გამარჯვება, რომელიც მარცხის ტოლფასია: რა ხდება პოლონეთში საპარლამენტო არჩევნების შემდეგ - ტუსკის დაპირებები და პრემიერად დაბრუნების დიდი შანსი

პოლონეთის სახელმწიფო საარჩევნო კომისიამ 17 ოქტომბერს გამოაქვეყნა პოლონეთის სეიმის არჩევნების საბოლოო შედეგები. საარჩევნო უბნებიდან ოქმების 100%-ის დათვლის შედეგად, ამომრჩეველთა ხმები ასე განაწილდა:

• ლიდერობს მმართველი პარტია "კანონი და სამართალი" - მიიღო ხმების 35.38% (194 მანდატი);
• მის მთავარ მოწინააღმდეგეს "სამოქალაქო კოალიციას" 30,7% -იანი მხარდაჭერა აქვს (157 მანდატი);
• "მესამე გზამ" მიიღო ხმების 14.4% (65 მანდატი);
• "მემარცხენეებმა" მიიღეს ხმების 8.61% (26 მანდატი);
• ულტრამემარჯვენე "კონფედერაციამ" მიიღო ხმების 7.16% (18 მანდატი).

ოპოზიციური ძალის "სამოქალაქო კოალიციის" ლიდერი დონალდ ტუსკი ცდილობს, რომ მმართველი პარტიის 8-წლიანი მმართველობა დაასრულოს.

მართლაც, ტუსკს სეიმში კოალიციის შექმნის და მთავრობის დაკომპლექტების დიდი შანსი აქვს.

ხმის მიცემის დასრულების შემდეგ, მან განაცხადა:

"პოლონეთმა გაიმარჯვა, დემოკრატიამ გაიმარჯვა. ეს ცუდი დროის დასასრულია, პარტია "კანონისა და სამართლიანობის“ დასასრულია!“

პრეზიდენტი ანჯეი დუდა კი დაავალებს ამჟამად მმართველ პარტიას კოალიციის შექმნას, მაგრამ დიდი ალბათობით, ეს შეუძლებელი იქნება, რადგან გაცილებით დიდი შანსია, რომ ტუსკის პარტიამ დანარჩენ ორ ცენტრისტულ პარტიასთან შეთანხმებას მიაღწიოს.

არჩევნების შემდეგ, ჩვენი პოლიტიკოსების მსგავსად, ორივე პარტიამ გამარჯვება აღნიშნა. ყოფილი და მოდი, სიმართლე ვთქვათ, სავარაუდოდ, მომავალი პრემიერ-მინისტრი დონალდ ტუსკი ვერ მალავდა თავის ტრიუმფს და ეს მისი სახის გამომეტყველებასა და ხმის ინტონაციაშიც კი იგრძნობოდა.

პოლონეთსა და დასავლეთს შორის ურთიერთობა წლებთან ერთად იძაბებოდა. The Financial Times-ს წერდა, რომ "კანონმა და სამართლიანობამ“ საზოგადოებრივი ტელევიზია პროპაგანდის ინსტრუმენტად აქცია. მან ასევე შეზღუდა აბორტის უფლება, მოახდინა ერთსქესიანთა წყვილების, მიგრანტებისა და ლტოლვილების დემონიზაცია.

ამ ყველაფერმა ბრიუსელის უკმაყოფილება გამოიწვია და პოლონეთს მილიარდობით ევროს ფინანსირება გაუყინა. ტუსკმა პირობა დადო, რომ ამ თანხებს განბლოკავს და ვარშავას მტკიცე პროევროპულ გზაზე დააბრუნებს.

დონალდ ტუსკი გამოცდილი პოლონელი პოლიტიკოსია. ის წარსულში არა მხოლოდ პოლონეთის პრემიერ-მინისტრი, არამედ ევროსაბჭოს თავმჯდომარეც იყო.

ის და მისი თანაგუნდელები ლიბერალურ-კონსერვატორული იდეოლოგიის ხალხია, რომლებიც თავის პოლიტიკას პროევროპულობისკენ, ფემინიზმისკენ, სოციალურად ორიენტირებული საბაზრო ეკონომიკისაკენ მიმართავენ.

2007 წლის საპარლამენტო არჩევნებზე მან ხმების 41.5% აიღო და სეიმიდან 209 (სულ 460) ადგილი დაიკავა, ხოლო სენატში 60 ადგილი 100-დან.

2014 წელს ის ევროსაბჭოს ხელმძღვანელი გახდა, თუმცა განსაკუთრებული წარმატებებით ვერ გამოირჩეოდა, სამაგიეროდ, თანამდებობამ მისი მომავალი პოლიტიკური კურსი ჩამოაყალიბა.

ჯერ კიდევ ოპოზიციაში მყოფი ტუსკი, მმართველ პარტიას ადანაშაულებდა, რომ ის Polexit-ს, ანუ პოლონეთის ევროკავშირიდან გასვლას აპირებდა.

2019 წელს ტუსკს ევროსაბჭოს ხელმძღვანელობის ვადა გაუვიდა და ის პოლონურ პოლიტიკაში დაბრუნდა. მაშინ ბევრი ფიქრობდა, რომ პოლიტიკოსი 2020 წლის საპრეზიდენტო არჩევნებისთვის ემზადებოდა, თუმცა ოპოზიციონერმა არჩევნებში მონაწილეობაზე უარი თქვა.

თავის ახალ საარჩევნო კამპანიაში მან ლიბერალური იდეები ჩადო: დადო პირობა, რომ პოლიტიკაში ქალების როლს გაზრდიდა, მოახდენდა ლგბტ კავშირების ლეგალიზაციას, შეარბილებდა აბორტების თაობაზე არსებულ კანონმდებლობას, ასევე მოხდებოდა მასწავლებლების ხელფასების 30%-იანი ზრდა და მოქალაქეებისთვის პირველი ბინის შეძენის შემთხვევაში, უპროცენტო კრედიტით უზრუნველყოფა.

თუ ისინი მართლაც მოვიდნენ სათავეში, აგრეთვე აპირებენ, რომ ეკლესიის ფონდი გააუქმონ, ხოლო სასკოლო ატესტატებიდან რელიგიის საგნის ქულები ამოიღონ.

• ავტორი: ანრი კურტანიძე