მოლდოვისა და ავსტრიის პრეზიდენტების შეხვედრა ინციდენტით დასრულდა - მაია სანდუს ძაღლმა ალექსანდერ ვან დერ ბელლენს უკბინა (ვიდეო)

ავსტრიის პრეზიდენტს ალექსანდერ ვან დერ ბელლენს მთლად სასიამოვნო დღე ვერ ჰქონდა. ის კიშინიოვში მოლდოვის პრეზიდენტ მაია სანდუს შეხვდა. შეხვედრის დასრულების შემდეგ, სანდუს ძაღლისთვის მოფერება მოინდომა, რა დროსაც მაია სანდუს ოთხფეხა მეგობარმა უკბინა.

მოლდოვას პრეზიდენტმა მიუსაფარი ძაღლი მას შემდეგ შეიფარა, რაც ის ავარიაში მოყვა და ერთი თათი დაკარგა. კოდრუცის (ძაღლის სახელი - რედ.), სავარაუდოდ, უცხო პირის შეეშინდა და ავსტრიის პრეზიდენტს ხელზე ამიტომაც უკბინა.

ინციდენტი სანდუს ადმინისტრაციის ეზოში მოხდა. მოგვიანებით ავსტრიის პრეზიდენტი მოლდოვას პარლამენტის წარმომადგენელ იგორ გროსუსთან შეხვედრაზე გამოჩნდა, რა დროსაც ვან დერ ბელლენს ხელი შეხვეული ჰქონდა.

ცნობისთვის, ავსტრიის პრეზიდენტი კიშინიოვში სამუშაო ვიზიტით იმყოფება. 17 ნოემბერს ის და სანდუ მოლდოვურ-ავსტრიულ ბიზნესფორუმში მიიღებენ მონაწილეობას.

ვან დერ ბელლენი ღიად უჭერს მხარს მოლდოვის ევროკავშირში გაწევრებას, რაზეც, იმედია, დაკბენის მერე არ აიღებს ხელს...

• მოამზადა: ანრი კურტანიძემ