"იმისთვის, რომ სპორტულ სკოლაში შევეყვანე, მამაჩემმა გაყიდა მოტოციკლი, რომელიც შვილივით უყვარდა" - გულწრფელი და ემოციური ინტერვიუ: რატომ ატირდა გადაცემაში თემურ ქეცბაია
საქართველოს ეროვნული ნაკრების ყოფილი მწვრთნელი თემურ ქეცბაია გადაცემა "სთორი" - ს სტუმრობდა. ვეტერანმა ფეხბურთელმა გულწრფელად ილაპარაკა მისი ცხოვრების ამა თუ იმ მნიშვნელოვან მოვლენაზე, თუმცა იყო ერთი განსაკუთრებული მომენტი, როდესაც მან ცრემლები ვერ შეიკავა და გადაცემაში ატირდა.
თემურ ქეცბაიამ გარდაცვლილი მშობლები ემოციურად გაიხსენა და აღნიშნა, რომ ყველაფერს გააკეთებდა კიდევ ერთხელ რომ ენახა ისინი.
"მე-6 კლასში ვიყავი, როცა თბილისში, სპორტულ სკოლა ინტერნატში ჩამიყვანა მამაჩემმა. იქ სინჯები იყო, სადაც თავი საუკეთესოდ წარმოვაჩინე, მაგრამ გარკვეული თანხა იყო გადასახდელი, რომ დავეტოვებინეთ. 500 მანეთი იყო საჭირო. მაშინ მამაჩემს ჰყავდა მოტოციკლეტი, რომელიც შვილივით უყვარდა და მოუწია ამ მოტოციკლეტის გაყიდვა, იმისთვის რომ მე სპორტულ სკოლაში ვყოფილიყავი. ამას როგორ დავივიწყებდი, რა თქმა უნდა შვილისთვის ყველაფერს გაიღებ, მაგრამ მარტო მე არ ვიყავი, ჩემს გარდა 3 შვილი ჰყავდა მამაჩემს. მთელი ცხოვრება მახსოვდა ეს მომენტი და ამან დიდი მოტივაცია მომცა, გამეკეთებინა მაქსიმუმი, იმისთვის რომ მამაჩემის იმედი გამემართლებინა.
ძალიან მენატრება ჩემი მშობლები. ყველაფერს გავაკეთებდი, რომ კიდევ ერთხელ მენახა ისინი..." - თქვა თემურ ქეცბაიამ.