სამეფო ვარსკვლავი - ვინ არის 18 წლის ლეონორ დე ბურბონი, რომელსაც ესპანეთის სამეფო ოჯახისა და ხალხს შორის ჩატეხილი ხიდის აღდგენა ანდეს: ესპანეთი "ლეონორმანიამ" მოიცვა

ესპანეთის პრინცესას, ლეონორ დე ბურბონს მედია "ევროპის ყველაზე ქარიზმატულ დიდგვაროვნად" მოიხსენიებს. მას შემდეგ, რაც გოგონა 18 წლის გახდა, ესპანეთი "ლეონორმანიამ" მოიცვა და Google-ში მასთან დაკავშირებული ძიებების რაოდენობა 37%-ითაა გაზრდილი.

გოგონა გასულ სამშაბათს სრულწლოვანი გახდა და ტრადიციისამებრ, კონსტიტუციის ერთგულების ფიცი დადო.

მას შემდეგ, ბევრი დაინტერესდა, მისი პოპულარობის ზრდა უბრალოდ ბუნებრივი ხიბლის დამსახურებაა, თუ მისი ქცევები "ესპანეთის სრულყოფილი დედოფლის შექმნის გეგმის ნაწილია."

გულუბრყვილო სახით, ცისფერი თვალებით და ღიმილით, პრინცესა ლეონორმა ესპანელი ხალხის გული ადვილად მოიგო. მედია წერს, რომ ლეონორმა ყოფილი მეფის, ხუან კარლოსის ქმედებებით აღშფოთებული კრიტიკოსებიც გააჩუმა და ესპანეთის სამეფო სახლს საზოგადოებაში იმიჯი გამოუკეთა.

ლეონორის ბაბუის, პენსიაზე გასული მეფის სპილოებზე ნადირობა, გადამალული ფული შვეიცარიაში და სასამართლო დავა ყოფილ საყვარელთან კორინ ლარსენთან, ხალხსა და სამეფო ოჯახს შორის უფსკრულად იქცა და დიდგვაროვანთა იმიჯი მკვეთრად შეილახა.

თუმცა ახლა მიიჩნევენ, რომ ლეონორი მისი ოჯახის ესპანელ ხალხთან დამაკავშირებელი ხიდი გახდა და ის დადებითი ემოციები, რომელსაც ესპანელებში გოგონა იწვევს, სამეფო ოჯახს ძველ დიდებას დაუბრუნებს.

• ადგილობრივი გაზეთი El Español-ი სამეფო ოჯახის ყველაზე პოპულარულ წევრად პრინცესას ასახელებს. ლეონორმა რეიტინგით მამამისს, ესპანეთის ამჟამინდელ მეფეს, ფელიპე VI-საც კი აჯობა.

ზოგიერთი ექსპერტის ვარაუდით, გოგონას წარმატება იმითაა განპირობებული, რომ ამდენი წლის განმავლობაში ესპანელების თვალსაწიერიდან შორს იმყოფებოდა. ლეონორის შესახებ ინფორმაციის ნაკლებობა მოსახლეობას კიდევ უფრო უღვივებდა ინტერსს მის მიმართ.

"აქამდე ლეონორი სახალხოდ იშვიათად ჩნდებოდა, თუმცა სამხედრო აკადემიაში მსახურობის შემდეგ, ახალი ლეონორი ვიხილეთ: გაზრდილი და ჯარისკაცის ფორმაში ჩაცმული. თავისებურად, გასაოცარი იმიჯია",- განაცხადა EuroNews-თან ფერნანდო რაიონმა, სან პაბლოს უნივერსიტეტის პოლიტიკური ინფორმაციების პროფესორმა.

ლეონორი სამშობლოში იმდენად მოსწონთ, რომ ესპანელების 79%-ის აზრით, გოგონა უკვე მზადაა დედოფლობისთვის და მნიშვნელოვანი როლის შესრულებისთვის.

"ლეონორის იმიჯი ასეთია: იყოს იქ, სადაც უნდა იყოს. ის არ აკეთებს განცხადებებს და არ ვრცელდება მისი ყოველდღიური ფოტოები სახლში, ან წვეულებებზე. ხალხი მას ისეთს ხედავს, როგორიც არის: მომავალი დედოფალი და სახელმწიფოს მეთაური",- ამბობს რაიონი.

არავერბალური კომუნიკაციის ექსპერტი, ხოსე ლუის მარტინ ოვეჯერო თვლის, რომ ლეონორს საკომუნიკაციო კამპანია საერთოდ არ სჭირდება, რადგან ის ამის გარეშეც ახერხებს ხალხში სიმპათიის გამოწვევას. "ვერბალური თუ არავერბალური ქცევით, ის ყოველთვის აჩვენებს, რომ ძალიან ბუნებრივი და ბედნიერია. თქვენ ვერ ნახავთ მის უხეშ ჟესტებს ან ცუდ მანერებს, არა იმიტომ, რომ ეს ფოტოები დაცენზურებულია, არამედ იმიტომ, რომ ლეონორი ასეთი არ არის",- ამბობს ოვეჯერო.

მას ახლა მტრულად განწყობილი პოლიტიკური პარტიების და ჯგუფების გულის მოგება მოუწევს. პოლიტიკოსებმა თავიანთი პროტესტი იმით გამოხატეს, რომ ლეონორის ფიცის დადების ცერემონიას არ დაესწრნენ.

წყარო: euronews

მოამზადა: ანა სიბოშვილმა