"თამარ ჩარკვიანს ნათია მეზვრიშვილმა "ნაცმოძრაობაზე" არაფერი უნდა უთხრას! მე რომ ქუჩაში ვიდექი, ადეიშვილის პროკურორი იყო" - თაკო ჩარკვიანი
მე ვფიქრობ, ნიკა მელია პოლიტიკური „ლუზერია“ და დიდ ყურადღებასაც აღარ იმსახურებს, მე ასე ვხედავ მას, - ამის შესახებ საპარლამენტო უმცირესობის წევრმა თაკო ჩარკვიანმა „პალიტრანიუსის“ გადაცემა „დღის ნიუსრუმში“ განაცხადა.
მისი თქმით, ნიკა მელია დიდი ხანია ცდილობს „ნაციონალური მოძრაობის“ დანგრევას, თუმცა ამას ვერ შეძლებს. როგორც ჩარკვიანმა აღნიშნა, ის, რომ მელია გამუდმებით იქცევა მმართველი პარტიის სასარგებლოდ, დიდ კითხვის ნიშნებს აჩენს.
„მე მაქვს მეგობრული, პარტნიორული ურთიერთობა „ნაციონალურ მოძრაობასთან“, ძალიან მშვენივრად აქვთ ვითარება მოგვარებული, მელია რაღაცას თვითონ გამოხტება ხოლმე. ეს კაცი, მე ვფიქრობ, პოლიტიკური „ლუზერია“ და ვფიქრობ, დიდ ყურადღებასაც აღარ იმსახურებს, მე ასე ვხედავ მას. თუ რაიმეს გაკეთება შეგიძლიაო, უთხრა საქართველოს მესამე პრეზიდენტმა, იმ პარტიის დამფუძნებელმა, ამდენ ლანძღვას, სჯობს, გააკეთოთო. მე, მესამე პრეზიდენტის გარეშეც, ჩემი აზრი მაქვს, როგორც პოლიტიკოსს და მივიჩნევ, რომ ასე ანგრევდე იმ პარტიას, რომლის თავმჯდომარეც იყავი, ან რაღაც ავადმყოფური მოუნელებლობა გჭირს, ან დავალებას ასრულებ, მთელი პასუხისმგებლობით ვამბობ. სულ მმართველი პარტიის სასარგებლოდ იქცეოდე, ეს დიდი კითხვის ნიშანს ბადებს. პარტიის ნგრევაში იღებს მონაწილეობას. ვერაფრით ვერ დაანგრია ეს პარტია, ვერც დაანგრევს. ვანო მერაბიშვილი, რომლის მიმართაც მე, თამარ ჩარკვიანს, ოპოზიციონერობის დროს მქონდა პრეტენზიები, ის ჩაჯდა სამარტოო საკანში, ხაჭაპურები არ უჭამია იქ, სამარტოო საკანში იჯდა და მოიხადა. ჩემს პარტიას ჰქვია „კანონი და სამართალი“, მე მინდა სამართლებრივი ქვეყანა ავაშენო, მე ვეღარაფერს ვეუბნები მერაბიშვილს. ის არის იმ პარტიის დამფუძნებელი, ჩემს პარტიას ხომ არ უგულშემატკივრებს ის კაცი, ციხიდან რომ გამოვიდა, თავისას გულშემატკივრობს.
მელია გამოქანებულია და ჩხუბობ! ამხედრებული ამ კეზერაშვილის ნაჩუქარ ჯიპზე, თავის დროზე იმ პარტიის თავმჯდომარე, დღეს რომ კეზერაშვილზე ლაპარაკობს“, - განაცხადა ჩარკვიანმა.
მისი თქმით, ოპოზიციას ბევრი აქვს სამუშაო და თუ მას ხელისუფლების შეცვლა სურს, საკუთარი სიმპათიებისა და ანტიპათიების მიუხედავად უნდა გაერთიანდეს.
„ძალიან სერიოზული სამუშაოა ოპოზიციურ ფლანგზე. მე ამაზე დიდი ხანია ვესაუბრები ყველას. გავიგე, რომ ერთმანეთი ბევრს შეიძლება არ მოსწონდეს, მაგრამ თუკი ჩვენ ძალიან მწვავედ და სერიოზულად ვუდგებით იმას, რომ გვინდა ხელისუფლების შეცვლა, მაშინ უნდა გაერთიანდეს. ერთი რაღაც ეს არის მყარი დასავლური კურსი, რის გამოც შენ უნდა გაერთიანდე“,- განაცხადა თამარ ჩარკვიანმა.
კითხვის პასუხად, „ნაციონალური მოძრაობის“ მიერ გამოცხადებულ „ღია კარში“ გაერთიანების მიზნით რატომ არავინ შევიდა გიორგი ვაშაძის გარდა, თაკო ჩარკვიანმა პარტია „საქართველოსთვის“ წევრების მიდგომა გააკრიტიკა.
„არა მგონია, ჩემზე უფრო მაგარი ოპოზიცია იყოს რომელიმე გახარიას პარტიაში მყოფი ადამიანი, რომლებიც პროკურორები იყვნენ „ნაციონალური მოძრაობის“ დროს. თამარ ჩარკვიანს ნათია მეზვრიშვილმა „ნაციონალურ მოძრაობაზე“ არაფერი უნდა უთხრას! სირცხვილია! ადეიშვილის პროკურორი იყო. მე რომ ქუჩაში ვიდექი, პროკურორი იყო. „ნაციონალურ მოძრაობაზე“ მათ ხომ არ შეიძლება ისაუბრონ, არაა! ამიტომ დავიწყე საუბარი, რომ „ნაციონალურ მოძრაობაში“ ახალგაზრდული ფრთაა მისული. ლაშა ფარულავას რამე ბრალი აქვს ოდესმე? ლევან ხაბეიშვილს ბრალი აქვს? გიორგი ვაშაძეს რაიმე ბრალი აქვს სადმე?“,- განაცხადა თაკო ჩარკვიანმა.