ალექსეი არესტოვიჩის წინააღმდეგ კიდევ ერთი სისხლის სამართლის საქმე აღძრეს: "ველოდებით "მზვერავის" უკრაინაში სწრაფ დაბრუნებას“ - რას წერს რადას დეპუტატი?
უკრაინის პოლიციამ მეორე სისხლის სამართლის საქმე აღძრა პრეზიდენტის აპარატის ყოფილი მრჩევლის ალექსეი არესტოვიჩის წინააღმდეგ.
"მოქალაქე არესტოვიჩის წინააღმდეგ დაწყებულია სისხლის სამართლის საქმის წარმოება. ამის შესახებ მაცნობა უკრაინის ეროვნულმა პოლიციამ, მე კი თქვენ გაცნობებთ. ველოდებით "მზვერავის" უკრაინაში სწრაფ (თუმცა საეჭვო) დაბრუნებას“, - წერს უმაღლესი რადად დეპუტატი ნატალია პიპა პარტია "გოლოსიდან“. საქმე შეეხება სწორედ პიპასა და არესტოვიჩსა შორის არსებულ დაპირისპირებას.
უკრაინის პოლიცია აცხადევს, რომ 29 დეპუტატის ჯგუფის მიმართვის საფუძველზე დაწყებულია სისხლის სამართლის წარმოება დანაშაულის შესახებ ცრუ შეტყობინებასთან დაკავშირებით.
შეგახსენებთ, რომ ალექსეი არესტოვიჩსა და დეპუტატ ნატალია პიპას შორის უთანხმოება რამდენიმე თვის წინ დაიწყო. ზაფხულში ნატალია პიპას ოდესის ქუჩაში ერთ-ერთ მოზარდთან დაპირისპირება მოუვიდა. ბიჭი ქუჩაში რუსულ ენაზე ასრულებდა საბჭოთა მომღერლის, ვიქტორ ცოის სიმღერებს, რაზეც სახალხო დეპუტატმა შენიშვნა მისცა.
დეპუტატს ახალგაზრდამ უცენზურო სიტყვებით მიმართა, რის შემდეგაც ქალმა პოლიციაში იჩივლა. მომხდარის შემდეგ, ალექსეი არესტოვიჩმა სასამართლოს მიმართა და ნატალია პიპა უკრაინაში ეროვნული შუღლის გაღვივებაში დაადანაშაულა და მის წინააღმდეგ სისხლის სამართლის გამოძიების დაწყება მოითხოვა.
ოქტომბერში დეპუტატების ჯგუფმა უკრაინის ნაციონალურ პოლიციაში განცხადება შეიტანა და არესტოვიჩს დანაშაულის შესახებ ცრუ შეტყობინებაში დასდეს ბრალი.
ამ დროისთვის არესტოვიჩი საზღვარგარეთ იმყოფება. ორი კვირის წინ ყოფილმა მრჩეველმა აშშ-დან გამოაქვეყნა ფოტოები.
დღეს არესტოვიჩმა სოციალურ ქსელში რამდენიმე განცხადება გამოაქვეყნა. ყოფილი მრჩეველი წერს, რომ მის ადვოკატებს განცხადებების და სარჩელის რეგისტრაციაზე უარს ეუბნებიან.
"ყველაზე სამართლიანი უკრაინული მართლმსაჯულება მდგომარეობს იმაში, რომ ჩემს ადვოკატებს უარი უთხრეს ყველა განცხადებისა და შეგებებული სარჩელის მიღებაზე. უბრალოდ, არ არეგისტრირებენ. ეს ნიშნავს, რომ ხორციელდება კონტროლი თავად გვარზე. საინტერესოა, ვინ აქვს ქვეყანაში ასეთი ძალაუფლება? ჩვენ, რა თქმა უნდა, სასამართლოს გზით წავალთ. დემოკრატია შვიდმილიანი ნაბიჯებით მიაბიჯებს. ერთი-ორი. ერთი-ორი“, – წერს არესტოვიჩი.
წაიკითხეთ ასევე: