"ხშირ შემთხვევაში სტუდენტი დილემის წინაშეა სამსახურსა და სწავლას შორის გადაწყვეტილების მიღებისას" - გაიცანით "ნიკორას" სტიპენდიატი სალომე ჩერქეზიშვილი
საქართველოში კვების პროდუქტების ერთ-ერთი ყველაზე დიდი კომპანია „ნიკორა“ უკვე მეხუთე წელია, წარმატებულ სტუდენტებს სახელობით სტიპენდიას გადასცემს. სტიპენდია აგრარული უნივერსიტეტის კვების პროდუქტების ტექნოლოგიების წარმატებულ სტუდენტებს გადაეცემა ყოველთვიურად. სტიპენდიატების შერჩევა ყოველ სემესტრულად ხდება.
სალომე ჩერქეზიშვილი ერთ-ერთია იმ სტუდენტთაგან, რომლებიც სტიპენდიას მიმდინარე სემესტრში მიიღებენ. „ბავშვობიდან კულინარიით ვიყავი დაინტერესებული. ძალიან მიყვარდა და მიყვარს სამზარეულოში ტრიალი. როდესაც პროფესიის არჩევის დრო მოვიდა, კვების ტექნოლოგიებმა ძალიან მომხიბლა, რადგან ის ახლოს იყოს ჩემს ინტერესებთან და ამავდროულად მაინტერესებდა საგნები, რომლებიც ამ ფაკულტეტზე ისწავლებოდა. ეს იყო: ქიმია, ბიოლოგია, ფიზიკა... ამჟამად მე-4 კურსზე ვარ. ზოგადად კვების ტექნოლოგიებში კადრების დეფიციტია და ვფიქრობ, ამ სფეროში ბევრი რამ არის გასაკეთებელი. სწორედ ამიტომ ძალიან მნიშვნელოვანია სფეროს მხარდაჭერა. ამის ერთ-ერთი საუკეთესო გამოხატულება კი სტიპენდიაა, რომელსაც ხორცპროდუქტების ყველაზე დიდი საწარმო სტუდენტებს აძლევს. ეს ნიშანია ჩვენთვის, რომ სფეროს ჩვენ ვჭირდებით და ჩვენზე ზრუნავენ. სწორედ ამიტომ სწავლის გაგრძელება საზღვარგარეთ კი მინდა, მაგრამ საბოლოოდ საკუთარ თავს საქართველოში ვხედავ. ვფიქრობ, შევძლებ ჩემი სიტყვა ვთქვა ამ სფეროში,“ - აღნიშნავს სალომე, რომელსაც საინტერესო თემებზე ვესაუბრეთ.
როდის და რატომ გადაწყვიტეთ კვების ინდუსტრიასთან დაკავშირება?
გამომდინარე იქიდან, რომ სკოლაში ადრეული პერიოდიდან კვების ინდუსტრია და ტექნიკური საგნები მაინტერესებდა გადაწყვეტილების მიღება რთული არ ყოფილა, სანამ ფაკულტეტზე შევჯერდებოდი ვესტუმრე უნივერსიტეტს გაცნობითი დღეების ფარგლებში, სილაბუსის გაცნობისას და პროფესიის ზოგადი მიმოხილვისას მივხვდი, რომ აქ ჩაბარება ნამდვილად სწორი არჩევანი იქნებოდა და საბედნიეროდ, დღემდე არ შემცვლია დამოკიდებულება.
სწავლის პარალელურად ერთ-ერთ კვების ობიექტში საქმიანობთ. მოახერხეთ, რომ თქვენი ჰობი საქმიანობად გექციათ. რამდენად რთული იყო ეს?
ჩემი ჰობიც და ინტერესის სფეროც დაახლოებით 10 წელია კულინარიაა, მესამე კურსზე გავიარე საგანი - ფქვილოვანი და საკონდიტრო ნაწარმის ტექნოლოგიები, რამაც კიდევ უფრო მრავალფეროვნად და საინტერესოდ დამანახა კულინარიული სფერო და შევძელი, რომ თეორიული და პრაქტიკული ცოდნა გამეერთიანებინა. ცხადია თეორიული, სიღრმისეული ცოდნის გარეშე კულინარია, როგორც პროფესია, საინტერესოა, თუმცა გაცილებით უფრო საინტერესო ხდება მაშინ, როცა გარკვეული პროცესების მიღმა მეცნიერული პროცესებიც ცხადი ხდება.
რა გამოწვევების წინაშე დგანან დღეს სტუდენტები, რომლებიც სწავლის პარალელურად მუშაობენ?
სტუდენტების მუშაობა ძალიან დიდ პრობლემას წარმოადგენს დღეს საქართველოში. პირველ რიგში, იმის გამო, რომ უნივერსიტეტიდან დროის გადანაწილების მხრივაა დაბრკოლება, მეორეს მხრივ, დამსაქმებლების მხრიდან, რომლებსაც არ უღირთ სტუდენტის სამსახურში აყვანა, ან მათი ხელშეწყობა, შესაბამისად, ხშირ შემთხვევაში სტუდენტი დილემის წინაშე რჩება, სამსახურსა და სწავლას შორის გადაწყვეტილების მიღებისას. უნივერსიტეტში სწავლისას დროის უქონლობის გამო ზაფხულში მომიწია პირველად სამზარეულოში მუშაობა. ახლა მეოთხე კურსზე ვახერხებ დროის ისე გადანაწილებას, რომ არც სწავლაზე მომიწიოს უარის თქმა და არც მუშაობაზე. ეს დამსაქმებლის დამსახურებაა, რომელიც მეც და სხვა სტუდენტ თანამშრომლებს ხელს გვიწყობს გრაფიკის მოსახერხებლად გაწერაში.
რა არის სტუდენტისთვის მთავარი მოტივაცია, რომ ისწავლოს?
პირველ რიგში, სტუდენტის ყველაზე დიდი მოტივაცია ინტერესია. ვფიქრობ, შეუძლებელია რამე საქმის ხარისხიანად სწავლა ან გაკეთება, თუ ამ საქმის გაკეთების დიდი ინტერესი არ გაქვს. ასევე ძალიან მნიშვნელოვანია სხვადასხვა სახით წახალისება, რისი ერთ-ერთი კარგი მაგალითი სტიპენდიაა, რაც სტუდენტს მოტივაციის უზრდის, რომ თავის საქმე უფრო ხარისხიანად შეასრულოს. ამის ერთ-ერთი საუკეთესო გამოხატულება კი სტიპენდიაა, რომელსაც „ნიკორა ჯგუფი“ სტუდენტებს აძლევს. ეს ნიშანია ჩვენთვის, რომ სფეროს ჩვენ ვჭირდებით და ჩვენზე ზრუნავენ.
რამდენად რთულია საქართველოში ჩამოყალიბდე მაღალი დონის პროფესიონალად კვების ინდუსტრიაში?
გამომდინარე იქიდან, რომ ბოლო პერიოდში კვების ინდუსტრია ძალიან ინტენსიურად განვითარდა, გაჩნდა დიდი კონკურენციაც. შესაბამისად, დიდ ძალისხმევას მოითხოვს, რომ იყო გამორჩეული და წარმატებული ამ სფეროში. მხოლოდ ინტერესი საკმარისი არაა, საჭიროა მუდმივი სწავლა და განვითარების მზაობა.
დროის გასვლასთან ერთად ვრწმუნდები, რომ ეს სფერო უსაზღვრო და ძალიან საინტერესოა. წარმოდგენები და შეხედულებები კი ბოლო რამდენიმე წელია, მუდმივად მეცვლება. მიღებული გამოცდილება სხვადასხვა საწარმოსა თუ დაწესებულებაში მეხმარება, რომ ჩემი არსებული შეხედულებები კიდევ უფრო მრავალფეროვანი გავხადო. ამჟამად გავდივარ საგანს ხორცპროდუქტებთან დაკავშირებით, რომელშიც დიდ ცოდნას ვიღებ ამ პროდუქტთან დაკავშირებით. გასულ წელს „ნიკორას“ ორგანიზებით მათ საწარმოშიც ვიყავით სპეციალურ ტურზე. იქ მიღებული პრაქტიკული ცოდნის ხარჯზე ჩემი ცოდნა მყარდება და რაც მთავარია, მეხმარება ბევრი ასპექტის უკეთ გააზრებაში.
NS