სამხრეთ კორეაში რობოტმა 40 წლის მამაკაცს სასიკვდილო დაზიანებები მიაყენა - ეს მაშინ მოხდა, როდესაც ქარხნის თანამშრომელი მის მუშაობას ამოწმებდა
სამხრეთ კორეაში რობოტმა ქარხნის თამაშრომელ 40 წლის კაცს სასიკვდილო დაზიანებები მიაყენა მას შემდეგ, რაც ის ყუთისგან ვერ გაარჩია.
BBC-ის ინფორმაციით, ინციდენტი ქვეყნის სამხრეთით, ერთ-ერთ ქარხანაში მოხდა, სადაც სპეციალურ რობოტიზებულ ხელს წიწაკით სავსე კოლოფების დიდ ყუთებში ჩასალაგებლად იყენებენ.
წინა დღეს რობოტიზებულ ხელს პრობლემები შეექმნა და გამართულად მუშაობა უჭირდა. ოთხშაბათს საღამოს, რობოტის მუშაობას ქარხნის თანამშრომელი ამოწმებდა, რა დროსაც ხელმა ისიც ყუთად აღიქვა, ხელში აიყვანა და კონვეიერზე დააგდო. კაცმა სახისა და გულმკერდის არეში მძიმე დაზიანებები მიიღო და საავადმყოფოში გარდაიცვალა.
მომხდარის შესახებ განცხადება გაავრცელა ქარხნის მფლობელმა კომპანიამ Donggoseong Export Agricultural Complex და უსაფრთხო გარემოს შექმნისთვის მზადყოფნა გამოთქვა.
სამხრეთ კორეაში მსგავსი შემთხვევა მარტშიც მოხდა, როდესაც ავტონაწილების ქარხნის 50 წლის თანამშრომელს რობოტმა მძიმე დაზიანებები მიაყენა, იმჟამად საბედნიეროდ მამაკაცი გადარჩა.