სატანისტი, რომელიც 2 მოზარდის რიტუალური მკვლელობისთვის იყო მსჯავრდებული, უკრაინასთან ბრძოლის სანაცვლოდ შეიწყალეს - ნიკოლაი გრაფ ოგოლობიაკის საზარელი ისტორია
იაროსლაველი სატანისტების ბანდის უკანასკნელი წევრი, რომელსაც 2008 წელს, სისხლიანი რიტუალის დროს 2 მოზარდის მკვლელობა ედებოდა ბრალად, ციხიდან გაათავისუფლეს. 33 წლის ნიკოლაი გრაფ ოგოლობიაკი ციხეში 2030 წლამდე უნდა ყოფილიყო. თუმცა, ის ახლა სახლშია. პატიმარი შეიწყალეს უკრაინაში ბრძოლის სანაცვლოდ.
"ეს მართალია, ჩემი შვილი ექვსი თვის განმავლობაში მსახურობდა. ომში დაიჭრა და ის ახლა შშმ პირია. სიარული შეუძლია, მაგრამ ჭრილობა სერიოზული იყო. ნაკლებად სავარაუდოა, რომ ისევ SVO-ში წაიყვანონ“, - ამბობს ნიკოლაის მამა.
ოგოლობიაკ უფროსის თქმით, ნიკოლაი დედასთან ერთად იაროსლავში, ძერჟინსკის რაიონში ცხოვრობს. მშობლები განქორწინებულები არიან და ოჯახი ცდილობს არ გაიხსენოს თხუთმეტი წლის წინ მომხდარი მოვლენები.
მედიაში გავრცელებული ინფორმაციით, ბოლო დროს ნიკოლაი ქალაქის ქუჩებში შავი "ვოლგით" მთვრალი გადაადგილდება, რაც მოსახლეობის შეშფოთებას იწვევს.
- რა მოხდა 15 წლის წინ
2006 წელს იაროსლავში სატანისტების სექტა ჩამოყალიბდა. მისი დამფუძნებელი იყო 15 წლის კონსტანტინე კლიკ ბარანოვი, მოგვიანებით ჯგუფს კიდევ ორი მოზარდი შეუერთდა - ნიკოლაი გრაფ ოგოლობიაკი და ალექსეი ჩისტიაკოვი. ერთი წლის განმავლობაში სექტას შეუერთდნენ ანტონ დოქტორი გოტ მაკოვკინი, სერგეი დისტრის კარპენკო და ალექსანდრე ჰიტლერ ვორონოვი.
სექტის წევრები ორი წლის განმავლობაში ატარებდნენ სისხლიან რიტუალებს. მსხვერპლად იყენებდნენ ძაღლებსა და კატებს. მათ ჰქონდათ იზოლირებული ადგილი, სადაც იმართებოდა შეხვედრები და რიტუალები.
2008 წელს სექტა გაიზარდა და მათ დამფუძნებლის შეყვარებული ქსენია კოვალევა შეუერთდათ. სწორედ კოვალევა იყო პირველი, ვინც ადამიანის სისხლით დაიწყო რიტუალების ჩატარება. გოგონამ მეტსახელად "კარა" აირჩია. პირველი მსხვერპლი, რომელთა სისხლითაც კოვალევამ იბანავა, იყვნენ მეგობრები ოლია პუხოვა და ანა გოროხოვა.
2008 წლის 28 ივნისის საღამოს, სექტის წევრები შეიკრიბნენ ნიკოლაი გრაფ ოგოლობიაკის ბინაში. იმ საღამოს ოლია და ანა სატანისტების მოსანახულებლად მივიდნენ. გოგონები თავს გოთური სუბკულტურის ნაწილად მიიჩნევდნენ.
სექტის წევრებმა გოგონები დაათვრეს და შემდეგ მაჩეტებით აჩეხეს. მკვლელებმა მოჭრილ თავებთან სურათები გადაიღეს. მოგვიანებით კი გვამები დაანაწევრეს... იმავე ღამეს ცხედრები დამარხეს და გრაფ ოგოლობიაკის ბინაში დაბრუნდნენ.
სექტის წევრებმა მოკლე ხანში კიდევ ორი რიტუალური მკვლელობა ჩაიდინეს. ისინი მსხვერპლად ყოველთვის ახალგაზრდებს ირჩევდნენ.
სასამართლო პროცესის დასაწყისში საქმის მასალების მოცულობამ 35 ტომს გადააჭარბა. პირველი პროცესი 2010 წლის 24 თებერვალს იაროსლავის რეგიონალურ სასამართლოში გაიმართა, უკანასკნელი კი, რომელზეც დამნაშავეებმა განაჩენი მოისმინეს, 2010 წლის 26 ივლისს.
იმ დღეს სატანისტები სასამართლო დარბაზში თავაწეულები შევიდნენ, სახეზე ღიმილით... ისინი ქედმაღლურად იქცეოდნენ...
გრაფი ყველაზე დიდხანს იდგა განაჩენის გამოტანისას პროცესში, რადგან მხოლოდ ის იყო სრულწლოვანი. ახალგაზრდა მამაკაცი დამნაშავედ ცნეს მიცვალებულთა სამარხების შეურაცხყოფაში, რაც ჩადენილი იყო ადამიანთა ჯგუფის მიერ, ორი მოზარდის მკვლელობაში, ჯგუფის მიერ წინასწარი შეთქმულების შედეგად, გარდაცვლილთა ცხედრების ჯგუფურ შეურაცხყოფაში. მას 20 წელი მიუსაჯეს მაქსიმალური უსაფრთხოების კოლონიაში (პირველი ხუთი წელი ციხეში).
სექტის დამფუძნებელი კონსტანტინე ბარანოვი დამნაშავედ იქნა ცნობილი სამი ადამიანის მკვლელობის ორგანიზებაში, წინასწარი შეთქმულების შედეგად ჯგუფის მიერ ჩადენილი მკვლელობის, ადამიანთა ჯგუფის მიერ მიცვალებულთა ცხედრების შეურაცხყოფასა და ქურდობაში. მას 10 წელი მიესაჯა საერთო რეჟიმის კოლონიაში.
ალექსანდრე ვორონოვს ასევე 10 წელი მისცეს განსაკუთრებული რეჟიმის კოლონიაში, ალექსეი სოლოვიოვსა და ალექსეი ჩისტიაკოვს 9 წელი საერთო რეჟიმის კოლონიაში. ქსენია კოვალევას რვა წელი მიესაჯა საერთო რეჟიმის კოლონიაში. სერგეი კარპენკოს, რომელიც უშუალოდ არ მონაწილეობდა მკვლელობებში, ორი წელი მიუსაჯეს სასჯელაღსრულების კოლონიაში.
"კანონის თანახმად, არასრულწლოვანთა სასჯელი, განურჩევლად ჩადენილ დანაშაულთა რაოდენობისა, ფაქტობრივი გარემოებისა თუ არაადამიანურობისა, არ შეიძლება აღემატებოდეს 10 წელს“, - განმარტა იაროსლავის ოლქის პროკურატურის წარმომადგენელმა ტატიანა რაჩინსკაიამ.
სასამართლომ მაკოვკინი შეშლილად გამოაცხადა (მან თავი მოჰკვეთა ცხედრებს). მკვლელი იძულებითი მკურნალობისთვის გაგზავნეს სამედიცინო დაწესებულებაში. განაჩენის გამოტანიდან 10 წლის შემდეგ სისხლიანი მკვლელობის თითქმის ყველა მონაწილე გაათავისუფლეს. ქსენია კარა კოვალევა იყო პირველი, ვინც გათავისუფლდა. ჯერ კიდევ სასამართლო პროცესის დროსაც მისი ადვოკატის თქმით, გოგონას კიბო ჰქონდა. მან ციხეში სულ რაღაც ერთი წელი გაატარა და ლეიკემიის დიაგნოზით საპატიმრო დატოვა.