24
ივლისიდღის ზოგადი ასტროლოგიური პროგნოზი
დიდუბის ღვთისმშობლის ეკლესიაში, სადაც მსახიობ თენგიზ არჩვაძის სამოქალაქო პანაშვიდი მიმდინარეობს, მიდიან საზოგადოების სხვადასხვა სფეროს წარმომადგენლები, მათ შორის პოლიტიკოსები. არტისტის სამოქალაქო პანაშვიდზე იმყოფებოდნენ საქართველოს პრეზიდენტი სალომე ზურაბიშვილი, პრემიერ-მინისტრი ირაკლი ღარიბაშვილი, პარლამენტის თავმჯდომარე შალვა პაპუაშვილი და თბილისის მერი კახა კალაძე.
თენგიზ არჩვაძეს ქართულ თეატრსა და კინოში 100-ზე მეტი როლი განასახიერა და არაერთი დასამახსოვრებელი სახე შექმნა.
მან სცენური სახეები შექმნა სპექტაკლებში: "მოკვეთილი“, "დედა", "ღალატი", "თვალი პატიოსანი", "როცა ქალაქს სძინავს" "მე ვხედავ მზეს", "დღის წესრიგშია ერთი საკითხი", "კვაჭი კვაჭანტირაძე", "30 აგვისტო", "ჯორდანო ბრუნო", "ძველი ვალსი“, "ასის წლის წინათ“, "ისევ ამ ქვეყნად დავრჩები“, "სახლის ანგელოზები“, "მგზავრის წერილები“ და სხვა.
მონაწილეობს ფილმებში: "კეთილი ადამიანები", "ერთი ცის ქვეშ", "ხევისბერი გოჩა", "ხევსურული ბალადა", "დიდოსტატის მარჯვენა", "დათა თუთაშხია", "მე ვხედავ მზეს", "შეხვედრა წარსულთან", "მალე გაზაფხული მოვა" და სხვა.
თბილისის შოთა რუსთაველის სახელობის თეატრალური ინსტიტუტის დამთავრების შემდეგ, სიცოცხლის ბოლომდე, თენგიზ არჩვაძე კოტე მარჯანიშვილის სახელობის თეატრის მსახიობი იყო. 1967-1973 წლებში იგი მუშაობდა რუსთავის დრამატულ თეატრშიც.
2011 წელს მარჯანიშვილის თეატრის წინ გაიხსნა მსახიობის სახელობის ვარსკვლავი. თენგიზ არჩვაძე იყო შოთა რუსთაველის, კოტე მარჯანიშვილის, მიხეილ თუმანიშვილის, აკაკი ხორავას სახელობის პრემიების, აგრეთვე, სახელმწიფო პრემიის ლაურეატი, ღირსების ორდენის კავალერი. 2017 წელს ხელოვნების განვითარებაში შეტანილი განსაკუთრებული წვლილისთვის მას კულტურის სამინისტროს სპეციალური ჯილდო - "ხელოვნების ქურუმის“ წოდება მიენიჭა. იმავე წელს გამოიცა წიგნი "სახალხო არტისტი - თენგიზ არჩვაძე“, რომელიც მსახიობის ცხოვრებასა და შემოქმედებას ეძღვნება.
მსახიობს დიდუბის პანთეონში, მეუღლის გვერდით დაკრძალავენ.
