"ბინას შვილის დასახმარებლად კი არ ვყიდი, უბრალოდ, თავიდან ვიშორებ... ჩემთვის ისეთი ძნელია ეს ყველაფერი, ვერც წარმოიდგენთ" - რას პასუხობს გოჩა მანველიძე მოკლული შოთიკო საკანდელიას ოჯახს?
ნიდერლანდების პოლიცია ამ დრომდე ეძებს 28 წლის თორნიკე მანველიძეს, რომელიც 32 წლის შოთიკო საკანდელიას მკვლელობაშია ბრალდებული. შემთხვევა 19 სექტემბერს ერთ-ერთ სასტუმროში მოხდა. მოკლულ ახალგაზრდას ჭრილობა ყელის არეში დანით აქვს მიყენებული. მას დამნაშავემ პირდაპირ საძილე არტერია დაუზიანა.
- როგორც ჩვენთვის გახდა ცნობილი, მანველიძეს შენგელიასთან უთანხმოება ჯერ კიდევ საქართველოში ჰქონდა და მოკლულის ახლობლები თვლიან, რომ ეს განზრახ მკვლელობა იყო. რა გახდა ამ შემზარავი მკვლელობის მიზეზი, ამას, ალბათ, სამართალდამცველები დაადგენენ.
მკვლელობიდან მალევე ნიდერლანდების პროკურატურამ თორნიკე მანველიძის ფოტო გაავრცელა და მოუწოდა ყველას, მისი ნახვის შემთხვევაში სამართალდამცავ უწყებებს მიმართონ. თორნიკე ცნობილი მწერლის გოჩა მანველიძის შვილია.
"არ არის თორნიკე მოძველბიჭო და მოხულიგნო ტიპი, ევროპული აზროვნების და ყაიდის ადამიანია. ვინმესთან კონფლიქტზეც არაფერი მსმენია, ამიტომ ვარ გაოგნებული... როცა მითხრეს, კარგა ხანს აზრზე ვერ მოვდიოდი, ახლაც ვერ ვიჯერებ... კარგი განწყობით და მშვენიერ ხასიათზე წავიდა, არავისთან არავითარი პრობლემა არ ჰქონია "- გვითხრა 2 თვის წინ, გოჩა მანველიძემ, როდესაც მას ნიდერლანდებში მომხდარი მკვლელობის საკითხზე კომენტარისთვის დავურეკეთ.
მოკლული შოთიკო საკანდელიას ოჯახი სამართალს და დამნაშავის დასჯას ითხოვს. როგორც საკანდელიას დედის მეგობარი წერს, საქართველოში ადვოკატის აყვანას აზრი არ აქვს, რადგან საქმის ძიება ნიდერლანდებში მიმდინარეობს.
"ოჯახი სამართალს ეძებს. უნდათ, რომ დამნაშავე იპოვონ და სათანადოდ დაისაჯოს, მაგრამ მთელი უბედურება იმაშია, რომ ურჩიეს, საქართველოში ადვოკატის დაქირავებას აზრი არა აქვს, ნიდერლანდებში უნდა გააკეთოთ ესო. წარმოიდგინეთ, რამდენ სირთულესთანაა ეს დაკავშირებული, თანხებთან, კონტაქტებთან, ენის ბარიერთან. ოჯახი მარტვილში ცხოვრობს. ვაცნობიერებ, რომ მძიმე სიტუაციაა, მაგრამ არ მინდა დავიჯერო, რომ დამნაშავის მონახვა შეუძლებელია. ასე უნდა შერჩეს ეს დანაშაული და გააგრძელოს ცხოვრება? ჩემ შვილს რომ გაეკეთებინა ეს, თვალს არ დავახამხამებდი, ჩემი ხელით მივიყვანდი პოლიციაში. მამამისი კი სახლს ყიდის თურმე, ჩემს შვილს უნდა დავეხმაროო. მწერალია, სხვათა შორის, ვინ იცის, რა გულისამაჩუყებელ წიგნებს წერს.
არც ვიცი, რატომ ვწერ ამ სტატუსს, რას ველი. ამ ეტაპზე რაც ყველაზე მეტად სჭირდებათ, ესაა იურისტი ნიდერლანდებში, სავარაუდოდ ქართველი. ბევრი ფრენდი მყავხართ, ჟურნალისტი, იურისტი, პოლიტიკოსი, აქტივისტი... იქნებ ვინმემ რაიმე ურჩიოთ ოჯახს, ან გააზიაროთ მისი (ან ჩემი) სტატუსი, იქნებ რაიმე გზა გამოჩნდეს მათ დასახმარებლად." - წერს მოკლულის დედის მეგობარი.
AMBEBI.GE გოჩა მანველიძეს კიდევ ერთხელ დაუკავშირდა, რომელიც ბინის შესახებ გავრცელებულ ინფორმაციას უარყოფს:
"ეს ბინა ჩემი შვილისთვის მქონდა შეძენილი, განვადებით ვიყიდე. ამ თანხის გადამხდელი არ ვარ, ბინას მის დასახმარებლად კი არ ვყიდი, უბრალოდ, თავიდან ვიშორებ. ბანკი სახლში მივარდება და დავუბრუნო იმ ხალხს ფული, კრედიტი ხომ უნდა დამეფარა? ამ ხალხის მესმის, ადამიანურად, ამხელა ტრაგედია მოხდა, მაგრამ როგორც წარმოუდგენიათ, ასე არაა. ამხელა ვალი დარჩა ამ ბინას, დღე არ გავა, ბანკის წარმომადგენლებმა რომ არ დამირეკონ.
რამდენიმე მაკლერს მივმართე, ბინა გამაყიდინეთ - მეთქი და როცა ისინი განცხადებებს აქვეყნებდნენ, ეს ადამიანები კომენტარებს უწერდნენ. მერე მაკლერები მირეკავდნენ, ასეთი რაღაც არის, ცუდად ვგრძნობთ თავს და თავი გამანებეთო. ასეთ ვითარებაში ამყოფებენ ამ ბინას, რაღაცნაირად ცდილობენ ხელი შემიშალონ. კი, ბატონო, წერონ რაც უნდათ, მე როგორ დავუშლი... ჩემს შვილზე არც საქართველოდან, არც ევროპიდან საერთოდ არავინ დამკავშირებია და ერთი კითხვა არ დაუსვამთ. იქაური პოლიცია რას საქმიანობს, წარმოდგენა არ მაქვს, აქაურს კიდევ გავიგებდი, არანაირი ინფორმაცია არ მაქვს. ჩემთვის ისეთი ძნელია ეს ყველაფერი, ვერც წარმოიდგენთ".