ისტორიაში ყველაზე თბილი ოქტომბერი დაფიქსირდა: დედამიწის ზედაპირის საშუალო ტემპერატურა საგრძნობლად გაიზარდა - რას ამბობენ მეცნიერები?
ევროკავშირის კლიმატის ცვლილების სამსახურის თანახმად, 2023 წელი ყველაზე თბილი წელია, რაც აქამდე დაფიქსირებულა.
ევროკავშირის კოპერნიკის კლიმატის ცვლილების სამსახურმა განაცხადა, რომ წელს, ისტორიაში ყველაზე თბილი ოქტომბერი დაფიქსირდა და დედამიწის ზედაპირის საშუალო ტემპერატურა 15.3 გრადუს ცელსიუსს აღწევდა. ეს 1991-2020 წლების ოქტომბრის საშუალო მაჩვენებელზე 0,85C გრადუსით მეტია, ხოლო 1850-1900 წლების საშუალო ტემპერატურას კი 1,7C გრადუსით აჭარბებს.
ექსტრემალური სიცხე ხელს უწყობს კლიმატის კრიზისს, რომლის მთავარი მამოძრავებელი ძალა წიაღისეული საწვავის წვაა. კლიმატის მკვლევარებმა განაცხადეს, რომ მათი აღმოჩენები ჰოლივუდის ფილმის სცენარს მოაგონებთ და ტემპერატურის გლობალურად მატებას სათბურების მზარდ ემისიას და ელ-ნინიოს გაძლიერებას მიაწერენ.
- რა არის ელ-ნინიო?
ეს არის წყნარი ოკეანის ეკვატორული ნაწილის ზედაპირული ფენის ტემპერატურის ცვალებადობა, რაც შესამჩნევ გავლენას ახდენს კლიმატზე. ამ მოვლენისას, წყლის ზედაპირული ფენა უჩვეულოდ თბება 1 °C-დან 5 °C-მდე. იგი იწვევს გვალვას, უხვ ნალექიანობას; წარმოქმნის უჩვეულოდ თბილი ან ცივი ამინდის პირობებს. გაძლიერებული წვიმები გამშრალ სანაპიროებზე იწვევს კატასტროფულ წყალდიდობებს.
სულ მალე, კლიმატის პოლიტიკის კანონმდებლები და ბიზნეს ლიდერები მთელი მსოფლიოდან, დუბაიში შეიკრიბებიან. ისინი კლიმატის კრიზისის მოგვარების საკითხებზე 30 ნოემბრიდან 12 დეკემბრამდე გამართავენ მოლაპარაკებას. მათი 10 წლის წინანდელი შეთანხმების მიხედვით, გლობალური დათბობის წინააღმდეგ გატარებული ზომების შემდეგ, 2050 წლისთვის, ტემპერატურა მხოლოდ 1,5 გრადუსი ცელსიუსით უნდა გაზრდილიყო. დღევანდელი გადმოსახედიდან, ამ გეგმის შესრულება შეუძლებელი ჩანს, რადგან საშუალო ტემპერატურა უკვე 1,1 გრადუსითაა გაზრდილი.
სწორედ ტემპერატურის ასეთ სწრაფ მატებას მიაწერენ ექსტრემალური ამინდის მოვლენების სერიას, რომლებიც მთელ მსოფლიოში მოხშირდა.
წყარო: cnbc
მოამზადა: ანა სიბოშვილმა
ნახეთ ასევე: