"ორი დღეა, ცემა-ტყეპა მიდის აქციაზე ქალების, არავის ინდობენ" - ვარლამ გოლეთიანი და აქციის მონაწილეები გარემოს დაცვის სამინისტროში შესვლას ითხოვენ
დღეს უკვე სამუშაო დღე დაიწყო, ახლა რა არგუმენტი ექნებათ, დღეს მაინც, ყველას შეუძლია ამ კარიდან შესვლა საშვით. ხომ ასეა? ჩვენ, როგორც მოქალაქეებს, ამ შემთხვევაშიც აგვეკრძალება ტერიტორიაზე შესვლა თუ როგორ იქნება? ახლა ვაპირებ, რომ შევიდე და ვიკითხო, - ამის შესახებ „რიონის ხეობის გადარჩენისთვის” ერთ-ერთმა ლიდერმა, ვარლამ გოლეთიანმა გარემოს დაცვისა და სოფლის მეურნეობის სამინისტროსთან განაცხადა, სადაც რაჭის დღეებთან დაკავშირებით აქცია უკვე მესამე დღეა მიმდინარეობს.
ამ წუთებში, აქციის მონაწილეები მათთვის სამინისტროში შესასვლელად საშვების გაცემას ელოდებიან.
გოლეთიანის განმარტებით, ისინი ითხოვენ, რომ მინისტრი ოთარ შამუგია სამინისტროსთან მიმდინარე მოვლენებს გამოეხმაუროს.
"დღეს უკვე სამუშაო დღე დაიწყო. პრაქტიკულად ორი დღეა, ცემა-ტყეპა მიდის აქ ქალების, არავის ინდობენ. ჩვენ პირადად, პირველად ვნახეთ პოლიცია ასე იქცეოდეს. ახლა რა არგუმენტი ექნებათ, დღეს მაინც ხომ ყველას შეუძლია ამ კარიდან შესვლა საშვით. ხომ ასეა? ჩვენ, როგორც მოქალაქეებს, ამ შემთხვევაშიც აგვეკრძალება ტერიტორიაზე შესვლა თუ როგორ იქნება? მინდა, რომ გავარკვიო. ახლა ვაპირებ, რომ შევიდე და ვიკითხო. აქამდე ვხედავდით, რომ პოლიცია ჩაყენებული ჰყავდათ და ვხედავდით, როგორ განვითარდა მოვლენები. ვითხოვთ, რომ მინისტრი გამოგვეხმაუროს, იმიტომ, რომ ვხედავთ, პირდაპირ რეპრესიებს აწარმოებენ პოლიციის გავლით და ხელისუფლებიდან არავინ, გადაწყვეტილების მიმღები, მინისტრი ან მოადგილე, ანუ არავინ გრძნობს ვალდებულებას, რომ გამოგვეხმაუროს, გამოვიდეს და ერთი სიტყვა თქვას, რომ რას ვითხოვთ ჩვენ არასწორს ან არაკანონიერს. პროტესტის უფლება ამ ქვეყანაში ადამიანებს მგონი აქვთ ხომ?" - განაცხადა ვარლამ გოლეთიანმა.
ცნობისთვის, გარემოს დაცვისა და სოფლის მეურნეობის სამინისტროსთან რაჭის ტყეებთან დაკავშირებით აქცია უკვე მესამე დღეა მიმდინარეობს.
აქციის მონაწილეები გარემოს დაცვისა და სოფლის მეურნეობის მინისტრთან, ოთარ შამუგიასთან შეხვედრას და იმის გაგებას ითხოვენ, რა გეგმა აქვს სამინისტროს რაჭის ტყეებთან დაკავშირებით.
ასევე, პროტესტის მონაწილეების ძირითადი მოთხოვნაა - რაჭა-ლეჩხუმისა და ქვემო სვანეთის რეგიონში 2022 წლის მარტში 104 712 ჰექტარ ტყეზე 49-წლიანი სამონადირეო ლიცენზიის გაუქმება.