"თავდამსხმელის დუმილი სერიოზულ ეჭვს მიჩენს, რომ ჩემი შვილის სიცოცხლე კვლავ საფრთხეშია... ვერ დავიჯერებ შემოთავაზებულ ვერსიას" - რას წერს კოსტა სანიკიძის დედა?
კოსტა სანიკიძის დედა ირმა სანიკიძე იმ დღეს იხსენებს, როცა მათ სახლში უცხო პირი შეიჭრა და მისი შვილი მძიმედ დაჭრა. როგორც ის სოციალურ ქსელში წერს, თავდამსხმელის დაკავების მიუხედავად, თავს ისევ დაუცველად გრძნობს, ვინაიდან გაჟღერებული ვერსია, ფსიქიკურ ჯანმრთელობასთან დაკავშირებით და თავდამსხმელის დუმილი, სერიოზულ ეჭვს უჩენს.
"მეგობრებო, გუშინ გადატანილი ტრაგედიის შემდეგ, ჯერ არ ვიცი, როგორ გავაგრძელებთ ცხოვრებას მე და ჩემი ოჯახი, მათ შორის არასრულწლოვანი შვილი, რომელიც ჩემთან ერთად ჩვენივე სახლის ეზოში შეესწრო ენით აღუწერელ უბედურებას, თუ როგორ სადისტურად გვიკლავდნენ თვალწინ ჩემს შვილს Kosta Sanikidze იმ ჯოჯოხეთურ ღამეს, როდესაც ჩემი შვილი თვალწინ იცლებოდა სისხლისგან და იწვა თავისივე სისხლის გუბეში, მე და ჩემი არასრულწლოვანი შვილი უსუსურები ვედექით თავზე და ვერაფრით ვეხმარებოდით.
მადლობა უფალს და Healthycore • ჰელსიკორი საავადმყოფოს მთელ პერსონალს, რომლებმაც გადამირჩინეს მომაკვდავი შვილი. მიუხედავად იმისა, რომ თავდამსხმელი, ჩემი დაჭრილი შვილის და სამართალდამცავი მეზობლის მიერ იქნა ადგილზევე დაკავებული და პოლიციისთვის გადაცემული, მაინც არ ვარ მშვიდად და დარწმუნებული ვარ, რომ ჩემს შვილს, ისევ ემუქრება საფრთხე, ვინაიდან თავდამსხმელის მიერ პირველი მცდელობის ფაქტზე პოლიციის მიერ “ჩატარებული გამოძიების” მიუხედავად ჩვენ აღმოვჩნდით დაუცველები და მე მქონდა იმედი, რომ პოლიცია გაატარებდა ყველა საჭირო ღონისძიებას, რომ ჩემი შვილის სიცოცხლეს საფრთხე არ შეექმნებოდა.
თუმცა, ჩემი იმედი აღმოჩნდა ფუჭი, რადგანაც 2 ნოემბრის შემდეგ, მან კვლავ გაბედა და განმეორებით დაგვესხა თავს და მიუხედავად იმისა, რომ თავდასხმისთანავე, სანამ შემოიჭრებოდა ეზოში დავრეკე 112-ში, მაგრამ მაინც ვერ დამიცვეს შვილი და პოლიციის მოსვლამდე ჩვენივე ძალებით მოგვიწია თავდამსხმელის მოგერიება და დაკავება, რაც ლამის ჩემი შვილის სიცოცხლის ფასად დაგვიჯდა.
თავდამსხმელის დაკავების მიუხედავად, თავს ისევ დაუცველად ვგრძნობ, ვინაიდან გაჟღერებული ვერსია, ფსიქიკურ ჯანმრთელობასთან დაკავშირებით და თავდამსხმელის დუმილი, სერიოზულ ეჭვს მიჩენს, რომ ჩემი შვილის სიცოცხლე კვლავ საფრთხეშია, ვერ დავიჯერებ შემოთავაზებულ ვერსიას და მგონია, რომ თავდასხმა, ვითომცდა უმიზეზოდ და თანაც ასეთი ფორმით არ შეიძლება იყოს ერთი ადამიანის დაგეგმილი.
გთხოვთ ყველას, ვისაც შეგწევთ უნარი დამეხმარეთ ჩემი შვილის სიცოცხლის დაცვაში და ჭეშმარიტების დადგენაში. ჩემი მწარე გამოცდილებიდან გამომდინარე ვვარაუდობ, რომ პოლიცია, ისევე გულგრილად და ზერელედ მიუდგება ამ ფაქტს, როგორც პირველი თავდასხმის მცდელობისას" - წერს სანიკიძის დედა.
ცნობისთვის, 19 ნოემბერს დილით მომღერალი კოსტა სანიკიძე, რომელიც ფართო საზოგადოებამ სატელევიზიო რეალითი შოუ, "პრაიმ ჰაუსიდან" გაიცნო, საკუთარ სახლში დაჭრეს. შემთხვევა გამთენიისას მოხდა. როგორც ცნობილი გახდა, მომღერალი დედის თვალწინ, საკუთარ სახლში დაჭრეს. მას ხუთი ჭრილობა მუცლის არეში ცივი იარაღით მიაყენეს. მძიმე მდგომარეობაში მყოფი სანიკიძე კლინიკაში გადაიყვანეს, სადაც ოპერაცია ჩაუტარდა და ამ დროისთვის მისი მდგომარეობა სტაბილურად მძიმეა. როგორც მეგობრები ამბობენ, კოსტა უკვე გონს მოვიდა, თუმცა ის რეანიმაციულ განყოფილებაში რჩება.
წაიკითხეთ ასევე: