"ვიცი, რომ რაღაც მომენტში დავმარცხდები" - ავსტრალიელი მსახიობი და მომღერალი, ჯონი რუფო 35 წლის ასაკში გარდაიცვალა

ავსტრალიელი მსახიობი და მომღერალი ჯონი რუფო 35 წლის ასაკში გარდაიცვალა. მსახიობი 2017 წლის შემდეგ, ტვინის კიბოს ებრძოდა.

„დღეს ჩვენს საყვარელ ჯონისთან დამშვიდობება მოგვიწია. იგი ოჯახის გარემოცვაში მშვიდად გარდაიცვალა. წარმოუდგენელი ნებისყოფის იყო. ბოლომდე იბრძოდა დაავადების წინააღმდეგ. ასეთი მშვენიერი სული კიდევ ბევრი რამის გაცემას შეძლებდა. ყველას გვიყვარხარ, ჯონი და მთელი ცხოვრება გვემახსოვრები“ - ნათქვამია მსახიობის ოჯახის განცხადებაში.

რუფომ პოპულარობა X Factor-ის საშუალებით მოიპოვა. მოგვიანებით იგი სერიალ „Home and Away“- ის მსახიობი გახდა. გასულ წელს ინტერვიუში მან თავის დაავადებაზე ისაუბრა:

"ჩემი დიაგნოზის სიცოცხლის საშუალო ხანგრძლივობა სამი წელი იყო. ამ დაავადებას უკვე 5 წელია ვებრძვი, ასე რომ, შეიძლება ითქვას, ვიმარჯვებ. ვიცი, რომ რაღაც მომენტში დავმარცხდები. მაგრამ ჩემი მთავარი მიზანი ახლა იმ ადამიანების დახმარებაა, რომლებიც მსგავს დიაგნოზს ებრძვიან“, - ამბობდა მსახიობი.