სკოტლანდ იარდის ასობით თანამშრომელი მოვალეობის შესრულებაზე უარს ამბობს - კრიზისი უძველეს პოლიციაში: ბრიტანეთის ხელისუფლება დახმარებას არმიას სთხოვს
მსოფლიოს ერთ-ერთი უძველესი პოლიცია კრიზისის წინაშე დგას. ლონდონის "სკოტლანდ იარდის" ელიტური განყოფილების ასობოთ პოლიციელი მოვალეობის შესრულებაზე უარს ამბობს. ხელისუფლება იძულებული გახდა, დახმარებისთვის არმიისთვის მიემართა.
პრობლემა მას შემდეგ წარმოიშვა, რაც ერთ-ერთ პოლიციელს (მისი ვინაობა არ გასაჯაროებულა) მკვლელობაში დასდეს ბრალი - ერთი წლის წინ, დაკავების მცდელობისას, მან დამნაშავეს ესროლა. შემთხვევა სამხრეთ ლონდონში მოხდა. მომხდარზე გამოძიება ამ დრომდე მიმდინარეობს. დანაშაულის დამტკიცების შემთხვევაში პოლიციელს პატიმრობა ემუქრება.
ცნობილია, რომ გარდაცვლილი 24 წლის შავკანიანი კრის კაბაა, მას მანქანის გატაცებაში ედებოდა ბრალი. კაბას ოჯახი პოლიციელის დასჯას ითხოვს. ოფიცერს სამსახურებრივი უფლებამოსილება შეჩერებული აქვს. გასულ კვირას პროკურატურამ განაცხადა, რომ მას მკვლელობისთვის წაუყენებდნენ ბრალს - სწორედ ამ გადაწყვეტილებამ გამოიწვია პოლიციელების გაფიცვა. "სკოტლანდ იარდის" შეიარაღებული განყოფილების ათობით ოფიცერმა მაშინვე ჩააბარა იარაღის მოწმობა, რამდენიმე დღეში მათი რიცხვი ასამდე გაიზარდა.
სკოტლანდ იარდის ხელმძღვანელმა და ბრიტანეთის პოლიციის უფროსმა ოფიცერმა, სერ მარკ როულიმ შინაგან საქმეთა მინისტრს პოლიციელების დაცვისკენ მოუწოდა. როულის მხარი პრემიერ-მინისტრმა რიში სუნაკმაც დაუჭირა. პოლიციას მხარდაჭერა გამოუცხადა შსს-ს ხელმძღვანელობამაც.
"ბრიტანეთის პოლიცია წარმოადგენს მოსახლეობას და არა მთავრობას. მისი მუშაობის პრინციპები ჩამოყალიბდა ორი საუკუნის წინ, ჯერ კიდევ 1829 წელს, სკოტლანდ იარდის დაარსებით. შეიარაღებული პოლიციელები წარმოუდგენლად რთულ საქმეს აკეთებენ. მათ უნდა გადაწყვიტონ სიცოცხლისა და სიკვდილის საკითხები წამის მეასედში. მათი სიმამაცე უზრუნველყოფს ჩვენს უსაფრთხოებას და იმსახურებს მადლიერებას“, - განაცხადა მარკ როულიმ.
ხელისუფლების მხარდაჭერა სკოტლანდ იარდის კრიზისს ვერ მოაგვარებს. ვინაიდან, მკვლელობას იძიებენ დამოუკიდებელი საგუშაგოები და სასამართლოები, რომლებზეც მინისტრებს პირდაპირი გავლენა არ აქვთ.