23
ივლისიდღის ზოგადი ასტროლოგიური პროგნოზი
2022 წლის სტატისტიკას თუ გადავხედავთ, ცალსახად ვერ ვიტყვით, რომ ადრეულ ასაკში ქორწინება ეთნიკური უმცირესობის პრობლემაა. ძალიან მაღალი მაჩვენებელი იყო იმერეთში და თბილისშიც, - ამის შესახებ საქართველოს სახალხო დამცველის აპარატის გენდერის დეპარტამენტის უფროსის მოვალეობის შემსრულებელმა, სოფო რუსეცკიმ "ინტერპრესნიუსთან“ ინტერვიუში განაცხადა.
მისივე განმარტებით, ადრეულ ასაკში ქორწინების შემთხვევები კახეთის რეგიონშიც ხდება.
"ძალიან მაღალი მაჩვენებელი იყო იმერეთში, თბილისშიც, სადაც ბევრი ეთნიკური უმცირესობა არ არის, როგორც ქვემო ქართლში. აქ ისევ სტერეოტიპებს და გენდერულ ნორმებს ვაწყდებით, ამ მიმართულებით ბევრია სამუშაო. ქალთა მიმართ დისკრიმინაციის აღმოფხვრის კომიტეტმა ჩვენს ქვეყანას მოუწოდა, რომ იმ რეგიონებში გააძლიეროს მუშაობა, სადაც ეს სტერეოტიპები განსაკუთრებით ძლიერად მოქმედებს. 2020 წელს ჩავატარეთ განწყობების მოკვლევა, ვიკვლიეთ, ეთნიკურ უმცირესობებში რატომ ხდებოდა ადრეულ ასაკში ქორწინება, მათ შორის, იძულებითი ქორწინებები. ამ კვლევის ფარგლებში, ჩვენ შევხვდით როგორც უწყებების - შსს-ს, განათლების წარმომადგენლებს, სოციალურ მუშაკებს, ასევე, ადგილობრივ თემს, ვისი შვილებიც ადრეულ ასაკში დაქორწინდნენ, ან ვინც თავად იყო ადრეულ ასაკში დაქორწინებული. ძალიან საინტერესო მიგნებები ამოვიდა. მაგალითად, უწყებების წარმომადგენლები თვლიდნენ, რომ ეს ეთნიკური უმცირესობების ტრადიცია იყო და ამ ტრადიციასთან ბრძოლა ძალიან რთული, შეუძლებელი იყო. თავად მშობლები რას გვეუბნებოდნენ, იცით? გოგოებისთვის არანაირი პერსპექტივა არ არის, ენობრივი ბარიერი აქვთ, სკოლაში სათანადო განათლებას ვერ იღებენ, რომ შესაბამისი მომავალი, სამსახური, ეკონომიკური დამოუკიდებლობა ჰქონდეთო. ოჯახებს იმდენად უჭირთ, თუ ოჯახში ბიჭი და გოგო ჰყავთ და ორივესთვის განათლების მიცემის საშუალება არ აქვთ, პრიორიტეტს ბიჭს ანიჭებენ, ესეც პრობლემაა. ასევე, დასახელდა ასეთი პრობლემა - დედები გვეუბნებოდნენ, სკოლაში შვილის გაშვება მეშინია, რადგან იქ ბიჭები მანქანით ხშირად არიან მოსულები, გოგოებს ჩასაფრებულები და გვეშინია შვილს ვიღაცამ თავისუფლება უკანონოდ არ აღუკვეთოსო. ხანდახან, მშობელს ურჩევნია, თავად შეურჩიოს გოგოს მისთვის სასურველი ქმარი, ვიდრე უცხო პირისგან იყოს მოტაცებული. გვეუბნებოდნენ, ვიცნობ მაინც იმ ოჯახს, ფინანსურად ძლიერიაო და მშობლებს ჰგონიათ, რომ ასე მათი შვილის მომავალი უკეთესი იქნება, რადგან გოგოების პერსპექტივას ვერ ხედავენ.
სხვადასხვა კვლევის ფარგლებში სულ ვიკვლევთ, რა საგანმანათლებლო, სპორტული ღონისძიებებია რეგიონებში მოზარდებისთვის, სამწუხაროდ, ასეთი არაფერი კეთდება.
ვფიქრობ, რომ სოციალურ თემამდე დავდივართ. ოჯახებში ეკონომიკურ პრობლემებს, გოგონების უპერსპექტივობას უფრო მივაკუთვნებდი ამ ფაქტს, ვიდრე ტრადიციებს. ჩვენ ადგილზე მოსახლეობას ვხვდებით და ისინი ბევრ პრობლემას ასახელებენ“, - განაცხადა რუსეცკიმ.
ინტერვიუს სრულ ვერსიას "ინტერპრესნიუსი" უახლოეს საათებში შემოგთავაზებთ.
ქალთა დამცველი ორგანიზაციები რეალურად კი არ იცავენ უფლებებს არამედ ხელს ითბობენ და უბრალო გრანტიჭამიები არიან. მათ ეშინით და არავის აძლევენ უფლებას პოლიციას მიმართონ და ცდილობენ დანაშაულები მიჩქმალონ...
ბევრი იურისტი აფარებს ასეთ ორგანიზაციას თავს და რეალურად საქმეში 0 აკეთებს, მეტის საქმეებს "არჩევენ" რა გამოდგება და რა არა
ასეთი გაუბედავი წერილის გამოქვეყნება ღირდა?!