"თუ ისინი ნებით არ წავლენ, მაშინ..." - პაკისტანმა, დაახლოებით, 1.7 მილიონ ავღანელს ქვეყნის დატოვება უბრძანა
პაკისტანის მთავრობამ თავშესაფრის მაძიებელ ავღანელ მოქალაქეს ქვეყნის დატოვება უბრძანა.
ხელისუფლებამ, დაახლოებით 1.7 მილიონ ავღანელს, დეპორტაციისთვის ნოემბრამდე მისცა ვადა.
წელს პაკისტანის და ავღანეთის საზღვარზე თავდასხმების ზრდამ, ქვეყნებს შორის დაძაბულობა კიდევ უფრო გაამწვავა. პაკისტანი თავდასხმებში თალიბანის რეჟიმს ადანაშაულებს, თუმცა ეს უკანასკნელი ბრალდებებს უარყოფს. ამან ისლამაბადში უკმაყოფილება გამოიწვია, რის გამოც მან არალეგალური მიგრანტების გაძევების გადაწყვეტილება მიიღო.
უცხო ქვეყანაში თავშესაფრის ძიების უფლება საერთაშორისო სამართლითაა გათვალისწინებული. პაკისტანმა ასობით ათასი ავღანელი ლტოლვილი მას შემდეგ მიიღო, რაც 2021 წელს ავღანეთის ხელისუფლებაში თალიბანი დაბრუნდა.
გაეროს მონაცემებით, პაკისტანში დაახლოებით 1.3 მილიონი ავღანელია ლტოლვილად რეგისტრირებული, მათ გარდა კიდევ 880 000-მა ქვეყანაში დარჩენის კანონიერი სტატუსი მიიღო. თუმცა, მათ გარდა, ქვეყანაში კიდევ 1.7 მილიონი ადამიანი არალეგალურად იმყოფება, ამტკიცებდა პაკისტანის შინაგან საქმეთა მინისტრი სარფრაზ ბუგტი. მინისტრი იმ ავღანელებზე მიუთითებდა, რომლებსაც ლტოლვილის სტატუსი ჯერ არ მიუღიათ. მისი თქმით, ამ ადამიანებს თვის ბოლომდე მოუწევთ ქვეყნის დატოვება - ან ნებაყოფლობით, ან იძულებითი დეპორტაციით:
"თუ ისინი ნებით არ წავლენ, მაშინ მათ დეპორტაციაში პროვინციების ან ფედერალური მთავრობის ყველა სამართალდამცავი უწყება ჩაერთვება", - განუცხადა მინისტრმა სახელმწიფო მედიას. ბუგტიმ ასევე განაცხადა, რომ შეიქმნება სპეციალური ჯგუფები, რომლებიც ქვეყანაში არალეგალურად მცხოვრები ავღანელების კერძო ბიზნესების და აქტივების იდენტიფიცირებას და კონფისკაციას მოახდენენ.
წყარო: bbc
მოამზადა: ანა სიბოშვილმა