ალა პუგაჩოვა რუსეთში დაბრუნდა - რას წერს რუსული მედია მომღერალზე, რომელმაც სამშობლო უკრაინაში ომის დაწყების შემდეგ დატოვა (ფოტოები)
ალა პუგაჩოვა რუსეთში დაბრუნდა. ამის შესახებ რუსული მედია წერს და აქვეყნებს ფოტოებს, სადაც ვარსკვლავი სანქტ-პეტერბურგის სადგურზეა გადაღებული. მოგვიანებით მომღერალი დედაქალაქში მატარებლით გაემგზავრა.
- ფოტოებზე ჩანს, რომ პუგაჩოვას თეთრი მოკლე ბეწვის ქურთუკი აცვია და ქუდი ახურავს. პუგაჩოვა მოსკოვში მარტო დაბრუნდა, შვილების, ლიზას და ჰარის და მეუღლის მაქსიმ გალკინის გარეშე, რომელიც ამჟამად ევროპაში მოგზაურობს.
როგორც ცოტა ხნის წინ რუსული მედია წერდა, სოფელ გრიაზში პუგაჩოვას გრანდიოზულ სასახლეში სარემონტო სამუშაოები მიმდინარეობდა. მაშინ ვარაუდობდნენ, რომ შესაძლოა, ეს მომღერლის სამშობლოში დაბრუნების მანიშნებელი ყოფილიყო.
მედიაში ასევე გავრცელდა კადრებიც, სადაც ჩანს, რომ პრიმადონა მოსკოვში ჩასვლის შემდეგ, გრიაზში, სასახლეში გაემგზავრა. მომღერლის წარმომადგენლებს არ გაუკეთებიათ კომენტარი - ეს პუგაჩოვას დროებითი ვიზიტია რუსეთში თუ საცხოვრებლად დაბრუნება გადაწყვიტა.
უკრაინაში ომის დაწყების შემდეგ ალა პუგაჩოვა და მაქსიმ გალკინი შვილებთან ერთად საცხოვრებლად ისრაელში გადავიდნენ, რის შემდეგაც რუსეთში კრიტიკის ქარცეცხლში გაეხვნენ.
ისრაელსა და პალესტინას შორის კონფლიქტის გამწვავების შემდეგ კი, წყვილმა ისრაელი დატოვა. პუგაჩოვა შვილებთან ერთად კვიპროსში გაფრინდა, გალკინი კი გასტროლებზე გაემგზავრა. ცნობისთვის, მაქსიმ გალკინი რუსეთის ფედერაციამ უცხოეთის აგენტად გამოაცხადა უკრაინის მხარდასაჭერად გაკეთებული განცხადებების შემდეგ.