ოკუპანტების მოკლული თამაზ გინტურის ძმა აცხადებს, რომ მათთვის მკვლელების ვინაობა ცნობილია - ოჯახი ითხოვს, ისინი ქართულ მხარეს გადმოსცენ
ოკუპანტების მოკლული თამაზ გინტურის ოჯახი სავარაუდო მკვლელების ვინაობას ასახელებს. გინტურის ძმა "მთავარ არხთან“ საუბრისას ამბობს, რომ დანაშაული ორმა პირმა ჩაიდინა. ესენი არიან ვასილ დემიდოვი და კოლია ისჩენკო. ორივე ოკუპანტი ცხინვალში მსახურობს.
ოჯახი ითხოვს, რომ მკვლელები ქართულ მხარეს გადმოსცენ.
ვასილ დემიდოვი 1979 წელს კარელიის ერთ-ერთ სოფელშია დაბადებული, ის წლებია ეფ-ეს-ბეს ჯარში მსახურობს. ჰყავს მეუღლე და ერთი შვილი. 2008 წელს ის მივლინებით რამდენჯერმე იმყოფებოდა სამხრეთ ოსეთის ტერიტორიაზე, რაც იწვევ სეჭვს, რომ ოკუპანტი აგვისტოს ომის მონაწილეც არის.
კოლია ისჩენკო 1984 წელს კრასნოდარის რეგიონშია დაბადებული. ისიც ეფ-ეს-ბეს სასაზღვრო ჯარის სერჟანტია და ოკუპირებულ ცხინვალის რეგიონშია მივლინებული.
შიდა ქართლის პოლიციის დეპარტამენტის უფროსის ვალერი თელიას განცხადებით, მოკლული თამაზ გინტურის ავტომანქანა გუშინ ქართველ სამართალდამცავებს გადასცეს. როგორც მან ჟურნალისტებთან აღნიშნა, მანქანას რამდენიმე ტყვია აქვს მოხვედრილი, ამასთანავე, ავტომობილში სისხლის კვალიც არის.
მისი განმარტებით, მიმდინარეობს მოლაპარაკებები, რათა "გატაცებული ლევან დოთიაშვილი უვნებელი და საღსალამათი დაბრუნდეს“.
ცნობისთვის, საქართველოს მოქალაქე თამაზ გინტური რუსეთის საოკუპაციო ძალებმა ცეცხლსასროლი იარაღიდან გასროლით 6 ნოემბერს მოკლეს. არსებული ინფორმაციით, თამაზ გინტური და ლევან დოთიაშვილი ლომისის ეკლესიაში, სანთლების დასანთებად იყვნენ, როცა რუსეთის საოკუპაციო ძალების წარმომადგენლებმა ცეცხლი გახსნეს. აღნიშნულის შედეგად თამაზ გინტური მოკლეს, ლევან დოთიაშვილი კი გაიტაცეს.
იხილეთ ასევე: