეაქცია როგორი იყო?
- მოლოდინს გადააჭარბა, ძალიან ამაყი ვარ, ძალიან ნინის შესრულებით. ყოველთვის აინტერესებს ჩვენი აზრი, რეპეტიციის დროსაც გვირეკავს და ვუსმენთ ხოლმე. მაგრამ ისე აკეთებს ყველაფერს, ბევრს ვერაფერს ურჩევ. ოჯახიდან კიდევ უფრო ემოციურად არიან ჩართულები, ღამეები არ მეძინა, როდესაც ნინის გამოსვლები იყო. ყველა ერთად ვიკრიბებით და მარტივად რომ ვთქვათ, ბოლთას ვცემთ ხოლმე.
- თუმცა ნახევარფინალში გასვლაც ძალიან დიდი წარმატება იყო მისთვის, ხომ არ აქვს უკვე რაიმე შემოთავაზება?
- ჯერჯერობით შოუსთან კონტრაქტი აქვს, სადაც საკმაოდ მკაცრი წესებია გაწერილი. მაგრამ ამერიკა ისეთი ქვეყანაა, რომ შეიძლება ერთ დღეში გახდე ძალიან პოპულარული მომღერალი.
- ნინის პირად ცხოვრებაზე რას გვეტყვით, უცხოურ გამოცემებში წერია, რომ საიდუმლოდ ინახავს....
- ნინი არ არის დაოჯახებული. ძირითადად მომავალზე საუბრობს ხოლმე, რას გააკეთებს კარიერული თვალსაზრისით. მთავარია კარგად იყოს და რაც უნდა კარიერის მხრივ წარმატებას მიაღწიოს.
- ამბობენ, რომ საქართველომ ხელახლა აღმოაჩინა ნინი ბრეგვაძე....
- ძალიან გაზრდილია მუსიკალურად, ძალიან დაიხვეწა, შედარებაც არ არის. თქვენც ისმენდით მენტორების შეფასებებს, თან ვინ აფასებს მაგასაც ხომ აქვს მნიშვნელობა.
წაიკითხეთ ასევე: