რა ხდება ღაზაში ისრაელის მიერ დაანონსებული მასშტაბური თავდასხმის დაწყებამდე?

ათასობით პალესტინელი ღაზას სექტორის ჩრდილოეთ ნაწილს ტოვებს.

ისრაელის მიერ დაანონსებული მასშტაბური თავდასხმის დაწყებამდე 1.1 მილიონზე მეტ ადამიანს რეგიონის დასატოვებლად ვადა ადგილობრივი დროით 16:00 საათამდე აქვს. ისრაელის ხელისუფლების განცხადებით, ისინი მოსახლეობას სამხრეთისკენ გადაადგილებისა და მდინარე ღაზას გადაკვეთის უფლებას ორი მთავარი მარშრუტის საშუალებით აძლევენ.

ევროკავშირის უმაღლესი წარმომადგენელი ჯოზეფ ბორელი მიიჩნევს, რომ ღაზაში მცხოვრები 1.1 მილიონი ადამიანის ევაკუაციის გეგმის განხორციელება სრულიად შეუძლებელია და ისრაელს მოუწოდებს, საერთაშორისო სამართალი არ დაარღვიოს.

ბოლო მონაცემების მიხედვით, „ჰამასის“ თავდასხმებს ისრაელში 1 300-ზე მეტი ადამიანი ემსხვერპლა, 150 კი ამ დრომდე მძევლად რჩება. პარალელურად კი, ისრაელის ავიაიერიშებს სულ მცირე 2 200 პალესტინელი ემსხვერპლა, 8 700-ზე მეტი კი დაშავდა.

ისრაელსა და „ჰამასს“ შორის მიმდინარე კონფლიქტს 100-ზე მეტი უცხოელი ემსხვერპლა. მათ შორის არიან ბრიტანეთის, ტაილანდის, საფრანგეთისა და არგენტინის მოქალაქეები.