"მათ თავიანთი მოვალეობა ღირსეულად შეასრულეს" - რას წერს კარიკატურული ფიგურა კოკოითი თამაზ გინტურის მკვლელებზე, რომელთა პირადი ინფორმაცია, მისი თქმით, მოღალატეებმა მიაწოდეს ქართველებს

ე.წ. სამხრეთ ოსეთის ყოფილი დე ფაქტო პრეზიდენტი, ედუარდ კოკოითი, 6 ნოემბერს საოკუპაციო ხაზთან მომხდარ შემთხვევას ეხმიანება. შეგახსენებთ, რომ 6 ნოემბერს ოკუპანტებმა საქართველოს მოქალაქე, თამაზ გინტური მოკლეს, ხოლო მასთან ერთად მყოფი კიდევ ერთი პირი, დავით დოთიაშვილი გაიტაცეს. მოგვიანებით სოციალურ ქსელებში გამოქვეყნდა იმ ოკუპანტების დოსიეები, რომლებიც ე.წ. საზღვართან არიან და შესაძლოა, პირდაპირ კავშირში იყონ გინტურის მკვლელობასთან.

გარდა ამისა, თამაზ გინტურის ოჯახი სავარაუდო მკვლელების ვინაობას ასახელებს. გინტურის ძმა "მთავარ არხთან“ საუბრისას ამბობს, რომ დანაშაული ორმა პირმა ჩაიდინა. ესენი არიან ვასილ დემიდოვი და კოლია ისჩენკო. ორივე ოკუპანტი ცხინვალში მსახურობს.

• "ტელეგრამზე" გამოქვეყნებული პოსტით კოკოითი ემუქრება "მათ ვინც ეს ინფორმაცია საქართველოს გადასცა". გთავაზობთ კოკოითის პოსტის შემოკლებულ ვერსიას:

"ყველამ ვიცით 6 ნოემბერს მომხდარი ინციდენტის შესახებ. ყურადღებით ვაკვირდებით ამ სიტუაციას. სასაზღვრო სამსახურმა საქართველოს ორი მოქალაქის მიერ სამხრეთ ოსეთის საზღვრის დარღვევის მცდელობა აღკვეთა. სამართალდამცველების მუშაობის შედეგად ერთი დაკავებულია, ხოლო მეორე, რომელმაც წინააღმდეგობა გაუწია, სასიკვდილოდ დაიჭრა.

იმის გათვალისწინებით, რომ მოკლული 2008 წელს ჩვენს რესპუბლიკაზე თავდასხმაში მონაწილეობდა, ჩვენთვის, სამხრეთ ოსეთისთვის ის იყო სამხედრო დამნაშავე.

საქართველო ამ სიტუაციას იყენებს საერთაშორისო საზოგადოების ყურადღების მისაპყრობად და სიტუაციის კიდევ უფრო მეტად ესკალაციისთვის.

ოსმა და რუსმა მესაზღვრეებმა თავიანთი მოვალეობა ღირსეულად შეასრულეს, მესაზღვრეების წესდების სრული დაცვით. მინდა ხაზი გავუსმა მათ პროფესიონალიზმს. რუსები სამხრეთ ოსეთში იმყოფებიან სახელმწიფოთაშორისი შეთანხმების საფუძველზე, პირადად მინდა მადლობა გადავუხადო მათ, ბიჭები საქმეს შესანიშნავად, სტანდარტების დაცვით ასრულებენ.

• როგორც ვიცით, თბილისელ პროვოკატორებს ხელში ჩაუვარდათ პირადი ინფორმაცია მესაზღვეების შესახებ. როგორ და საიდან მიაღწია მათთან ამ ინფორმაციამ, ცალკე თემაა, მათ სინდისზე იყოს, ვინც დღეს მტრის სახელმწიფო სპეცსამსახურთან თანამშრომლობს და საკუთარ ხალხს ღალატობს. სამწუხაროდ, ხშირდება ასეთი შემთხვევები.

ქართველი რადიკალები ავრცელებენ პერსონალურ ინფორმაციას სამხრეთ ოსეთში რუსი მესაზღვრეების შესახებ, ასევე პირად ინფორმაციას მათი ოჯახის წევრების შესახებ. ჩვენ არ შეგვაშინებს ასეთი საზიზღარი ქმედებები. მათ, ვინც ამ მონაცემებს აგროვებს და ავრცელებს, იცოდეს, რომ ჩვენ არ მივცემთ არც ჩვენი, არც რუსი მესაზღვრეების და არც მათი ოჯახის წევრებისთვის ზიანის მიყენების უფლებას.

მინდა შევახსენო ყველას, ვინც დღეს ცდილობს დაემუქროს ოს და რუს მესაზღვრეებს, რომ ჩვენ გვაქვს მუშაობის პრაქტიკა, წარსულში მოვახდინეთ ტერორისტული აქტების პრევენცია, ჩავატარეთ სპეცოპერაციები ამ ტერორისტული აქტების ორგანიზატორებისა და შემსრულებლების დასაკავებლად დაკავებულების აღიარების შემდეგ, კეთილგანწყობის ნიშნად, ისინი ოჯახებს დავუბრუნეთ", - წერს კოკოითი.

ნახეთ ასევე:

• "ჩემზე ამბობენ ცხინვალიდან გაიქცაო..." - კოკოითის ინტერვიუ აგვისტოს ომიდან 15 წლის შემდეგ: ცრუ "პრეზიდენტი" რემბოს იმიჯით და საგმირო ფანტაზიებით
• ოკუპანტების მოკლული თამაზ გინტურის ძმა აცხადებს, რომ მათთვის მკვლელების ვინაობა ცნობილია - ოჯახი ითხოვს, ისინი ქართულ მხარეს გადმოსცენ
• "3 გასროლის ხმა გავიგე..." - პირი, რომელიც თამაზ გინტურთან და ლევან დოთიაშვილთან ერთად, ლომისის ეკლესიასთან იმყოფებოდა, მედიასთან პირველ კომენტარს აკეთებს